U-Isaya 57 - iBhayibhili Elingcwele 1978

¹ Olungileyo uyabhubha, kakho olendaba lakho; abantu abaqotho bayasuswa, kakho okunanzayo lokho. Ngenxa yobubi olungileyo uyasuswa,

² ukuba angene ekuthuleni. Labo abahamba ngobuqotho balele phansi bephumula.

UIsrayeli wonakele

³ Sondelani, lina madodana omthakathi, lina nzalo yesifebe lewule;

⁴ lidlala ngobani na? likhamisela ubani imilomo yenu, linyalize inlimi zenu na? Angithi lingabantwana besiphambeko, lenzalo yenkohliso,

⁵ lina elitsha ngenkanuko phakathi kwezihlala ezinkulu, ngaphansi kwazo zonke izihlahla eziluhlaza, elibulalela abantwana benu ezihotsheni, langaphansi kweminkenke yamawa na?

⁶ Wena omubi, onkulunkulu bakho bangamatshe abutshelezi asesihotsheni; kiwo uthululele umnikelo wokuthululwa, waletha lomnikelo wempuphu. Ngizathokoziswa yilokhu na?

⁷ Phezu kwentaba ende ephakemeyo ubekile umbheda wakho, wakhwela ukuyanikela khona umhlatshelo.

⁸ Ubekile izithombe zakho ngemva kwesivalo langemva kwensika yomnyango; wangilahla, wakhumula izigqoko zakho, walala embhedeni wakho obanzi lezithandwa zakho ozithenga ukuba ulale lazo, ukuze ukholise inkanuko yakho.

⁹ Waziqhola ngamakha, wazigcoba ngamagcobo, wayakhonza unkulunkulu uMoloki; wathumela khatshana izithunywa zakho, wazehlisela lasendaweni yabafileyo.

¹⁰ Wadiniswa yibude bendlela yakho, kodwa kawutshongo ukuthi: Lokhu kakusizi lutho; wazuza amandla amatsha, ngakhoke kawuphelanga amandla.

¹¹ Wesaba bani kangaka ukuze uqambe amanga ungangikhumbuli, ungangifaki enhliziyweni yakho na? Kawusangesabi ngoba ngithule okwesikhathi eside na?

¹² Uthi okwenzayo kulungile, ngizadalula izenzo zakho, ukwenza kwakho kakuyikukusiza.

¹³ Lapho uhlaba umkhosi, izithombe zakho ezinengi kazikusize! Kanti umoya uzakuziphephula zonke, lokuphephetha nje kuzithathe. Kodwa yena othemba kimi uzakuhlala elizweni, adle ilifa, intaba yami engcwele.

Ukusiza lokusilisa kukaNkulunkulu

¹⁴ Kuzakuthiwa: Candani indlela, liyicande liyilungise, lisuse izikhubekiso zonke endleleni yabantu bami.

¹⁵ Ngoba ophakemeyo lophezulu, ohlala kuze kube nininini, obizo lakhe lingoNgcwele, uthi: Ngihlala endaweni ephakemeyo lengcwele, lakuye olomoya odabukileyo lozithobayo, ukuba ngivuselele umoya wabazithobayo, lenhliziyo edabukileyo.

¹⁶ Ngoba kangiyikulwa kokuphela, futhi kangiyikuthukuthela njalonjalo; ngoba umoya wokuphila waphuma kimi, ngadabula abantu.

¹⁷ Ngenxa yobubi bukaIsrayeli obukhulu ngathukuthela, ngamtshaya ekuthukutheleni kwami, ngamlahla; kodwa kwaqhubeka ukuhlamuka kwakhe.

¹⁸ Sengizibonile izindlela zakhe, kodwa ngizakumsilisa, ngimhole, ngimsize, ngiduduze laba abakhalayo.

¹⁹ INkosi ithi: Ukuthula, ukuthula kakube kubo abakhatshana labaseduze; ngizakubasilisa abantu bami.

²⁰ Kodwa ababi banjengolwandle olutshukumayo; ngoba kalulakuphumula, lamanzi alo akhafula udaka lengcekeza.

²¹ Kakulakuthula lakancinyane kwababi, kutsho uNkulunkulu wami.