U-Isaya 13 - iBhayibhili Elingcwele 1978

Ilizwi ngeBabiloni

¹ Leli yilizwi ngeBabiloni aliboniswayo uIsaya indodana kaAmozi.

² Entabeni eligceke misa uphawu, ubamemeze abebutho, ubaqhwebe ngesandla ukuba bangene emasangweni ezikhulu.

³ Mina uqobo ngibalayile abakhethiweyo bami, ngibizile amaqhawe ami ukugcwalisa intukuthelo yami, amaqhawe ami azikhukhumezayo.

⁴ Zwana ukuxokozela entabeni kungathi ngokwabantu abanengi. Zwana umsindo wemibuso, umsindo wezizwe ezibuthanayo, INkosi yamabandla iyahlomisa impi yayo.

⁵ Bavela elizweni elikhatshana, emikhawulweni yezulu, iNkosi kanye lezikhali zentukuthelo yayo, ukuba bachithe ilizwe lonke.

⁶ Lilani, ngoba usuku lweNkosi lusondele; njengokuchitheka okuvela kuSomandla luzakufika.

⁷ Ngakhoke izandla zonke zizakuxega, lenhliziyo yakhe wonke umuntu iphelelwe ngamandla,

⁸ batshaywe luvalo, behlelwe yibuhlungu lokudabuka, bafuthelwe njengowesifazana ohelelwayo, bakhangelane ngokumangala, benyukumele.

⁹ Khangelani, usuku lweNkosi luyeza lulobuhlungu lokufutheka lolaka oluvuthayo, ukuba luchithe umhlaba, lubhubhise izoni ezikuwo.

¹⁰ Inkanyezi zezulu kaziyikukhanya; ilanga lizakuba mnyama ekuphumeni kwalo, lenyanga kayisayikukhanya.

¹¹ Ngizakuwutshaya umhlaba ngenxa yobubi bawo, lababi ngenxa yezono zabo, ngiqede ukuzigqaja kwabazikhukhumezayo, ngithobise ukuzikhukhumeza kwabalesihluku.

¹² Ngizakwenza ukuba abantu basweleke ukudlula igolide elihle, basweleke ukudlula igolide laseOfiri.

¹³ Ngakhoke ngizakwenza iphezulu linyikinyeke, lomhlaba unyakaziswe endaweni yawo, ngokuthukuthela kweNkosi yamabandla, osukwini lokuvuthwa kolaka lwayo.

¹⁴ Kuzakuthi njengempala exotshwa ngumzingeli, lanjengezimvu ezingaqoqwa muntu, bonke abantu babuyele kwabakibo, bonke babalekele elizweni lakibo.

¹⁵ Bonke abazafunyanwa bazagwazwa, bonke abazabanjwa bazakubulawa ngomkhonto.

¹⁶ Izingane zabo zizachotshozwa phambi kwabo, kuphangwe lezindlu zabo, omkabo babanjwe.

¹⁷ Khangela, ngibavusela amaMede angakhathaleli isiliva, angathokozi langegolide.

¹⁸ Imitshoko yawo izabulala izinsizwa; kawayikuba lesihawu lenzalo yabantu, kawayikuhawukela abantwana.

¹⁹ IBabiloni, udumo lwemibuso ubucwazicwazi lokuziqhenya kwamaKaladiya, lizakuchithwa nguNkulunkulu njengeSodoma leGomora.

²⁰ Kalisoze libuye lakhiwe, loba kuhlalwe kulo izizukulwana zonke; amaArabiya kawayikumisa amathente awo kulo, labelusi kabayikwelusela izimvu zabo kulo.

²¹ Kodwa izilo zeganga zizalala khona, lezindlu zalo zizagcwala izilo ezikhonyayo; izintshe zizalala khona, lamagogo aqolotshe khona.

²² Impisi zizakhala ezinqabeni zalo, lamakhanka ezindlini ezinhle. Siseduze ukufika isikhathi salo, lezinsuku zalo kaziyikwandiswa.