U-Esta 9 - iBhayibhili Elingcwele 1978

AbaJuda babulala izitha zabo

¹ Ngosuku lwetshumi lantathu lwenyanga yetshumi lambili ethiwa nguAdari safika isikhathi sokuba umlayo lomthetho wenkosi kwenziwe. Lolosuku izitha zabaJuda ezazithemba ukubanqoba ngalo kwaba yilo usuku abaJuda abanqoba ngalo labo ababebazonda.

² Ngalolosuku abaJuda bahlangana emizini yabo kuwo wonke amazwe enkosi uAhasuweru ukuba babulale labo ababebenzele icebo lokubachitha; kwakungekho loyedwa owayengamelana labo, ngoba bonke abantu babesaba.

³ Zonke izikhulu zamazwe lezikhulu lababusi lezinceku zenkosi basiza abaJuda, ngoba babemesaba uMoridekayi.

⁴ UMoridekayi wayesengumuntu omkhulu esigodlweni, lodumo lwakhe lwaselugcwele wonke amazwe ngokukhula kwamandla akhe.

⁵ Ngakho abaJuda bazibulala izitha zabo zonke ngomhedla, bazibhubhisa baziqeda, bazenzela ngokuthanda kulabo ababebazonda.

⁶ ESusa umuzi omkhulu abaJuda babulala baqeda abantu abangamakhulu amahlanu,

⁷ babulala loParishani‐Datha loDalifoni loAsiphatha

⁸ loPoratha loAdaliya loAridatha

⁹ loParimashita loArisayi loAridayi loVayizatha,

¹⁰ amadodana alitshumi kaHamani indodana kaMamedatha, isitha sabaJuda; kodwa kabayithathanga impango.

¹¹ Ngalona lolosuku inani lababulawayo eSusa umuzi omkhulu labikwa enkosini.

¹² Yathi kuEsta: ESusa umuzi omkhulu abaJuda sebebulele baqeda abantu abangamakhulu amahlanu lamadodana alitshumi kaHamani. Sebenzeni kwamanye amazwe enkosi na? Ngoba loba kuyini okunye okucelayo uzakukunikwa. Loba kuyini okunye okufunayo kuzakwenziwa.

¹³ UEsta wasephendula esithi: Uba kuyithokozisa inkosi lakusasa abaJuda abaseSusa kabavunyelwe ukwenza lokho okuvunywa ngumthetho lamhla; izidumbu zamadodana alitshumi kaHamani kazilengiswe ogodweni.

¹⁴ Inkosi yasikhupha ilizwi lokuthi lokhu kakwenziwe; kwasekukhutshwa umthetho eSusa, izidumbu zamadodana alitshumi kaHamani zalengiswa ogodweni.

¹⁵ AbaJuda baseSusa bahlangana futhi ngosuku lwetshumi lane lwenyanga ethiwa nguAdari, babulala abantu abangamakhulu amathathu eSusa; kodwa kabathathanga impango.

Umkhosi wePurimi

¹⁶ Abanye abaJuda basemazweni enkosi babehlangene ukuba bazivikele, bakhululwa ezitheni zabo, babulala abazinkulungwane ezingamatshumi ayisikhombisa lanhlanu kulabo ababazondayo; kodwa kabathathanga impango.

¹⁷ Lolo lwalulusuku lwetshumi lantathu lwenyanga ethiwa nguAdari; ngosuku lwetshumi lane baphumula, balwenza lwaba lusuku lwedili lokuthokoza.

¹⁸ Kodwa abaJuda baseSusa bahlangana ngosuku lwetshumi lantathu langosuku lwetshumi lane lwenyanga, baphumula ngosuku lwetshumi lanhlanu, balwenza lwaba lusuku lwedili lokuthokoza.

¹⁹ Yilokhu okwenza ukuba abaJuda abahlala emizini engabiyelwanga bagcine usuku lwetshumi lane lwenyanga ethiwa nguAdari, benze idili lokuthokoza, lube lusuku lokuphumula, banikane izipho zokudla.

²⁰ UMoridekayi waseziloba lezizinto, wathumela izincwadi kubo bonke abaJuda ababekiwo wonke amazwe enkosi uAhasuweru, abaseduze labakhatshana,

²¹ ebalayisisa ukuba bagcine usuku lwetshumi lane losuku lwetshumi lanhlanu lwenyanga ethiwa nguAdari iminyaka ngeminyaka,

²² ngoba ngalezonsuku abaJuda bazuza ukukhululwa ezitheni zabo, langaleyonyanga usizi lwabo lwaphendulwa lwaba yikuthokoza, lezikhathi zokulila zaba yizikhathi zokuphumula; bazigcine zibe zinsuku zedili lokuthokoza, lensuku zokuphana izipho zokudla, lezokupha abayanga.

²³ AbaJuda bakuvuma ukwenza lokho abasebekuqalile njengokutsho kwencwadi kaMoridekayi.

²⁴ Bakwenza lokho ngoba uHamani indodana kaHamedatha waseAgagi, isitha sabo bonke abaJuda, wayenze icebo lokubhubhisa abaJuda, wenza inkatho ethiwa yiPurimi eqonde ukubachoboza ababhubhise.

²⁵ Kodwa kwathi lapho lindaba ifika enkosini, yaloba umthetho ukuba icebo elibi likaHamani ayelenzele abaJuda lehlele phezu kwakhe; yena lamadodana akhe balengiswa ogodweni.

²⁶ Ngalokhoke lezinsuku zabizwa ngokuthi iPurimi ngebizo lenkatho ethiwa yiPurimi. Ngakhoke ngenxa yakho konke lokho okwakulotshiwe kulincwadi, langenxa yakho konke ababekubonile lalokho okwakubehlele ngalindaba,

²⁷ abaJuda bazimisela ukuba bona labantwana babo labo bonke abazihlanganisa labo kabayikuyekela ukugcina lezinsuku ezimbili, zibe ngumkhosi weminyaka ngeminyaka ngendlela emisiweyo langesikhathi esimisiweyo,

²⁸ lokuba lezinsuku zizakhunjulwa zigcinwe izizukulwana ngezizukulwana kuzo zonke izindlu lakuwo wonke amazwe lakuyo yonke imizi, lokuba lezinsuku zePurimi zingakhohlakali kibo bonke abaJuda, lokukhunjulwa kwazo kungapheli ebantwaneni babo.

²⁹ Inkosikazi uEsta, indodakazi kaAbihayili, yamnika amandla wonke uMoridekayi umJuda ngokugwala lincwadi ukuba aqinise incwadi yayo yesibili mayelana lePurimi.

³⁰ Incwadi ezifisela abaJuda ukuthula lenhlalo enhle zathunyelwa kubo bonke abaJuda emazweni enkosi uAhasuweru alikhulu lamatshumi ayisikhombisa,

³¹ ukuba lezinsuku zePurimi zigcinwe ngezikhathi zazo ezimisiweyo njengokumisa kukaMoridekayi umJuda; ngendlela efananayo bazimisela bona labantwana babo imithetho yokuzila leyokulila.

³² Umlayo kaEsta waqinisa limithetho mayelana lePurimi, walotshwa encwadini.