U-Eksodasi 40 - iBhayibhili Elingcwele 1978

Ukumiswa kweTabernakeli lokwahlukaniselwa kwalo

¹ INkosi yakhuluma kuMose

² yathi: Ngosuku lokuqala lwenyanga yokuqala uzakulimisa iTabernakeli lethente lokuhlangana,

³ ufake kulo umtshokotsho wobufakazi, usithe umtshokotsho ngeveli.

⁴ Ungenise itafula, uhlele izinto eziphezu kwayo; ungenise uluthi lwesibane, ufake izibane zalo.

⁵ Ubeke ialtare legolide lempepha phambi komtshokotsho wobufakazi, ulengise iveli lomnyango weTabernakeli.

⁶ Ubeke ialtare lomnikelo wokutshiswa phambi komnyango weTabernakeli lethente lokuhlangana,

⁷ ubeke umkolo phakathi kwethente lokuhlangana lealtare, uthele kuwo amanzi.

⁸ Umise iguma inxa zonke, ulengise iveli lomnyango weguma.

⁹ Uthathe amagcobo okugcoba, ugcobe iTabernakeli lakho konke okukulo, ulahlukanisele kanye lempahla yalo yonke, libe ngcwele.

¹⁰ Ugcobe ialtare lomnikelo wokutshiswa lezinto zalo zonke, ulahlukanisele ialtare libe ngcwele kakhulu.

¹¹ Ugcobe umkolo lenyawo zawo, uwahlukanisele.

¹² Ng’khona uzakuletha uAroni lamadodana akhe emnyango wethente lokuhlangana, ubagezise ngamanzi.

¹³ Wambathise uAroni izambatho ezingcwele, umgcobe, umahlukanisele ukuba abe ngumpristi wokuphatha umsebenzi wami.

¹⁴ Ulethe amadodana akhe, uwambathise amabhatshi,

¹⁵ uwagcobe njengalokhu ugcobile uyise, ukuba abe ngabapristi bokuphatha umsebenzi wami; ukugcotshwa kwabo kuzakuba kubo ubupristi obungapheliyo kuzo zonke izizukulwana zabo.

¹⁶ UMose wakwenza konke njengokutsho kweNkosi.

¹⁷ Kwathi ngosuku lokuqala lwenyanga yokuqala ngomnyaka wesibili iTabernakeli lamiswa.

¹⁸ UMose walimisa iTabernakeli; wabeka phansi inyawo zalo, wamisa amapulanka alo, wafaka imithando yalo, wamisa lensika zalo.

¹⁹ Wendlala ithente phezu kweTabernakeli, wabeka isifulelo sethente phezu kwalo, njengokutsho kweNkosi kuMose.

²⁰ Wathatha ubufakazi, wabufaka emtshokotshweni, wafaka imijabo emtshokotshweni lesihlalo somusa phezu komtshokotsho.

²¹ Wangenisa umtshokotsho eTabernakelini, wamisa iveli elilikhetheni ukuba asithe umtshokotsho wobufakazi, njengokutsho kweNkosi kuye.

²² Wafaka itafula ethenteni lokuhlangana, ohlangothini lweTabernakeli olungasenyakatho phandle kweveli,

²³ walungisa isinkwa phezu kwayo phambi kweNkosi, njengokutsho kweNkosi kuye.

²⁴ Wangenisa uluthi lwesibane ethenteni lokuhlangana, maqondana letafula ohlangothini olungaseningizimu.

²⁵ Wabeka izibane phambi kweNkosi, njengokutsho kweNkosi kuye.

²⁶ Wafaka ialtare legolide ethenteni lokuhlangana phambi kweveli,

²⁷ watshisa kulo impepha yamakha amahle, njengokutsho kweNkosi kuye.

²⁸ Walengisa iveli lomnyango weTabernakeli.

²⁹ Wabeka ialtare lomnikelo wokutshiswa ngasemnyango weTabernakeli lethente lokuhlangana, wanikela kulo umnikelo wokutshiswa lomnikelo wempuphu, njengokutsho kweNkosi kuye.

³⁰ Wabeka umkolo phakathi kwethente lokuhlangana lealtare, wathela kuwo amanzi okugeza.

³¹ UMose loAroni lamadodana akhe bagezela kuwo izandla lenyawo zabo;

³² nxa bengena ethenteni lokuhlangana lanxa besondela ealtareni babegeza, njengokutsho kweNkosi kuye.

³³ Walungisa iguma lazingelezela iTabernakeli lealtare, walengisa iveli lomnyango weguma. UMose wasewuqeda umsebenzi.

Iyezi laliphezu kweTabernakeli

³⁴ Iyezi laselisibekela ithente lokuhlangana, inkazimulo yeNkosi yagcwalisa iTabernakeli.

³⁵ UMose wayengalakungena ethenteni lokuhlangana, ngoba iyezi lahlala phezu kwalo lenkazimulo yeNkosi yagcwalisa iTabernakeli.

³⁶ Ekuhambeni kwabo konke kwakuthi lapho iyezi lisuka phezu kweTabernakeli, abakoIsrayeli baqhubekela phambili,

³⁷ kodwa lapho iyezi lingasukanga, babengahambi kuze kufike usuku lokusuka kwalo.

³⁸ Ngoba ekuhambeni kwabo konke indlu yonke yakoIsrayeli yalibona iyezi leNkosi liphezu kweTabernakeli emini, lomlilo ukulo ebusuku.