U-Eksodasi 36 - iBhayibhili Elingcwele 1978

¹ UBezaleli loOholiyaba bazasebenza, labo bonke abahlakaniphileyo iNkosi ebanike ukuhlakanipha lokuqedisisa ukuba bazi ukwenza yonke imisebenzi yokwakha indlu engcwele njengokulaya konke kweNkosi.

Ukwakhiwa kweTabernakeli

² UMose wasebiza uBezaleli loOholiyaba labo bonke abahlakaniphileyo abanikwa ukuhlakanipha yiNkosi, abathunywa zinhliziyo zabo ukuze baye ukwenza umsebenzi;

³ bamukela kuMose wonke umnikelo wesihle, abantu bakoIsrayeli ababewulethe ukwenza umsebenzi wokwakha indlu engcwele. Babeletha kuye iminikelo yesihle insuku ngensuku ekuseni.

⁴ Bonke abahlakaniphileyo ababesenza imisebenzi yonke yendlu engcwele beza, bonke bevela emisebenzini abayenzayo,

⁵ bathi kuMose: Abantu bayaletha okunengi kakhulu ukwedlula okwanele ukwenza umsebenzi iNkosi esilaya ukuba siwenze.

⁶ UMose wasebalayezela ukuba kumenyezelwe kuzo zonke izihonqo ukuthi: Kakungabe kusenziwa lutho futhi ngomnikelo wendlu engcwele. Ngakho abantu basebevaleleka ukuba balethe umnikelo;

⁷ ngoba lokho ababelakho kwasekwanele ukuwenza umsebenzi wonke kwaze kwasala.

⁸ Bonke abahlakaniphileyo phakathi kwalabo ababesebenza balenza iTabernakeli ngamaveli alitshumi; bawenza ngelembu elihle lentambo ephothiweyo eluhlaza leyibubende lebomvu, aba lamakherubi awenziwe ngumuntu oyingcitshi.

⁹ Ubude balelo lalelo iveli babuzingalo ezingamatshumi amabili lesificaminwembili, ububanzi balo babuzingalo ezine; wonke amaveli ayelingene.

¹⁰ Wahlanganisa amaveli amahlanu elinye lelinye, lamaveli amanye amahlanu elinye lelinye.

¹¹ Wenza izihitshela ngokuluhlaza emphethweni weveli elisekucineni kwamaveli amahlanu, baphinda benze njalo emphethweni weveli elisekucineni kwamanye amaveli amahlanu.

¹² Wenza izihitshela ezingamatshumi amahlanu kwelinye iveli, lezihitshela ezingamatshumi amahlanu emphethweni weveli elinye, izihitshela zazikhangelene.

¹³ Wenza ingwegwe zegolide ezingamatshumi amahlanu, bahlanganisa amaveli elinye lelinye ngengwegwe; ngalokhu iTabernakeli laba linye.

¹⁴ Wenza amaveli ngoboya bembuzi abe lithente phezu kweTabernakeli, aba ngamaveli alitshumi lanye.

¹⁵ Ubude balelo lalelo iveli babuzingalo ezingamatshumi amathathu, ububanzi beveli babuzingalo ezine; wonke amaveli alitshumi lanye ayelingene.

¹⁶ Wahlanganisa amaveli amahlanu wodwa, lamaveli ayisithupha wodwa.

¹⁷ Wenza izihitshela ezingamatshumi amahlanu emphethweni weveli elisekucineni kwamaveli amahlanu, lezihitshela ezingamatshumi amahlanu emphethweni weveli elisekucineni kwamanye amaveli ayisithupha.

¹⁸ Wenza ingwegwe zethusi ezingamatshumi amahlanu ukuba ithente lihlanganiswe libe linye.

¹⁹ Wenza isifulelo sethente ngezikhumba ezibomvu zenqama langezinzwezwe.

²⁰ Wenza amapulanka emiyo eTabernakelini ngesihlahla somvagazi;

²¹ ubude besigodo babuzingalo ezilitshumi lobubanzi besigodo babuyingalo lengxenye.

²² Wonke amapulanka ayelemisuka emibili yokuhlanganisa; wenza njalo kuwo wonke amapulanka eTabernakelini.

²³ Wenza amapulanka eTabernakelini, amapulanka angamatshumi amabili ohlangothini lwaseningizimu;

²⁴ wenza inyawo ezingamatshumi amane zesiliva ngaphansi kwamapulanka angamatshumi amabili, inyawo ezimbili ngaphansi kwepulanka linye zibe ngezemisuka yalo yomibili, lenyawo ezimbili ngaphansi kwelinye ipulanka zibe ngezemisuka yalo yomibili;

²⁵ wenza amapulanka angamatshumi amabili ohlangothini lwesibili lweTabernakeli, uhlangothi lwasenyakatho,

²⁶ kanye lenyawo zawo ezingamatshumi amane zesiliva, inyawo ezimbili ngaphansi kwepulanka elinye lenyawo ezimbili ngaphansi kwelinye ipulanka.

²⁷ Wenza amapulanka ayisithupha ohlangothini olungasemuva ngasentshonalanga,

²⁸ lamapulanka amabili ukuba abe yizingosi zeTabernakeli ngasemuva;

²⁹ womabili ahlanganiswa ngaphansi langaphezulu esongweni lokuqala ukuba abe yizingonsi ezimbili.

³⁰ Kwakulamapulanka aficaminwembili lenyawo zawo zesiliva ezilitshumi lesithupha, inyawo ezimbili ngaphansi kwepulanka elinye lelinye.

³¹ Wenza imithando ngesihlahla somvagazi, imithando emihlanu yaba ngeyamapulanka ohlangothi olunye lweTabernakeli

³² lemithando emihlanu yaba ngeyamapulanka ohlangothi olunye lweTabernakeli, lemithando emihlanu yaba ngeyamapulanka ohlangothi olungasemuva ngasentshonalanga.

³³ Umthando waphakathi wawenza ukuba udabule phakathi kwamapulanka uze ufinyelele ekucineni inxa zombili.

³⁴ Wabhada amapulanka ngegolide, wawenzela amasongo egolide ukuba athwale imithando, wayibhada imithando ngegolide.

³⁵ Wenza iveli lelembu elihle lentambo ephothiweyo eluhlaza leyibubende lebomvu, laba lamakherubi, kwaba ngumsebenzi wengcitshi.

³⁶ Walenzela iveli insika ezine ngesihlahla somvagazi, wazibhada ngegolide; ingwegwe zazo zenziwa ngegolide; wazikhandela inyawo ezine zesiliva.

³⁷ Wenza iveli lomnyango wethente ngelembu eliluhlaza leliyibubende lelibomvu, ngelembu elihle lentambo ephothiweyo, umsebenzi womthungi;

³⁸ walenzela insika ezinhlanu lengwegwe zazo; wabhada izihloko zazo lezibopho zazo ngegolide; inyawo zazo ezinhlanu zazingezethusi.