U-Isaya 30 - iBhayibhili Elingcwele 1978

Ubuze bokwenza isivumelwano leGibithe

¹ Maye ebantwaneni abahlamukayo! kutsho iNkosi, abenza amacebo angesiwo awami, labenza izivumelwano ezingesizo ezami, ukuba bengezelele isono phezu kwesono.

² Basuka baye eGibithe bengacelanga iseluleko sami, ukuba bayephephela ekuvikelweni nguFaro, bayecatsha emthunzini waseGibithe.

³ Kodwake ukuvikelwa nguFaro kuzaphenduka inhloni kini, lokucatsha emthunzini waseGibithe kube yikudaniswa kwenu.

⁴ Lanxa izithunywa zabo zifike eZowani laseHanesi,

⁵ bonke bayangeka ngenxa yesizwe leso esingelakubasiza ngalutho, isizwe esingabaletheli usizo, kuphela ukuyangeka lenhloni.

⁶ Leli yilizwi ngezilo zaseNegebi. Abathunyiweyo badabula ilizwe elilengozi lokuhlupheka, lapho kukhona izilwane, lamabululu lenyoka eziphaphayo, bethwele inotho ngabobabhemi, lempahla yabo eligugu ngamakamela, bekusa ebantwini abangelakubasiza ngalutho.

⁷ Ngoba usizo lwaseGibithe kalulamsebenzi, luyize; ngakhoke ngilibize ngokuthi ngumgobo ongelangozi.

⁸ Ngakhoke hambake, ukulobe elitsheni phambi kwabo, ukulobe encwadini, ukuba kube yibufakazi esikhathini esizayo kuze kube nininini.

⁹ Ngoba bangabantu abahlamukayo, abantwana abaqamba amanga, abantwana abangayikuzwa ukufundisa kweNkosi;

¹⁰ abathi kubaboni: Lingabe lisabona; lakubaprofethi: Lingatshumayeli kithi okuqondileyo; kodwa khulumani kithi izinto ezimnandi, lamanga athokozisayo,

¹¹ litshiye indlela eqondileyo, liphambuke kiyo, singabe sisezwa futhi ngoNgcwele kaIsrayeli.

¹² Ngakhoke oNgcwele kaIsrayeli uthi: Ngoba lidelele lelilizwi, lithembela kukho ukucindezela lokuphambeneyo, libambelele kukho,

¹³ lobububi benu buzakuba njengomkenke osemdulini omude, umduli osulenga osuzakuwa, owa ngesikhathi ungananzelelwanga;

¹⁴ ukuwa kwawo kunjengokufa kwembiza yombumbi, ephahlazeka, iphele, kungabe kusafunyanwa lodengezi lokokha umlilo, lolokukha amanzi emthonjeni.

¹⁵ INkosi uNkulunkulu, oNgcwele kaIsrayeli, ithi: Phendukelani kimi, lihlale ngokuthula, ng’khona lizakusizwa; amandla enu asekuchumeni lekuthembeni; kodwa kalikufuni.

¹⁶ Kodwa lina lithi: Atshi, sizabaleka ngamabhiza. Ngakhoke balekani. Lithi njalo: Sizakhwela amabhiza alejubane. Ngakhoke labalixotshayo bazakuba lejubane elikhulu.

¹⁷ Abayinkulungwane bazabaleka ngokusongelwa ngoyedwa nje, ngokusongelwa ngabahlanu lizakubaleka, libaleke kuze kuthi abaseleyo benu basale sebenjengensika ephezu kwentaba, lanjengogodo olumiswe oqaqeni.

Isithembiso sikaNkulunkulu ebantwini bakhe

¹⁸ Kodwa iNkosi ilindele ukuba ibe lomusa kini, iyathanda ukuba ibe lesihawu kini; ngoba iNkosi inguNkulunkulu wokulunga, babusisiwe bonke abathemba kuyo.

¹⁹ Ngakhoke lina bantu abaseZiyone elakhe eJerusalema, kalisayikukhala futhi; impela iNkosi izakuba lomusa kini ekukhaleni kwenu; lapho ikuzwa, izaliphendula.

²⁰ Loba iNkosi ilinika isinkwa sokuhlupheka lamanzi osizi, kanti umfundisi wenu kasayikucatsha, kodwa amehlo enu azakumbona.

²¹ Lapho liphambukela ngakwesokunene langakwesokhohlo, indlebe zenu zizakuzwa ilizwi ngemva kwenu lisithi: Nansi indlela, hambani ngayo.

²² Lizakudela izithombe zenu ezibaziweyo, zananyekwa ngesiliva, lezithombe zenu ezibunjiweyo, zananyekwa ngegolide, liziphose njengezinto ezingcolileyo, lithi kuzo: Sukani lapha.

²³ Izakunisela izulu inhlanyelo yenu eliyihlanyela emhlabathini, ilinike amabele, inala enkulu lenhle kakhulu. Ngalesosikhathi inkomo zenu zizakudla emadlelweni abanzi;

²⁴ lenkabi zenu labobabhemi benu elilima ngabo bazakudla ukudla okuhle kakhulu, okweliweyo ngefotsholo langefolokwe.

²⁵ Laphezu kwezintaba ezinde lamaqaqa amade kuzakuba lezifula zamanzi agelezayo osukwini lokubulawa okukhulu, mhla kusiwa izinqaba.

²⁶ Futhi ukukhanya kwenyanga kuzakuba njengokukhanya kwelanga, lokukhanya kwelanga kuphindwe kasikhombisa, kube ngangokukhanya kwensuku eziyisikhombisa, mhla iNkosi ibopha amanxeba abantu bayo, ipholisa izilonda zemivimvinya yabo.

Ukunqotshwa kweAsiriya

²⁷ Khangela, iNkosi ivela khatshana, ulaka lwayo luyavutha, lutshengiswa ngentuthu ethunqayo; ikhuluma ithukuthele, lamazwi ayo anjengomlilo oquthulayo;

²⁸ ukuphefumula kwayo kunjengamanzi akhukhulayo aze afike entanyeni; ihlungula izizwe ngesihlungulo sokuchitheka, ifaka emilonyeni yabantu amatomu aduhisayo.

²⁹ Kodwa lina lizahlabela ingoma njengasebusuku lapho kugujwa umkhosi ongcwele, lithokoze enhliziyweni, loba njengalapho abantu betshaya umhubhe, besiya entabeni yeNkosi, eDwaleni likaIsrayeli.

³⁰ INkosi izazwakalisa ilizwi layo elilodumo, ibonakalise ingalo yayo lapho itshayayo, ekuthukutheleni kwayo okwesabekayo, ngokuvutha komlilo oqothulayo, langesivunguvungu, langesiphepha, langesiqhotho.

³¹ Ngokuzwa ilizwi leNkosi abaseAsiriya bazatshaywa luvalo, lapho itshaya ngenduku yayo.

³² Kuzakuthi lapho iNkosi ibatshaya ngenduku yayo, kuzwakale ukukhala kwezigubhu lamachacho, lapho isilwa labo.

³³ Ngoba indawo yokutshisela kade yalungiswa, yalungiselwa inkosi yaseAsiriya; isilungile, legodi layo lenziwa latshona, laba banzi, lilomlilo lenkuni ezinengi; umphefumulo weNkosi unjengomlilo olesolufa, uyawuthungela.