U-Esta 5 - iBhayibhili Elingcwele 1978

UEsta wenzela inkosi loHamani idili

¹ Ngosuku lwesithathu uEsta wagqoka izambatho zakhe zobukhosi, wema egumeni elingaphakathi kwesigodlo senkosi, wakhangelana laso isigodlo. Inkosi yayihlezi esihlalweni sayo sobukhosi esigodlweni ikhangele ngasemnyango.

² Kwathi lapho inkosi ibona inkosikazi uEsta imi egumeni, yathokoza ngaye, yamelulela intonga yobukhosi yegolide eyayiyiphethe. Wasesondela uEsta ethinta isihloko sentonga yobukhosi.

³ Inkosi yasisithi kuye: Kuyini, nkosikazi Esta? Ucelani kimi na? Uzanikwa loba kuyingxenye yombuso wami.

⁴ UEsta wasesithi: Uba kuyithokozisa inkosi, ngiyakucela wena kanye loHamani ukuba lize edilini esengikulungisele lona.

⁵ Inkosi yasikhupha ilizwi ukuthi uHamani kalandwe masinyane ukuze kwenziwe okufiswa nguEsta. Inkosi loHamani baya edilini ayeselilungisile uEsta.

⁶ Besanatha iwayini inkosi yathi kuEsta: Kukhona ofuna ukukucela kimi na? Uzakukunikwa. Kukhona okufisayo na? Loba kuyingxenye yombuso wami, kuzakwenziwa.

⁷ UEsta wathi: Engikucelayo lengikufisayo yilokhu;

⁸ uba ngifumene umusa emehlweni enkosi, futhi uba kukuhle enkosini ukunginika engikucelayo lengikufisayo, inkosi loHamani kabeze kusasa edilini engizakulenzela lona lina lobabili. Kusasa ngizakwenza lokho inkosi ekutshoyo.

Ukuziphakamisa kukaHamani lokuthukuthela kwakhe

⁹ UHamani wasehambake mhlalokho ethokoza elomoya omuhle. Kodwa lapho ebona uMoridekayi ekhona esigodlweni lokuthi kamsukumeli kamnanzi, wathukuthela kakhulu.

¹⁰ Kodwa wazithinta, waya ekhaya; wasebiza abangane bakhe loZereshi umkakhe,

¹¹ wabalandisela ngobunengi benotho yakhe langobunengi bamadodana akhe, langokuthi inkosi yamphakamisa yambeka esikhundleni esiphezu kwazo zonke ezinye izikhulu lenceku zenkosi.

¹² Wasesithi: Kakusikho lokhu kodwa, inkosikazi uEsta kayimemanga muntu ngaphandle kwami ukuba ngiphelekezele inkosi edilini elenzileyo; ungimemile futhi ukuba ngize lenkosi kusasa.

¹³ Kanti konke lokhu kakusilutho kimi nxa lokhu ngisabona loyana umJuda uMoridekayi elokhu esekhona esigodlweni.

¹⁴ UZereshi umkakhe labo bonke abangane bakhe bathi kuye: Akumbelwe ugodo ubude balo bube zingalo ezingamatshumi amahlanu, kucelwe enkosini ekuseni ukuba uMoridekayi alengiswe kulo, ubusuhamba lenkosi edilini ulomoya omuhle. UHamani wabona ukuthi lokhu kuhle, waselumbelake ugodo.