U-Isaya 34 - iBhayibhili Elingcwele 1978

INkosi ithukuthelela izizwe zonke

¹ Sondelani, lina zizwe, ukuba lizwe, lilalele, lani bantu. Umhlaba kawulalele, lakho konke okukiwo, ilizwe, lakho konke okuvela kilo.

² Ngoba iNkosi izithukuthelele izizwe zonke, iyafutheka ngayo yonke impi yazo, izinikele ekubulaweni.

³ Ababuleweyo bazo kabayikungcwatshwa, zizanuka izidumbu zabo, legazi labo ligeleze ezintabeni.

⁴ Zonke inkanyezi lelanga lenyanga kuzakuphela, umkhathi ugoqwe njengomqulu, lenkanyezi zonke ziwe lanjengamahlamvu awohloka evinini, njengamahlamvu awohloka esihlahleni somkhiwa.

⁵ Umkhonto weNkosi uyabonakala ezulwini, uzakwehlela phezu kukaEdoma ngokwahlulela, phezu kwabantu ebanikele ekubulaweni.

⁶ Umkhonto wayo usugcwele igazi, usugcwele amafutha legazi lamawundlu lelezimbuzi, ugcwele amafutha ezinso zezinqama. Isizanikela lumhlatshelo eBozira, ihlabe umnikelo omkhulu elizweni laseEdoma.

⁷ Izinyathi zizakuwa kanye lalo, lezinkunzana kanye lenkunzi ezilamandla. Ilizwe labo lizagcwala igazi, lomhlabathi wabo uvundiswe ngamahwahwa.

⁸ Ngoba iNkosi ilosuku lokuphindisela, umnyaka wokubuyiselwa kwendaba yaseZiyone.

⁹ Imifula yaseEdoma izaphenduka ingcino, lomhlabathi wakhona uphenduke isolufa: ilizwe lonke lizakuba yingcino etshisayo.

¹⁰ Lizakutsha ebusuku lemini, kaliyikucima, lentuthu yalo izakuthunqa kokuphela. Lizakuba yinkangala ezizukulwaneni zonke, kakulamuntu ozadabula phakathi kwalo kuze kube nininini.

¹¹ Kodwa kuzakwakha kulo ukhozi lesikhova lewabayi. INkosi izakwelula phezu kwalo intambo yokulinganisa ukuchitheka, lentambo yokulinganisa ukudideka.

¹² Kakusayikuba khona inkosi, lezikhulu zalo zizabe zingasekho.

¹³ Ameva azakhula ezindlini zamakhosi alo akhona, imbabazane lokhula kukhule emizini ebiyelweyo, kube yindawo yamakhanka lezikhova.

¹⁴ Amagola azahlala khona lezimpisi, lamagogo azabizana khona; isipuku sizafika khona sizizuzele indawo yokuhlala.

¹⁵ Lapho isikhova sizakwakha isidleke, silalele khona, sichamusele, sifukamele abantwana baso ngomthunzi waso, lemizwazwa izabuthana lapho, ize igcwale khona.

¹⁶ Funani encwadini yeNkosi, lifunde khona; kakukho lokukodwa kulezi okuzasweleka, kakukho lokukodwa okuzaswela umngane wakho. Ngoba umlomo weNkosi ulayile, lomoya wayo ukubuthanisile.

¹⁷ Yiyo ezabele ilizwe, izinike zonke indawo, zizahlala khona izizukulwana zonke, libe ngelazo kokuphela.