U-Isaya 53 - iBhayibhili Elingcwele 1978

¹ Ngubani owayengakholwa esikuzwileyo na? Amandla eNkosi ambulelwa bani na?

² Ngoba inceku yakhula njengehlumela phambi kweNkosi, lanjengempande emhlabathini owomileyo; yayingelasithunzi lobuhle ukuba siyibuke, yayingabukeki ukuba siyifune.

³ Yadelelwa, yaliwa ngabantu, yaba ngumuntu wezinhlupheko, ijwayele usizi; yaba njengomuntu owenza abantu ukuba bangamkhangeli, yeyiswa, kasiyinanzanga.

⁴ Impela yathwala ezethu izifo, yathwala ubuhlungu bethu. Kanti thina sathi itshayiwe, itshayiwe nguNkulunkulu, ihlutshiwe.

⁵ Yebo, yalinyazwa ngenxa yeziphambeko zethu, yachotshozwa ngenxa yobubi bethu, kwehliselwa phezu kwayo ukutshaywa okusilethela ukuthula, langamanxeba ayo siyasiliswa thina.

⁶ Thina sonke siduhile njengezimvu; lowo lalowo wahamba ngendlela yakhe; iNkosi yehlisela phezu kwayo ububi bethu sonke.

⁷ Yacindezelwa, yahlutshwa, kanti kayivulanga umlomo wayo yalethwa ekuhlatshweni njengewundlu, lanjengemvu ethuleyo phambi kwabagundi bayo kayivulanga umlomo wayo.

⁸ Yabotshwa yathonisiswa, yasiwa ekufeni; ngubani owananza isiphetho sayo, lokuthi yasuswa njani elizweni labaphilayo, itshaywa ngenxa yeziphambeko zabantu bami na?

⁹ Bayingcwabela phakathi kwababi, ekufeni kwayo yayilomuntu onothileyo, lanxa yona ingenzanga okubi, kungekho inkohliso emlonyeni wayo.

¹⁰ Kanti iNkosi yathanda ukuyichoboza kabuhlungu. Uba inikela ukuphila kwayo kube lihlawulo ngesono, izakubona inzalo yayo, iphile insuku ezinengi, lentando yeNkosi ipheleliswe ngayo.

¹¹ Lapho ukuhlupheka kwayo sekuphelile, izakubona ukukhanya, yaneliswe; ngokwazi kwayo inceku yami elungileyo izalungisisa abanengi, ithwale izono zabo.

¹² Ngakhoke ngizayabela kanye labakhulu, yahlukaniselane impango labalamandla; ngoba yazinikela ekufeni, yabalwa kanye lezoni; yathwala izono zabanengi, yakhulekela izoni.