U-Isaya 3 - iBhayibhili Elingcwele 1978

Ukwahlulelwa kweJerusalema loJuda

¹ Khangela, iNkosi uNkulunkulu wamabandla iyasusa eJerusalema lakoJuda konke okusizayo, konke ukudla lawo wonke amanzi,

² isusa amaqhawe lamabutho, labahluleli labaprofethi labalumbi labadala,

³ izinduna zamatshumi amahlanu, labantu abadumileyo, labaluleki, lezanuse ezihlakaniphileyo, labazi amalumbo.

⁴ Ngizabanika abafana babe yizikhulu zabo, bazabusa bengabantwana nje.

⁵ Abantu bazakucindezelana, kube yilowo lalowo umngane wakhe, lalowo lalowo umakhelwana wakhe; abatsha bazakudelela abadala, labadelelekileyo badelele abalodumo.

⁶ Lapho umuntu ezakubamba umfowabo endlini kayise athi: Wena ulengubo, woba ngumbusi wethu kulesisikhathi sokuhlupheka;

⁷ umfowabo uzaphendula athi: Kangiyikuba ngumsizi, ngoba endlini yami kakulakudla lengubo; kaliyikungenza ngibe ngumbusi wabantu.

⁸ IJerusalema ikhubekile, loJuda uwile, lokhu ukukhuluma kwabo lokwenza kwabo kuphambene leNkosi, ukudelela ubukhosi bayo.

⁹ Ukubandlulula kwabo kuyafakaza ngabo; benza izono zabo obala njengeSodoma, kabazifihli. Maye kibo! Ngoba bazehlisela okubi.

¹⁰ Tshelani abalungileyo ukuthi kuzakuba kuhle kubo, ngoba bazakudla umvuzo wezenzo zabo.

¹¹ Maye komubi! Kuzakuba kubi kuye, ngoba lokho okwenziwe ngezandla zakhe kuzakwenziwa lakuye.

¹² Abebolekisi bemali bacindezela abantu bami, abanika izikwelede bayabakhohlisa. Lina bantu bami, abakhokheli benu bayaliduhisa, baphambanisa indlela zenu.

¹³ INkosi isilungele ukwahlulela, izakusuka yahlulele abantu bayo.

¹⁴ INkosi iyakwahlulela abadala lezikhulu zabantu bayo. Ithi: Yini elidle izivini, elikuphange kubayanga kusezindlini zenu.

¹⁵ Libachobozelani abantu bami ngokucindezela abangabayanga na? kutsho iNkosi uNkulunkulu wamabandla.

Ukuthonisiswa kwabesifazana baseZiyone

¹⁶ INkosi yathi: Ngoba abesifazana baseZiyone beziphakamisile, belule intamo, behuga ngamehlo abo, behamba ngokuxoxomela bekhencezisa izigqizo enyaweni zabo,

¹⁷ iNkosi izaphuca amakhanda abo, izakubanqunulisa.

¹⁸ Ngalolosuku iNkosi izasusa iziceco zabo, lezigqizo, lezicwatsho,

¹⁹ lamacici lamasongo, lezimbombozo,

²⁰ lamaqhiye lezigetsho, lamabhanti, lemifuma, lezintebe,

²¹ lezindandatho lamacici amakhulu,

²² lezigqoko zemikhosi, lezingubo, lezambatho, lezamba,

²³ lezibuko, lezigqoko ezinhle, lamaqhele, lamaveli.

²⁴ Kuzakuthi endaweni yamakha kube khona ukubola, endaweni yebhanti kube khona igoda, lendaweni yenwele ezilungiswe kuhle kube khona impabanga, lendaweni yezigqoko ezinhle kube khona amadabudabu, lendaweni yobuhle kube khona ukuyangeka.

²⁵ Amadoda akini azaqedwa ngomkhonto, lamaqhawe akini aphelele empini.

²⁶ Emasangweni eZiyone kuzakuba khona ukukhala lokulila, lona lizakuba njengowesifazana ohlezi phansi eze.