U-Isaya 2 - iBhayibhili Elingcwele 1978

Isithembiso sokuthula

¹ Leli yilizwi likaIsaya indodana kaAmozi aliboniswa ngoJuda langeJerusalema.

² Kuzakuthi ensukwini ezizayo intaba yendlu yeNkosi iphakanyiswe phezu kwazo zonke intaba, yengame wonke amaqaqa; zonke izizwe zizabekelela ziye kuyo,

³ labantu abanengi bazakuza bathi: Wozani sikhwele entabeni yeNkosi; siye endlini kaNkulunkulu kaJakobe, ukuba asifundise indlela zakhe, ukuze sihambe endleleni zakhe. Ngoba kuzakuphuma umlayo eZiyone, lelizwi leNkosi eJerusalema.

⁴ Izakwahlulela phakathi kwezizwe, iqumele abantu abanengi; bazakukhanda imihedla yabo ibe yimilomo yamakhuba, lemikhonto yabo ibe zingqamu zokuthena izihlahla; isizwe kasiyikuphakamisela isizwe umkhonto, kasisayikufunda ukulwa futhi.

⁵ Wena ndlu kaJakobe, wozani sihambe ekukhanyeni kweNkosi.

Ukwahlulelwa kwabazikhukhumezayo

⁶ INkosi ibalahlile abantu bayo abendlu kaJakobe, ngoba ilizwe labo ligcwele abalumbi basempumalanga, lezanuse njengamaFilistiya, bahlangane labezizwe.

⁷ Ilizwe labo ligcwele isiliva legolide, lenotho yabo kayipheli; ilizwe labo ligcwele amabhiza, lenqola zabo zokulwa kazipheli.

⁸ Ilizwe labo ligcwele izithombe; bakhuleka emisebenzini yezandla zabo, lakukho okwenziwe yiminwe yabo.

⁹ Ngakho abantu bonke bazakwehliselwa phansi, bathotshiswe; ungabathetheleli, Nkosi.

¹⁰ Ngenani ezimbalwini, licatshele emihomeni ukwesabeka kweNkosi, lodumo, lobukhosi bayo.

¹¹ Abantu abaziphakamisayo bazakwehliselwa phansi, lokuzikhukhumeza kwabantu kuzakuthotshiswa, kuphakame iNkosi kuphela ngalolosuku.

¹² Ngoba iNkosi yamabandla ilosuku elulindisele konke okuzigqajayo lokuzikhukhumezayo, lakho konke okuziphakamisayo lokuphakemeyo,

¹³ lazo zonke izihlahla zomkusu zaseLebanoni ezinde leziphakemeyo, lazo zonke izihlahla ezinkulu zaseBashani,

¹⁴ lazo zonke intaba ezinde, lamaqaqa wonke aphakemeyo,

¹⁵ layo yonke imiphotshongo ephakemeyo, lezinqaba eziqinisiweyo,

¹⁶ layo yonke imikolo emikhulu.

¹⁷ Ukuziphakamisa kwabantu kuzakwehliselwa phansi, lokuzikhukhumeza kwabantu kuzathotshiswa, kuphakame iNkosi kuphela ngalolusuku.

¹⁸ Izithombe zizaphela zithi nya.

¹⁹ Abantu bazangena ezimbalwini zamadwala lasemihomeni yomhlaba, ngenxa yokwesaba iNkosi langenxa yodumo lobukhosi bayo, lapho ivuka ukunyikinya umhlaba.

²⁰ Ngalolosuku abantu bazakulahlela emagundwaneni lakubolulwane izithombe zabo zesiliva lezegolide abazenzela zona ukuba bakhuleke kuzo,

²¹ ukuze bangene embalwini zamadwala lezingoxweni zamawa, ngenxa yokwesaba iNkosi langenxa yodumo lobukhosi bayo, lapho ivuka ukunyikinya umhlaba.

²² Lingathembi umuntu okuphila kwakhe kungumphefumulo nje. Ngoba uyini yena na?