U-Isaya 23 - iBhayibhili Elingcwele 1978

Ilizwi ngeTire

¹ Leli yilizwi ngeTire. Khalani, lina mikolo yaseTarshishi, ngoba iTire eliyindawo yakini lidilikile, lezindlu zalo letheku lalo kuchithekile. Lezwa lokhu endleleni livela elizweni laseKuprosi.

² Khalani, lina abahlala ngasolwandle, lina bathengisi baseSidoni. Izinceku zenu zadabula ulwandle,

³ zahamba enlwandle ezinkulu. Inzuzo yenu kwakungamabele aseShihori, isivuno saseNile; lalingabathengi ezizweni.

⁴ Woba lenhloni, wena Sidoni, ngoba ulwandle selukhulumile lwathi: Kangizanga ngihelelwe, kangizanga ngibelethe, kangikhulisanga amadodana lamadodakazi.

⁵ Lapho umbiko ufika eGibithe, bazathuthumela ngokuzwa ngokuchitheka kweTire.

⁶ Balekelani eTarshishi, likhale, lina abahlala ngasolwandle.

⁷ Yiwo lo umuzi wenu ojabulayo yini, obudala bawo busukela ensukwini zasendulo, owathumela abantu bawo ukuhlala endaweni ezikhatshana na?

⁸ Ngubani omise lokhu ngeTire elingumuzi wamakhosi na? Abathengisi balo babeyizikhulu, labathengiselani balo babelodumo emhlabeni.

⁹ YiNkosi yamakhosi ekumisileyo, ukuba yonakalise ukuziphakamisa lobuhle balo, lokuba yenze bonke abadumileyo bomhlaba badeleleke.

¹⁰ Limani umhlabathi, lina bantu baseTarshishi, ngoba itheku kalisekho.

¹¹ INkosi iselulele phezu kolwandle isandla sayo, inyikinyile imibuso; iNkosi ilayezile ngeKanani ukuba kuchithwe indawo zalo zokuthengisela.

¹² Yathi: Kawusayikujabula, wena muzi waseSidoni ocindezelweyo; suka, ubalekele eKuprosi, kanti lakhona lapho kawuyikuphumula.

¹³ KwakungamaKaladiya kungesiwo amaSiriya alinikela iTire ezilweni zasenkangala; bamisa khona izindawo zabo zokuvimbezela, bachitha inqaba zawo, bawutshiya ulunxiwa.

¹⁴ Khalani, lina mikolo yaseTarshishi, ngoba inqaba yenu idilikile.

¹⁵ Kuzakuthi ngalolosuku iTire likhohlakale okweminyaka engamatshumi ayisikhombisa, elingana lezinsuku zokubusa kwenkosi ibenye. Ekupheleni kweminyaka engamatshumi ayisikhombisa kuzakuba khona eTire okutshiwo yingoma yewule ukuthi:

¹⁶ Thatha ichacho, uhambahambe phakathi komuzi, wena wule elikhohlakeleyo, utshaye kamnandi, uhlabele ingoma ezinengi, ukuze izithandwa zakho zikukhumbule.

¹⁷ Kuzakuthi ekupheleni kweminyaka engamatshumi ayisikhombisa iNkosi ilikhumbule iTire; lizabuyela ekuwuleni kwalo; lizakuwula layo yonke imibuso yomhlaba.

¹⁸ Intengo yalo lenzuzo yalo kuzakwahlukaniselwa iNkosi; kakuyikubuthelelwa kulondolozwe, kodwa kuzakuba ngokwabadumisa iNkosi, ukuba badle basuthe, bagqoke okuhle.