U-Isaya 32 - iBhayibhili Elingcwele 1978

Inkosi elungileyo

¹ Khangela, kuzakuba khona inkosi ebusa ngokulunga, lezikhulu ezibusa ngokufaneleyo.

² Yileso laleso sibe yindawo yokucatshela umoya lesivikelo sesiphepha, sibe njengemifula yamanzi endaweni eyomileyo, lanjengomthunzi wedwala elikhulu elizweni elilugwadule.

³ Amehlo ababonayo kawayikuvaleka, lezindlebe zabezwayo zizakulalela.

⁴ Lengqondo zabalamawala zizakuba lengqondo yokuhle, lolimi lwabalamalimi luzakhuluma kuhle.

⁵ Isithutha kasisayikubizwa ngokuthi sihloniphekile, lomkhohlisi athiwe uthembekile.

⁶ Ngoba isithutha sikhuluma ubuthutha, lengqondo yaso isebenza okubi, ukuba senze izinto ezimbi lokuba siqambe amanga ngeNkosi, lokuba singamniki ukudla olambileyo, simncitshe amanzi owomileyo.

⁷ Inkohliso zomkhohlisi zimbi; wenza amacebo amabi ukuba achithe abayanga ngamazwi amanga, abamuke okufaneleyo.

⁸ Kodwa oqotho wenza ubuqotho, uqiniswa yizinto eziqotho.

Ukuxwayiswa kwabesifazana abaseJerusalema

⁹ Vukani, lina besifazana abachelesileyo, lizwe ilizwi lami; lina madodakazi angananziyo, lalelani ukukhuluma kwami.

¹⁰ Khathesi kalinanzi lutho, kodwa ngemva komnyaka lizakuthuthumela, ngoba ukuvunwa kwevini kuzakuphela, kungabuthwenga zithelo.

¹¹ Thuthumelani, lina besifazana abachelesileyo, liqhuqhe, lina abangananziyo; khumulani izigqoko, lisale lize, lizibophe ngamasaka enkalweni zenu.

¹² Lizitshaye ezifubeni ngenxa yamasimu amahle, langenxa yezithelo zevini,

¹³ langenxa yomhlabathi wabantu bami osumile ukhula lameva, langenxa yazo zonke izindlu ezazigcwele ukujabula, lomuzi owawugcwele abantu.

¹⁴ Ngoba isigodlo sizasala size, lomuzi ogcwele abantu utshiywe uze; amaqaqa lenziqaba zokulinda kuzasala kuyimihome kokuphela, kube yindawo yabobabhemi beganga, lamadlelo emihlambi,

¹⁵ umoya uze uthelwe phezu kwethu uvela phezulu. Inkangala izakuba yindawo evundileyo, lendawo evundileyo ibe lihlathi.

¹⁶ Kuthi okufaneleyo kuhlale enkangala, lokulunga kuhlale endaweni evundileyo.

¹⁷ Ukulunga kuzaletha ukuthula lokuvikeleka, kuze kube nininini.

¹⁸ Abantu bami bazahlala endaweni yokuthula, ezindaweni ezivikelekileyo, bengahlupheki.

¹⁹ — Ihlathi lizakwehliselwa phansi, lomuzi udilizelwe phansi —

²⁰ Lina lonke lizakuthokoza, lihlanyele kuhle ngoba amanzi azaba manengi, likhulule inkabi lobabhemi kuzihambele.