U-Isaya 54 - iBhayibhili Elingcwele 1978

Uthando lweNkosi kuIsrayeli

¹ Hlabela, wena nyumba; kekela uthokoze, wena ongawuzwanga umhelo. Ngoba umfazi otshiywe yindoda ulabantwana abanengi kulaye olendoda, itsho iNkosi.

² Qhelisa indawo yomuzi wakho, welule kakhulu amakhetheni ethente lakho, udonse kakhulu intambo zalo, ubethelisise lezikhonkwane zakho.

³ Ngoba uzaqhela ugcwale indawo zonke, lenzalo yakho izakubusa indawo ebanzi, yakhe futhi imizi esingamanxiwa.

⁴ Ungesabi, ngoba kawuyikuyangeka; ungabi lenhloni, ngoba kawuyikuyangiswa; ngoba uzakhohlwa ihlazo lobutsha bakho, ungabe usakhumbula ukuyangeka kobufelwakazi bakho.

⁵ Ngoba uMenzi wakho nguye ongumkakho, obizwa ngokuthi yiNkosi yamabandla; loNgcwele kaIsrayeli unguMhlengi wakho, obizwa ngokuthi nguNkulunkulu womhlaba wonke.

⁶ Ngoba iNkosi ikubizile wena unjengomfazi olahliweyo lodabukileyo emoyeni, njengomfazi wobutsha lapho esaliwe, kutsho uNkulunkulu wakho.

⁷ Okomzuzwana omncinyane ngakutshiya, kodwa ngesihawu esikhulu ngizakukubuyisa.

⁸ Olakeni lwami olukhulu ngakufulathela okwesikhatshana, kodwa ngothando olungapheliyo ngizakukuhawukela, kutsho iNkosi, uMhlengi wakho.

⁹ Ngoba lokho kunjengensukwini zikaNowa kimi; ngoba njengalokhu ngafunga ukuba amanzi kaNowa kawayikubuya agcwele umhlaba, ngokunjalo ngifungile ukuthi kangiyikukuthukuthelela, ngikusole.

¹⁰ Lanxa izintaba zingasuka, lamaqaqa asuswe, kodwa uthando lwami olungapheliyo kaluyikusuka kuwe, lesivumelwano sami sokuthula kasiyikususwa, kutsho iNkosi ekuhawukelayo.

IJerusalema elitsha

¹¹ INkosi ithi: Wena ohluphekayo lohlukuluzwayo ongelamduduzi, ngizakwakha amatshe akho abe mahle, ngizibeke izisekelo zakho ngamatshe athiwa ngamasafire.

¹² Ngizakwakha imiphotshongo yakho ngamatshe athiwa yiagate, lamasango akho ngamatshe athiwa yirubi, lomduli wakho wonke ngamatshe amahle.

¹³ Wonke amadodana akho azafundiswa yiNkosi, lokuphumelela kwawo kuzakuba kukhulu.

¹⁴ Uzakuqiniswa ngokulunga; uzavikeleka ekucindezeleni, ungesabi; uvikeleke kokwesabekayo, kakuyikusondela kuwe.

¹⁵ Uba uhlaselwa, lokho kuzabe kungaveli kimi, loba ngubani olwa lawe, uzakwahlulwa ngenxa yakho.

¹⁶ Kuyimi odale umkhandi ovuthela umlilo wamalahle, enze izikhali zomsebenzi wakhe. Kuyimi futhi odale umchithi ukuba achithe.

¹⁷ Kakulasikhali esikhandelwa wena esizakuphumelela; bonke abakumangalelayo bazakwahluleka. Sinjalo isabelo sezinceku zeNkosi, lokulunga kwazo okuvela kimi, kutsho iNkosi.