U-Isaya 1 - iBhayibhili Elingcwele 1978

UNkulunkulu ukhuza isizwe sakoJuda esonayo

¹ Lo ngumbono kaIsaya indodana kaAmozi awubona ngoJuda langeJerusalema ensukwini zaboUziya loJothamu loAhazi loHezekiya amakhosi akoJuda.

² Zwanini, mazulu; ulalele lawe mhlaba, ngoba iNkosi isikhulumile, yathi: Ngondlile ngakhulisa abantwana, kodwa bangivukela.

³ Inkabi iyamazi umniniyo, lobabhemi uyawazi umkolo womnikazi wakhe; kodwa uIsrayeli, abantu bami, kabazi, kabaqedisisi.

⁴ Hawu, sizwe esonayo, bantu abasindwa yibubi, nzalo yababi, bantwana abonakeleyo! Liyitshiyile iNkosi, limdelile oNgcwele kaIsrayeli, lihlamukile.

⁵ Lizakutshaywa kuze kube nini ngenxa yokuqhubeka kwenu lihlamuka na? Lonke ikhanda lakho, Israyeli, ligcwele amanxeba, lenhliziyo yakho yonke ibuthakathaka.

⁶ Kusukela ophangweni lonyawo lwakho kuze kufike ekhanda kakulandawo epheleleyo; ulemivimvinya lezilonda nje lamanxeba ophayo; kakukhanywanga ubomvu, kakubotshwanga, kakuthanjiswanga ngamagcobo.

⁷ Ilizwe lakini lichithekile, lemizi yenu itshiswe ngomlilo; umhlaba wenu udliwa ngabezizwe phambi kwenu, lichithekile, lichithwa ngabafo.

⁸ IZiyone isele injengedumba esivinini, injengengalane ensimini yamakhomane lanjengomuzi ovinjezelweyo.

⁹ Uba iNkosi yamabandla ibingasitshiyelanga ingcosana yabantu, besizakuba njengeSodoma, sifane leGomora.

¹⁰ Zwanini ilizwi leNkosi, lina babusi baseSodoma, lilalele imfundiso kaNkulunkulu wethu, lina bantu baseGomora.

¹¹ INkosi ithi: Iyini kimi imihlatshelo yenu eminengi na? Nganelisiwe yiminikelo yezinqama langamahwahwa okunonisiweyo; legazi lezinkunzi lelamawundlu lelezimpongo kalingithokozisi.

¹² Lapho lisiza phambi kwami ngubani olibizele ukunyathela amaguma ethempeli lami na?

¹³ Lingabe lisaletha iminikelo eyize; impepha yayo iyisinengiso kimi; ukuhlangana kwenu ekuthwaseni kwenyanga, langeSabatha, lezinkonzweni ezinkulu zenu, kangikuthandi; kangikuvumi lokuhlangana kwenu emikhosini.

¹⁴ Ngiyayizonda imihlangano yenu yekuthwaseni kwenyanga leyemikhosi yenu emisiweyo; isingumthwalo kimi, futhi sengikhathele yikuyithwala.

¹⁵ Lapho liselulela izandla zenu kimi, ngizalifihlela amehlo ami; lanxa lisenza imikhuleko eminengi, kangiyikuyilalela; izandla zenu zigcwele igazi.

¹⁶ Gezani lihlambuluke, lisuse izenzo zenu ezimbi phambi kwami, liyekele ukwenza okubi,

¹⁷ lifunde ukwenza okuhle, lidinge okufaneleyo, lisize abacindezelweyo, livikele izintandane, limele umfelwakazi.

¹⁸ Wozanike, siqondisane, itsho iNkosi; loba izono zenu zibomvu gebhu, zizakuba mhlophe njengongqoqwane; loba zibomvu njengegazi, zizakuba mhlophe njengoboya bezimvu.

¹⁹ Uba livuma lilalela, lizakudla okuhle kwelizwe;

²⁰ kodwa uba lisala lihlamuka, lizadliwa ngomkhonto; ngoba iNkosi isikhulumile.

Ukwahlulelwa lokukhululwa kweZiyone

²¹ Yeka umuzi othembekileyo usuphenduke waba liwule, wona owawugcwele okufaneleyo! Ukulunga kwakuhlezi phakathi kwawo, kodwa khathesi sekuhlala ababulali.

²² Isiliva sakho, Jerusalema, sesiphenduke saba ngamanyele, lewayini lakho laxubana lamanzi.

²³ Izikhulu zakho zingabahlamuki labangane bamasela; zithanda ukwamukela umvuzo wokuthengwa, zigijimela izipho; kazivikeli izintandane, lendaba yomfelwakazi kayifinyeleli kuzo.

²⁴ Ngakho iNkosi yamabandla, uMninimandla wakoIsrayeli uthi: Ngizakwehlisela ulaka lwami phezu kwezitha zami, ngiziphindisele kwabamelana lami.

²⁵ Ngizaphakamisela isandla sami kuwe, ngitshise amanyele akho esithandweni somlilo, ngisuse yonke insimbi engelamsebenzi ekuwe.

²⁶ Ngizakukunika abathonisisi abafana lalabo bakuqala, labaluleki bakho abanjengabakuqala, andubana ubizwe ngokuthi ngumuzi wokulunga lomuzi othembekileyo.

²⁷ IZiyone izahlengwa ngokufaneleyo, labaphendukayo phakathi kwayo bahlengwe ngokuqonda.

²⁸ Kodwa abahlamuki lezoni bazabhujiswa kanyekanye, labadela iNkosi baqedwe.

²⁹ Lizakuba lenhloni ngezihlahla ezinkulu elalithokoza ngazo, linyukumale ngamasimu eliwakhethileyo.

³⁰ Ngoba lizakuba njengesihlahla esikhulu esilamahlamvu abunayo, libe njengensimu engelamanzi.

³¹ Abalamandla bazakuba njengezibi, lemisebenzi yabo ibe njengenhlansi; kuzakutsha konke kanyekanye kungabi khona okucimayo.