U-Isaya 12 - iBhayibhili Elingcwele 1978

Ingoma yokubonga

¹ Wena ngalolosuku uzakuthi: Ngizakukubonga, Nkosi, ngoba lanxa wawungithukuthelele, ukuthukuthela kwakho kwadeda, wangiduduza.

² UNkulunkulu ungumkhululi wami, ngizakuthemba ngingesabi; ngoba iNkosi uNkulunkulu ingamandla ami lengoma yami, isingumkhululi wami.

³ Ngokuthokoza uzakukha amanzi emithonjeni yokukhululwa.

⁴ Uzakutsho ngalolosuku uthi: Bongani iNkosi, lidumise ibizo layo; lidumise izenzo zayo phakathi kwezizwe, limemezele ukuthi ibizo layo liphakeme.

⁵ Hlabelelani eNkosini ngoba yenzile izinto ezinkulu; lokhu kwaziwe emhlabeni wonke.

⁶ Memezani, lihlabele ngokuthokoza, lina baseZiyone, ngoba mkhulu phakathi kwenu oNgcwele kaIsrayeli.