U-Eksodasi 33 - iBhayibhili Elingcwele 1978

AbakoIsrayeli balaywa ukuba basuke eSinayi

¹ INkosi yathi kuMose: Khuphuka lapha wena labantu owabakhupha elizweni laseGibithe, uye elizweni engalifungela kuAbrahama lakuIsaka lakuJakobe ngathi: Inzalo yakho ngizakuyinika lona.

² Ngizakuthuma isithunywa phambi kwakho, ngixotshe amaKanani lamaAmori lamaHethi lamaPerizi lamaHivi lamaJebusi.

³ Uye elizweni eligcwele uchago lenyosi; kodwa kangiyikuhamba lani funa ngiliqede endleleni, ngoba lingabantu abanhliziyo zilukhuni.

⁴ Kwathi lapho abantu sebewazwile lamazwi adabukisayo, bakhala; kakubanga lamuntu owafaka izigqizo zakhe;

⁵ ngoba iNkosi yathi kuMose: Tshono ebantwini bakoIsrayeli uthi: Lingabantu abanhliziyo zilukhuni; uba ngihamba lani okwesikhathi nje, ngizaliqeda. Ngakhoke khuphani izigqizo zenu ukuba ngibone ukuthi ngizakwenzani kini.

⁶ Ngakhoke abantu bakoIsrayeli bazihlubula izigqizo zabo kusukela entabeni yaseHorebe.

Ithente lokuhlangana

⁷ UMose wayejwayele ukuthatha ithente alimise ngaphandle kwezihonqo, khatshana lazo; walibiza ngokuthi lithente lokuhlangana. Bonke ababedinga iNkosi baphuma baya ethenteni lokuhlangana elingaphandle kwezihonqo.

⁸ Kwakuya kuthi lapho uMose ephuma ukuya ethenteni, bonke abantu basukume beme, kube yilowo lalowo emnyango wethente lakhe; bamjolozele uMose aze angene ethenteni;

⁹ kuthi lapho uMose esengena ethenteni, insika yeyezi yehle, ime ngasemnyango wethente; iNkosi ibisikhuluma kuMose.

¹⁰ Kuthi bonke abantu lapho beyibona insika yeyezi imi ngasemnyango wethente, basukume, badumise, kube yilowo lalowo eme emnyango wethente lakhe.

¹¹ Ngaleyondlela iNkosi yayikhuluma kuMose ikhangelene laye, njengomuntu ekhuluma lomngane wakhe. Lapho uMose esebuyele ezihonqweni, inceku yakhe uJoshuwa oyinsizwa, indodana kaNuni, kasukanga ethenteni.

INkosi yathembisa ukuhamba loMose

¹² UMose wathi eNkosini: Khangela, uthi kimi: Khupha lababantu; kodwa kawungitshengisanga ukuthi uzakuthuma ubani ukuba ahambe lami. Kodwa uthe: Ngiyakwazi ngebizo, futhi ufumene umusa emehlweni ami.

¹³ Ngakhoke uba ngifumene umusa emehlweni akho, ngitshengisa indlela zakho khathesi, ukuba ngikwazi, ngifumane umusa emehlweni akho; khumbula futhi ukuthi isizwe lesi singabantu bakho.

¹⁴ Yasisithi: Mina uqobo ngizahamba lawe, ngikuphumuze.

¹⁵ Wathi kuyo: Uba wena uqobo ungahambi lami, ungasisusi lapha.

¹⁶ Ngoba kuzakwaziwa kanjani ukuthi ngifumene umusa emehlweni akho, mina labantu bakho na? Kakwaziwa yini ngokuhamba kwakho lathi ukuze mina labantu bakho sahlukaniswe kubo bonke abantu abasemhlabeni na?

¹⁷ INkosi yathi kuMose: Ngizakwenza lalokhu okutshoyo, ngoba ufumene umusa emehlweni ami, ngiyakwazi ngebizo.

¹⁸ UMose wathi: Ngitshengisa inkazimulo yakho.

¹⁹ Yathi: Ngizadlulisa phambi kwakho bonke ubuhle bami, ngimemezele ibizo leNkosi phambi kwakho. Ngizamhawukela lowo engithanda ukumhawukela, ngibe lomusa kulowo engithanda ukuba lomusa kuye.

²⁰ Yathi futhi: Ungebone ubuso bami; ngoba kakho umuntu ongangibona, aphile.

²¹ INkosi yathi: Nansi indawo phansi kwami lapho uzakuma khona edwaleni;

²² kuzakuthi lapho inkazimulo yami isedlula, ngizakukufaka esikhexeni sedwala, ngikusithe ngesandla sami ngize ngidlulele phambili;

²³ besengisusa isandla sami ukuba ubone umhlane wami; kodwa ubuso bami kabuyikubonwa.