U-Eksodasi 38 - iBhayibhili Elingcwele 1978

Ukwenziwa kwealtare lomnikelo wokutshiswa

¹ Wenza ialtare lomnikelo ngesihlahla somvagazi, ubude balo babuzingalo ezinhlanu lobubanzi balo babuzingalo ezinhlanu, lilingana inxa zonke, ukudepha kwalo kwakuzingalo ezintathu.

² Walenzela impondo engonsini zalo zozine, ukuba lona lempondo zalo kube yintonye; walibhada ngethusi.

³ Wenza zonke izinto zealtare, izimbiza lamafotsholo lemiganu yokuchela lamafolokwe lezitsha zokuthwala umlilo, wazenza zonke ngetliusi.

⁴ Walenzela ialtare isihlengo sethusi esenziwe njengembule, wasifaka ngaphansi komphetho, sehla saze safinyelela phakathi kwalo.

⁵ Walikhandela amasongo amane engonsini zozine zesihlengo sethusi ukuba abe zindawo zemijabo.

⁶ Wayenza imijabo ngesihlahla somvagazi, wayibhada ngethusi.

⁷ Wayifaka imijabo emasongweni asenhlangothini zealtare ukuba lithwalwe ngayo; walenza ngamapulanka, lafana lomkolo.

⁸ Wenza umkolo ngethusi, lenyawo zawo ngethusi; wakwenza ngezibuko zabesifazana abakhonza ngasemnyango wethente lokuhlangana.

Ukwenziwa kweguma leTabernakeli

⁹ Wenza leguma; ohlangothini olungaseningizimu kwakukhona amakhetheni elembu elihle lentambo ephothiweyo, ubude bawo babuzingalo ezilikhulu;

¹⁰ insika zawo ezingamatshumi amabili lenyawo zawo ezingamatshumi amabili zazingezethusi, ingwegwe zenzika lezibopho zazo zazingezesiliva.

¹¹ Kwakukhona ohlangothini olungasenyakatho amakhetheni, ubude bawo babuzingalo ezilikhulu, insika zawo ezingamatshumi amabili zazingezethusi, ingwegwe zensika lezibopho zazo zazingezesiliva.

¹² Ohlangothini olungasentshonalanga kwakukhona amakhetheni, ubude bawo babuzingalo ezingamatshumi amahlanu, kanye lensika ezilitshumi lenyawo ezilitshumi; ingwegwe zensika lezibopho zazo zazingezesiliva.

¹³ Ohlangothini olungasempumalanga ubude bawo babuzingalo ezingamatshumi amahlanu.

¹⁴ Kwelinye icele lomnyango kwakukhona amakhetheni, ubude bawo babuzingalo ezilitshumi lanhlanu, kanye lensika ezintathu lenyawo ezintathu;

¹⁵ kwakunjalo lakwelinye icele; kwakukhona ngapha langapha komnyango weguma amakhetheni, ubude bawo babuzingalo ezilitshumi lanhlanu, kanye lensika ezintathu lenyawo ezintathu.

¹⁶ Wonke amakhetheni eguma ayengawelembu elihle lentambo ephothiweyo.

¹⁷ Inyawo zensika zazingezethusi, ingwegwe lezibopho zazo zingezesiliva, zonke insika zeguma zazilesibopho sesiliva.

¹⁸ Iveli lomnyango weguma lalenziwe ngumthungi ngelembu eliluhlaza leliyibubende lelibomvu lelembu elihle lentambo ephothiweyo; ubude balo babuzingalo ezingamatshumi amabili, ukuphakama kwalo kwaba zingalo ezinhlanu ukuba lilingane lamakhetheni eguma.

¹⁹ Insika zawo ezine lenyawo zawo ezine zazingezethusi, ingwegwe zawo zazingezesiliva, inhloko zawo lezibopho zazibhadwe ngesiliva.

²⁰ Zonke izikhonkwane zeTabernakeli lezeguma inxa zonke zazingezethusi.

Imali eyachithwayo ngawo wonke umsebenzi

²¹ Lokhu kuyimali yezinto zeTabernakeli, iTabernakeli lobufakazi; njengokubalwa kwayo ngokulayeza kukaMose ngomsebenzi wamaLevi, bephathwa ngulIthamari indodana kaAroni umpristi.

²² UBezaleli indodana kaUri indodana kaHuri owesizwe sakoJuda wakwenza konke njengalokho iNkosi ebimlayile uMose;

²³ wayeloOholiyaba indodana kaAhisamaki owesizwe sakoDani, umbhali wamatshe, lengcitshi, lomthungi welembu elihle lentambo ephothiweyo eluhlaza leyibubende lebomvu.

²⁴ Igolide lomnikelo elasetshenziswa emsebenzini wonke wendlu engcwele lalingamathalenta angamatshumi amabili lesificamunwemunye lamashekeli angamakhulu ayisikhombisa lamatshumi amathathu ngokweshekeli lendlu engcwele.

²⁵ Isiliva sabantu ababebalwa sasingamathalenta alikhulu lamashekeli ayinkulungwane lamakhulu ayisikhombisa lamatshumi ayisikhombisa lanhlanu ngokweshekeli lendlu engcwele;

²⁶ omunye lomunye owayebalwa oleminyaka engamatshumi amabili langaphezulu, wanikela ingxenye yeshekeli lendlu engcwele; babezinkulungwane ezingamakhulu eziyisithupha lantathu, lamakhulu amahlanu lamatshumi amahlanu.

²⁷ Amathalenta alikhulu esiliva ayengowokukhanda inyawo zendlu engcwele lenyawo zeveli, kwasetshenziswa amathalenta alikhulu ngenyawo ezilikhulu, ithalenta linye ngonyawo lunye.

²⁸ Amashekeli ayinkulungwane lamakhulu ayisikhombisa lamatshumi ayisikhombisa lanhlanu ayesetshenziswa ukwenza ingwegwe zensika, lokubhada inhloko zazo lokwenza izibopho zazo.

²⁹ Ithusi lomnikelo lalingamathalenta angamatshumi ayisikhombisa lamashekeli ezinkulungwane ezimbili lamakhulu amane.

³⁰ Wenza ngalo inyawo zomnyango wethente lokuhlangana, lealtare lethusi, lesihlengo salo sethusi, lezinto zonke zealtare,

³¹ lenyawo zeguma inxa zonke, lenyawo zomnyango weguma, lazo zonke izikhonkwane zeTabernakeli, lezikhonkwane zonke zeguma inxa zonke.