U-Eksodasi 35 - iBhayibhili Elingcwele 1978

Umthetho weSabatha

¹ UMose wasebuthanisa lonke ibandla labakoIsrayeli, wathi kulo: Yilokhu iNkosi elilaye khona ukuba likwenze.

² Kuzasetshenzwa insuku eziyisithupha, kodwa usuku lwesikhombisa luzakuba lusuku olungcwele kini, lube liSabatha lokuphumula leNkosi; lowo osebenza ngalo uzakubulawa.

³ Lingabasi umlilo ngeSabatha kuyo yonke imizi yenu.

Ukunikela umnikelo eNkosini

⁴ UMose wasekhuluma kilo lonke ibandla lakoIsrayeli, wathi: Yilokhu iNkosi ekulayileyo isithi:

⁵ Thathelani iNkosi umnikelo phakathi kwenu; lowo ovumayo kalethe umnikelo eNkosini, igolide lesiliva lethusi,

⁶ lelembu eliluhlaza leliyibubende lelibomvu, lelembu elihle, loboya bembuzi,

⁷ lezikhumba ezibomvu zezinqama, lezinzwezwe, lezihlahla zomvagazi,

⁸ lamafutha ezibane, lamakha amagcobo okugcoba lempepha elephunga elimnandi,

⁹ lamatshe athiwa amaonikse, lamatshe okubekwa engutsheni yamahlombe leyesifuba.

Izinto zeTabernakeli

¹⁰ Bonke abahlakaniphileyo kabasuke benze lokho iNkosi ekutshiloyo;

¹¹ iTabernakeli lethente lalo, lesifulelo salo, lengwegwe zalo, lamapulanka alo, lemithando yalo, lensika zalo, lenyawo zalo;

¹² lomtshokotsho lemijabo yawo, lesihlalo somusa, leveli elilikhetheni;

¹³ letafula lemijabo yayo, lezitsha zayo zonke, lezinkwa ezahlukaniselwe iNkosi;

¹⁴ loluthi lwesibane sokukhanyisa, lezitsha zalo, lezibane zalo, lamafutha okukhanyisa;

¹⁵ lealtare yempepha, lemijabo yalo, lamagcobo okugcoba, lempepha elephunga elimnandi, leveli lomnyango ngasemnyango weTabernakeli;

¹⁶ ialtare lomnikelo wokutshiswa kanye lesihlengo salo sethusi, lemijabo yalo, lazo zonke izitsha zalo, lomkolo lenyawo zawo;

¹⁷ amakhetheni eguma, lensika zalo, lenyawo zalo, leveli lesango leguma;

¹⁸ lezikhonkwane zeTabernakeli, lezikhonkwane zeguma lentambo zazo;

¹⁹ lezambatho ezenziwe kuhle zokukhonza endaweni engcwele, izambatho ezingcwele zikaAroni umpristi, lezambatho zamadodana akhe, ukuba babe ngabapristi bokuphatha umsebenzi wami.

Abantu banikela umnikelo wabo

²⁰ Lonke ibandla labakoIsrayeli laselisuka kuMose.

²¹ Beza bonke abathunywa zinhliziyo zabo, abathunywa ngumoya wabo, baletha umnikelo wokunikela eNkosini, ube ngowomsebenzi wethente lokuhlangana lowenkonzo yonke yalo lowezambatho ezingcwele.

²² Bezake abesilisa labesifazana, bonke abavumayo, beletha iziceco lamacici lendandatho lamasongo, zonke izinto zegolide; bonke banikela into yegolide eNkosini.

²³ Bonke ababelamalembu aluhlaza layibubende labomvu lamalembu amahle loboya bembuzi lezikhumba zenqama ezibomvu lezinzwezwe bakuletha.

²⁴ Bonke ababelento yesiliva leyethusi baziletha ukuba bazinikele eNkosini; labo bonke ababelezigodo zomvagazi ezingasetshenziswa emsebenzini baziletha.

²⁵ Bonke abesifazana ababehlakaniphile baphotha ngezandla zabo, baletha okuphothiweyo kwelembu eliluhlaza leliyibubende lelibomvu lelembu elihle.

²⁶ Labo bonke abesifazana ababelolwazi abathunywa zinhliziyo zabo baphotha uboya bembuzi.

²⁷ Lezinduna zaletha amatshe athiwa amaonikse lamatshe amahle okubekwa engutsheni zamahlombe lasengutsheni zesifuba,

²⁸ lamakha, lamafutha esibane lawokugcoba lawempepha elephunga elimnandi.

²⁹ AbakoIsrayeli baletha umnikelo wesihle eNkosini; bonke abesilisa labesifazana ababethunywa zinhliziyo zabo bawuletha ukuba ube ngowomsebenzi iNkosi eyayilaye uMose ngawo ukuze wenziwe.

Ukubizwa kukaBezaleli loOholiyaba

³⁰ UMose wasesithi ebantwini bakoIsrayeli: INkosi imkhethile uBezaleli indodana kaUri, indodana kaHuri owesizwe sakoJuda;

³¹ imgcwalisile ngomoya kaNkulunkulu ukuba abe lokuhlakanipha lokuqedisisa lokwazi lamandla okwenza yonke imisebenzi,

³² lokuba aqambe imisebenzi yobungcitshi, asebenze ngegolide langesiliva langethusi,

³³ lokuba abaze amatshe okufakwa, abaze njalo izigodo, enze yonke imisebenzi yobungcitshi.

³⁴ Imnikile amandla okufundisa, yena loOholiyaba indodana kaAhisamaki owesizwe sakoDani.

³⁵ Ibagcwalisile ngokuhlakanipha ukuba benze imisebenzi yonke yombazi wamatshe, leyengcitshi, leyomthungi othunga ilembu eliluhlaza leliyibubende lelibomvu lelembu elihle, leyomaluki; benze imisebeni yonke loba yiyiphi leyabaqamba imisebenzi yobungcitshi.