U-Isaya 5 - iBhayibhili Elingcwele 1978

Umfanekiso wesivini

¹ Kengihlabele ngothandiweyo wami, ingoma yothando ngesivini sakhe. Othandiweyo wami wayelesivini oqaqeni oluvundileyo.

² Wasimba, wakhupha amatshe kiso, wahlanyela ivini elihle; wakha idumba lokulinda phakathi kwaso, wemba isikhamelo sewayini kiso; wathemba ukuba sizathela izithelo ezinhle, kodwa sathela izithelo ezibabayo.

³ Ngakho uthi: Lina baseJerusalema, lani bantu bakoJuda, ake lahlulele phakathi kwami lesivini sami.

⁴ Ngabe kwenziwani esivinini sami engingakwenzanga na? Kungani ukuba lapho ngithembe ukuthi sizathela izithelo ezinhle, sathela izithelo ezibabayo na?

⁵ Sengizakulitshela engizakukwenza esivinini sami. Ngizakuqhaqha uthango lwaso ukuze sidliwe, ngidilize umduli waso ukuze sigxotshwe.

⁶ Ngizasenza sibe liganga, singathenwa, singahlakulwa, simile ameva lokhula. Ngizalaya amayezi ukuba angasinethisi ngezulu.

⁷ UIsrayeli uyisivini seNkosi yamabandla, labantu bakoJuda bayisithombo sayo esihle. Yayilindele okufaneleyo, kodwa kwaba khona ukubulalana; yalindela ukulunga, kodwa kwaba khona ukukhala.

Amazwi okwahlulela ababi

⁸ Maye kulabo abathenga izindlu ngezindlu lamazwe ngamazwe, indawo yonke ibe ngeyabo, lisale lina lihlala lodwa phakathi kwelizwe!

⁹ INkosi yamabandla ngiyizwile ifunga isithi: Impela izindlu ezinengi zizakuba ngamanxiwa, izindlu ezinkulu lezinhle zisale zingaselamuntu.

¹⁰ Ngoba indima ezinhlanu zevini zizathela itanka elilodwa nje, lehomeri lenhlanyelo lithele ihefa nje lamabele.

¹¹ Maye kulabo abavuka ekuseni ukuba bayenatha utshwala, banathe kuze kuhlwe, baze badakwe!

¹² Batshaye umhubhe lechacho, isigubhu lomhlanga, banathe iwayini emadilini abo, kodwa bengananzi izenzo zeNkosi, bengaboni lemisebenzi yezandla zayo.

¹³ Ngakhoke abantu bami bazathunjwa bengananzelele, labadumileyo babo besifa indlala, labantu bonke besifa yikoma.

¹⁴ Ngakhoke indawo yabafileyo inabulule umphimbo wayo, yavula umlomo wayo waba banzi ukuginya izikhulu eziseJerusalema, labantu balo abaxokozelayo ngokuthaba.

¹⁵ Abantu behliselwa phansi, bathotshiswe, labazikhukhumezayo bayathotshiswa.

¹⁶ Kodwa iNkosi yamabandla iphakanyisiwe ngokwenza okufaneleyo, uNkulunkulu oNgcwele ubonakalisa ubungcwele bakhe ngokulunga.

¹⁷ Amawundlu azakudla kungathi asemadlelweni awo, lamazinyane adle emanxiweni.

¹⁸ Maye kulabo abadonsa ububi njengemvu ekhungiweyo, abadonsa izono njengenqola!

¹⁹ besithi: UNkulunkulu kaphangise ukwenza umsebenzi wakhe ukuze siwubone; icebo loNgcwele kaIsrayeli kalibonakale ukuze silazi.

²⁰ Maye kulabo abathi okubi kuhle, lokuhle kubi, ababeka umnyama esikhundleni sokukhanya, lokukhanya esikhundleni somnyama, abathi okubabayo kumnandi, lokumnandi kuyababa!

²¹ Maye kulabo abazibona behlakaniphile, bezibona beqondile!

²² Maye kulabo abangamaqhawe okunatha utshwala, lakulabo abalamandla okubupheka,

²³ abayekela abalamacala ngenxa yomvuzo, bathathele abangelacala ilungelo labo!

²⁴ Ngakhoke njengalokhu umlilo utshisa amabibi, lelangabi litshisa utshani obomileyo, ngokunjalo impande yabo izakubola, lempoko yabo iphephuke njengothuli; ngoba bawalile umlayo weNkosi yamabandla, balidelela ilizwi loNgcwele kaIsrayeli.

²⁵ Ngakhoke iNkosi ibathukuthelele abantu bayo, yelula isandla sayo yabatshaya; izintaba zizakuzamazama, lezidumbu zabo zibe yingcekeza ezindleleni. Kukho konke lokhu ukuthukuthela kwayo kakukapheli, isiphakamisile isandla sayo ukutshaya futhi.

²⁶ Izakusiphakamisela uphawu isizwe esikhatshana, isitshayele ikhwelo sisekucineni komhlaba; sizakuza masinyane ngejubane.

²⁷ Kakho ozakudinwa akhubeke kuso, kakho ozakuwozela alale; amabhanti abo okhalo kawayikuthukuluka, lemichilo yamanyathelo abo kayiyikuqamuka;

²⁸ imitshoko yabo ibukhali, lamadandili awo wonke agotshiwe, amangqina amabhiza abo alukhuni njengelitshe, lamavili enqola zokulwa agijima njengesivunguzane.

²⁹ Bazabhonga njengesilwane, lanjengemidlwane yesilwane; babhavume babambe impango yabo, babaleke layo, kungabi khona obemukayo.

³⁰ Bazayibhavumela ngalolosuku, badume njengolwandle. Uba umuntu ekhangela emhlabeni, uzabona umnyama losizi, lokukhanya kwenziwe kwaba mnyama ngamayezi.