U-Isaya 11 - iBhayibhili Elingcwele 1978

Umbuso olokuthula

¹ Kuzakuvela ihlumela esidindini sikaJese, kuphume ugatsha empandeni zakhe.

² Umoya weNkosi uzakuhlala phezu kwakhe, umoya wokuhlakanipha lokuqedisisa, umoya wokuqondisa lowamandla, umoya wokwazi lowokwesaba iNkosi.

³ Intokozo yakhe izakuba sekuyesabeni iNkosi. Kayikwahlulela ngokubona kwamehlo akhe, kayikuquma ngokuzwa kwezindlebe zakhe;

⁴ kodwa uzakwahlulela abayanga ngokulunga, aqumele abathobileyo bomhlaba ngobuqotho; ilizwi lakhe lizakuba yintonga yokutshaya abangalunganga, lezigwebo zakhe zizakubabulala ababi.

⁵ Ukulunga kuzakuba libhanti lokhalo lwakhe, lobuqotho bube libhanti lokhalo lwakhe.

⁶ Impisi izahlala lewundlu, lengwe ilale lezinyane, ithole kanye lesilwane kudle ndawonye, lomntwana omncinyane uzakukuqhuba.

⁷ Inkomokazi lebhere kuzakudla ndawonye; lamathole akho alale ndawonye; isilwane sizakudla utshani njengenkabi.

⁸ Umntwana omunyayo uzadlalela phezu komlindi wenyoka, lomntwana okhumuliweyo afake isandla emlindini webululu.

⁹ Kakho loyedwa ozakwenza okubi, loba one kuyo yonke intaba yami engcwele; ngoba umhlaba uzagcwala ukwazi kweNkosi njengamanzi agcwele ulwandle.

¹⁰ Ngalolosuku impande kaJese izakuba luphawu ebantwini, idingwe yizizwe, lendawo yayo ibe lodumo.

Abathunjiweyo bazakubuya

¹¹ Kuzakuthi ngalolosuku iNkosi yelule isandla sayo ngokwesibili ukubutha abaseleyo ebantwini bayo, ibabuthe eAsiriya laseGibithe lasePatrosi laseEtiyopiya laseElamu, laseShinari laseHamathi, lasemazweni angasolwandle.

¹² Izakuziphakamisela uphawu izizwe, ibuthe abaxotshiweyo bakoIsrayeli labahlakazekileyo bakoJuda, ibabuthe ezingonsini zozine zomhlaba.

¹³ Umona kaEfrayimi uzakuphela, lobutha bukaJuda buzaphela; uEfrayimi kayikuba lomona ngoJuda, loJuda kayikuba yisitha kuEfrayimi.

¹⁴ Kodwa bazakwehlela ewatheni lelizwe lamaFilistiya ngasentshonalanga, kanyekanye baphange abantu basempumalanga. Bazakunqoba iEdoma leMowabi, babuse amaAmoni,

¹⁵ INkosi izakwenza ulwandle lwaseGibithe ukuba lucime ngokutshisa komoya wayo, iphakamisele isandla sayo phezu komfula iYufrathi, iwahlukanise ube yizifudlana eziyisikhombisa, ukuba abantu bahambe phezu komhlabathi owomileyo.

¹⁶ Kuzakuba khona umgwaqo wabantu bakhe abaseleyo uvela eAsiriya, njengalokhu kwakunjalo kuIsrayeli ekuphumeni kwakhe eGibithe.