U-Ezra 1 - iBhayibhili Elingcwele 1978

Isimemezelo sikaKurosi

¹ Ngomnyaka wokuqala wokubusa kukaKurosi inkosi yasePerisiya, ukuba kugcwaliseke ilizwi leNkosi eyalikhuluma ngoJeremiya, iNkosi yavusa inhliziyo kaKurosi ukuba amemezele embusweni wakhe wonke, alobe futhi athi:

² Nanti ilizwi likaKurosi inkosi yasePerisiya, lithi: INkosi, uNkulunkulu ophezulu, enginikileyo yonke imibuso yomhlaba, ingilayile ukuyakhela indlu eJerusalema koJuda.

³ Kubo bonke abantu bayo abaphakathi kwenu ngithi uNkulunkulu kabe labo, kabahambe baye eJerusalema koJuda ukwakha indlu yeNkosi, uNkulunkulu kaIsrayeli, uNkulunkulu oseJerusalema.

⁴ Bonke abaseleyo, lakuziphi izindawo lapho abahlala khona, kabasizwe ngabantu bendawo yakibo ngesiliva legolide, langempahla, langenkomo, kanye leminikelo yesihle yethempeli eJerusalema.

Ukubuyela kwabaJuda eJerusalema

⁵ Kwasekusuka inhloko zezindlu zakoJuda lakoBenjamini, labapristi lamaLevi, labo bonke uNkulunkulu ayevuse inhliziyo zabo ukuba baye ukwakha ithempeli eJerusalema.

⁶ Bonke ababehlala labo babasiza ngokubanika izitsha zesiliva langegolide langempahla langenkomo langezipho ezinengi eziligugu, ngaphezu kwalokho okwakunikelwe ngesihle.

⁷ UKurosi inkosi yasePerisiya laye wakhupha izitsha zethempeli, uNebukadineza ayezithethe eJerusalema wazifaka endlini kankulunkulu wakhe.

⁸ UKurosi wazinika uMithiredathi umphathisikhwama owazibala wazinikeza kuSheshibazari isikhulu sakoJuda.

⁹ Yizo lezi impahla, imiganu yegolide engamatshumi amathathu, lemiganu yesiliva eyinkulungwane, lezinye izitsha ezingamatshumi amabili lesificamunwemunye,

¹⁰ lenkezo zegolide ezingamatshumi amathathu, lenkezo zesiliva ezingamakhulu amane letshumi, lezinye izitsha eziyinkulungwane.

¹¹ Zonke izitsha zegolide lezesiliva zazizinkulungwane ezinhlanu lamakhulu amane. Zonke lezi uSheshibazari wahamba lazo eJerusalema ekubuyeni kwabathunjiweyo bevela eBabiloni.