U-Eksodasi 34 - iBhayibhili Elingcwele 1978

Amanye amatshe amabili

¹ INkosi yathi kuMose: Baza amanye amatshe amabili anjengawakuqala; ngibhale kuwo amazwi ayesematsheni akuqala owawaphahlazayo.

² Ekuseni ubusulungile, ukhwele entabeni yaseSinayi, uze phambi kwami engqongeni yentaba.

³ Kungakhweli muntu kanye lawe, kungabonakali muntu kuyo yonke intaba; ungayekeli izimvu lezinkomo zalukele phambi kwaleyontaba.

⁴ UMose wasebaza amatshe amabili anjengawakuqala; wavuka ekuseni, wakhwela entabeni yaseSinayi, njengokutsho kweNkosi, ephethe amatshe amabili.

⁵ INkosi yehla ngeyezi, yema laye khona, yamemeza ibizo layo.

⁶ INkosi yedlula phambi kwakhe, yamemeza yathi: YiNkosi! YiNkosi! nguNkulunkulu olesihawu olomusa, ophuza ukuthukuthela, ogcwele uthando olungapheliyo lobuqotho,

⁷ ohawukela abayizigidi, othethelela ububi leziphambeko lezono, kodwa ongayikubayekela abalecala, kodwa owehlisela ububi baboyise phezu kwabantwana laphezu kwabantwana babantwana abesizukulwana sesithathu lesesine.

⁸ UMose waphangisa, wakhothamela phansi, wadumisa.

⁹ Wathi: Uba ngifumene umusa emehlweni akho, Nkosi, ake uhambe phakathi kwethu, lanxa lababantu bengabanhliziyo zilukhuni, usithethelele ububi bethu lokona kwethu, usithathe sibe yilifa lakho.

¹⁰ Yasisithi: Khangela, sengisenza isivumelwano; phambi kwabantu bonke bakini ngizakwenza izimangaliso ezingazanga zenziwe emhlabeni wonke lakusiphi isizwe; bonke abantu ophakathi kwabo bazakubona umsebenzi weNkosi, ngoba kuyinto eyesabekayo engizakuyenza.

¹¹ Qaphelisa lokho engikulaya khona lamhla; ngizakuxotsha phambi kwakho amaAmori lamaKanani lamaHethi lamaPerizi lamaHivi lamaJebusi.

¹² Kodwaqaphela ukuba ungenzi isivumelwano labahlala elizweni oya kulo, funa sibe yisifu kuwe.

¹³ Lizadiliza ama‐altare abo, libulale insika zabo zokukhonzela, ligamule insika zabo ezimiselwe unkulunkulukazi uAshera;

¹⁴ ngoba kawuzukukhonza omunye unkulunkulu; iNkosi inguNkulunkulu olomona, ibizo layo linguMona.

¹⁵ Ngakho ungenzi isivumelwano labahlala elizweni, ukuze ukuthi nxa bephinga labonkulunkulu babo, behlabele onkulunkulu babo, lomunye akumeme, ungadli laye umhlatshelo;

¹⁶ ungawathatheli amadodana akho amadodakazi abo; ngoba lapho amadodakazi abo ephinga labonkulunkulu babo, azakwenza amadodana akho ukuba aphinge kanye lawo.

¹⁷ Ungazenzeli onkulunkulu ababunjiweyo.

¹⁸ Ugcine umkhosi wesinkwa esingelamvubelo; njengokukulaya kwami udle isinkwa esingelamvubelo insuku eziyisikhombisa ngesikhathi esimisiweyo senyanga kaAbibi, ngoba ngenyanga kaAbibi waphuma eGibithe.

¹⁹ Konke okuvula isizalo kungokwami, lawo wonke amazibulo amaduna enkomo lawezimvu.

²⁰ Izibulo likababhemi ulihlenge ngezinyane; uba ungalihlengi ulephule intamo. Wonke amazibulo amadodana akho uzawahlenga; kungezi muntu phambi kwami engaphethe lutho.

²¹ Sebenza insuku eziyisithupha, kodwa uphumule ngosuku lwesikhombisa, langesikhathi sokulima lesokuvuna.

²² Uzakugcina umkhosi wamaviki owokuvunwa kwamabele akho akuqala, lomkhosi wokuvuna kwasekupheleni komnyaka.

²³ Kathathu ngomnyaka bonke abesilisa bazakuza phambi kweNkosi uNkulunkulu, uNkulunkulu kaIsrayeli.

²⁴ Ngoba ngizaxotsha izizwe phambi kwakho, ngandise imikhawulo yelizwe lakho; kakuyikuba lamuntu ofisa ilizwe lakho lapho wenyuka ukuyabonakala phambi kweNkosi uNkulunkulu wakho kathathu ngomnyaka.

²⁵ Unganikeli igazi lomhlatshelo wami kanye lesinkwa esilemvubelo; futhi kakungasali kuze kuse umhlatshelo womkhosi wePhasika.

²⁶ Ikhethelo lezithelo zakuqala zamasimu akho ulilethe endlini yeNkosi uNkulunkulu wakho. Ungapheki izinyane ngochago lukanina.

²⁷ INkosi yathi kuMose: Loba lamazwi, ngoba ngawo ngenzile isivumelwano lawe loIsrayeli.

²⁸ Wayekhona leNkosi insuku ezingamatshumi amane lobusuku obungamatshumi amane engadli enganathi. Wawaloba ematsheni amazwi esivumelwano, imithetho elitshumi.

UMose wehla entabeni

²⁹ Kwathi uMose esehla entabeni yaseSinayi ephethe amatshe amabili obufakazi, wayengazi ukuthi isikhumba sobuso bakhe siyakhazimula ngenxa yokuthi wayekade ekhuluma loNkulunkulu.

³⁰ UAroni labantu bakoIsrayeli bebona ukuthi isikhumba sobuso bakhe sasikhazimula, besaba ukusondela kuye.

³¹ Ngakho uMose wababiza; uAroni lazo zonke induna zabantu beza kuye; uMose wasekhuluma labo.

³² Emva kwalokho basondela bonke abakoIsrayeli; wabanika ngemilayo konke iNkosi eyayikutshilo kuye entabeni yaseSinayi.

³³ UMose eseqedile ukukhuluma labo, wambomboza ubuso bakhe ngeveli.

³⁴ Kodwa lapho uMose engena phambi kweNkosi ukuba akhulume layo, wayelisusa iveli aze aphume; ekuphumeni kwakhe wayebatshela abakoIsrayeli lokho akulayiweyo,

³⁵ labakoIsrayeli babebona ukuthi isikhumba sobuso bakhe siyakhazimula; abesephinda embomboza ubuso bakhe ngeveli aze angene futhi ukuyakhuluma layo.