U-Isaya 41 - iBhayibhili Elingcwele 1978

UNkulunkulu uzamlondoloza uIsrayeli

¹ UNkulunkulu uthi: Thulani, lingilalele, lina mazwe angasolwandle, izizwe kazizuze amandla amatsha, kazisondele kimi andubana zikhulume; asihlangane ekwahluleleni.

² Ngubani ovusa lowo ovela ngasempumalanga onqobayo kuzo zonke indawo ahamba kizo na? Ngubani onikela izizwe phambi kwakhe, amenze anyathezele phansi amakhosi, umkhonto wakhe uyawachitha njengothuli, lemitshoko yakhe iwatsahaze njengezibi phambi komoya na?

³ Uxotshana lazo, adlule angathintwa lutho, kungathi inyawo zakhe kazinyatheli emhlabathini.

⁴ Ngubani oveze lokhu, wakwenza, obiza izizukulwana kusukela ekuqaleni na? Kuyimi iNkosi engingowokuqala, engilokho nginjalo lasekucineni.

⁵ Amazwe angasolwandle ayesaba, umhlaba wonke uyathuthumela, abantu bawo sebehlangene.

⁶ Yilowo lalowo usiza umakhelwana wakhe, athi kumfowabo: Mana isibindi!

⁷ Umbazi umisa umkhandi isibindi, lalowo ololonga ngesando ammise isibindi obethela ndawonye isithombe, esithi: Kunanyathiselwe kuhle; ekubethela ngezipikili ukuze kuqine.

⁸ Kodwa wena Israyeli, nceku yami, wena Jakobe engikukhethileyo, nzalo kaAbrahama umngane wami,

⁹ wena engakuthatha emikhawulweni yomhlaba, ngakubiza ezingonsini zawo ezikhatshana, ngisithi kuwe: Wena uyinceku yami, ngikukhethile, kangiyikukulahla;

¹⁰ ungesabi, ngoba mina ngilawe, ungapheli amandla, ngoba mina nginguNkulunkulu wakho; ngizakukuqinisa, ngikusize, ngikusekele ngesandla sami sokunene esinqobayo.

¹¹ Bonke abakuthukutheleleyo bazayangeka badaniswe; lalabo abalwa lawe bazakuba yize babhubhe.

¹² Uzabadinga labo abalwa lawe, kodwa ungabafumani; bonke abalwa lawe bazakuba yize.

¹³ Ngoba mina Nkosi, uNkulunkulu wakho, ngikubamba ngesandla sakho sokunene; ngithi kuwe: Ungesabi, ngizakukusiza.

¹⁴ Ungesabi wena mpethu enguJakobe, lawe sibungu esinguIsrayeli. Mina ngizakukusiza, kutsho iNkosi; umhlengi wakho ungoNgcwele kaIsrayeli.

¹⁵ Ngizakukwenza ukuba ube lubhulo olutsha olulenhlendla ezibukhali; uzakubhula izintaba uzibhidlize, wenze amaqaqa abe njengothuli;

¹⁶ uzakuwaphosa phezulu, lomoya uzawaphephula, lesivunguzane siwachithachithe; uthokoze ngeNkosi, uzibonge ngoNgcwele kaIsrayeli.

¹⁷ Lapho abayanga labaswelayo bedinga amanzi, kodwa engekho, lenlimi zabo sezomile kakhulu, mina Nkosi ngizakubaphendula, mina Nkulunkulu kaIsrayeli kangiyikubalahla.

¹⁸ Ngizakuvula imifula emadundulwini angelalutho, lemithombo phakathi kwezigodi; ngiphendule inkangala ibe yisiziba samanzi, lomhlabethi owomileyo ube yimithombo yamanzi.

¹⁹ Ngizamilisa enkangala izihlahla zomkusu, lezomvagazi, lezomtshekisane, lezamaoliva, ngikhulise engwaduleni izihlahla zamaphane, lomangwe, lomnondo,

²⁰ ukuze abantu babone, bazi baqaphelise, baqedisise bonke, ukuthi isandla seNkosi sikwenzile lokhu, lokuthi oNgcwele kaIsrayeli ukudalile.

Onkulunkulu abanye bayize

²¹ Lina bonkulunkulu bezizwe, landani indaba yenu, kutsho iNkosi, lilethe ubufakazi benu, kutsho iNkosi kaJakobe.

²² Sondelani lisitshele okuzakwenzeka; sitsheleni izinto zakuqala ukuba ziyini, ukuze sinakane ngazo, sazi ukuphela kwazo, loba lisitshele izinto ezizayo.

²³ Sitsheleni okuzayo ngesikhathi esizayo, ukuze sazi ukuba lingonkulunkulu; yenzani okuhle ingabe lenze okubi, ukuze simangale, sithuthumele.

²⁴ Khangelani, liyize, lomsebenzi wenu uyize; uyisinengiso laye olikhethayo.

²⁵ Ukhona engimvusileyo ngasenyakatho, njalo usefikile; ngimvusile ngasempumalanga, uzabiza ibizo lami; uzanyathela izikhulu njengodaka, lanjengombumbi evoxa ibumba.

²⁶ Ngubani owakubikayo lokho ngasekuqaleni, ukuba sikwazi, langaphambili ukuze sitsho ukuthi: Uqinisile? Kakho owake wakubika, kakho owake wakumemezela, kakho lowezwayo amazwi enu.

²⁷ Kwaba yimi owaba ngowokuqala okubika eZiyone, nganika iJerusalema umbiko wezindaba ezinhle.

²⁸ Kodwa lapho ngikhangela, kakulankulunkulu; kakho phakathi kwabo ongeluleka, ongaphendula lapho ngibuza.

²⁹ Bayinkohliso bonke, lemisebenzi yabo iyize, lezithombe zabo ezibunjiweyo zingumoya leze.