U-Eksodasi 32 - iBhayibhili Elingcwele 1978

Ithole legolide

¹ Abantu sebebonile ukuthi uMose ulibele ukwehla entabeni, babuthana kuAroni bathi kuye: Suka, usenzele onkulunkulu abazakuhamba phambi kwethu; ngoba uMose lowo, umuntu owasikhupha elizweni laseGibithe, kasazi ukuthi wehlelwe yini.

² UAroni wathi kubo: Khumulani amacici egolide asendlebeni zabomkenu lezamadodana lezamadodakazi enu, liwalethe kimi.

³ Bonke abantu bakhumula amacici ayesendlebeni zabo, bawaletha kuAroni.

⁴ Walamukela igolide kibo, walikhanda wenza ngalo ithole elikhandiweyo, bathi: Nangu unkulunkulu wakho, Israyeli, okukhuphe elizweni laseGibithe.

⁵ UAroni eselibonile wakha ialtare phambi kwalo; wamemezela wathi: Kusasa kuzakuba khona umkhosi weNkosi.

⁶ Abantu bavuka ekuseni, banikela iminikelo yokutshiswa, baletha iminikelo yokuthula; bahlala phansi ukuba badle banathe, basebesukuma ukuba bagide.

⁷ INkosi yasisithi kuMose: Suka wehle, ngoba abantu bakho owabakhupha eGibithe benzile okubi;

⁸ baphambukile masinyane endleleni engabalaya ngayo; bazenzele ithole elikhandiweyo, balikhonza, balihlabela, bathi: Nangu unkulunkulu wakho, Israyeli, owakukhupha eGibithe.

⁹ INkosi yathi kuMose: Sengibabonile lababantu ukuthi bangabantu abanhliziyo zilukhuni;

¹⁰ ngakhoke ngiyekele ukuba ulaka lwami lubavuthele, ngibaqede; kodwa wena ngizakukwenza ube yisizwe esikhulu.

¹¹ Kodwa uMose wayincenga iNkosi uNkulunkulu wakhe wathi; Nkosi, ulaka lwakho lubavuthelelani abantu bakho owabakhupha elizweni laseGibithe ngamandla amakhulu langesandla esiqinileyo na?

¹² AmaGibithe uzawavumelelani ukuba athi: Yayiqonde ukubenza okubi ngokubakhupha kwayo ukuba ibabulale ezintabeni, ibaqede emhlabeni na? Phenduka olakeni lwakho oluvuthayo, ungenzi okubi lokhu ebantwini bakho.

¹³ Khumbula uAbrahama loIsaka loIsrayeli, inceku zakho, owazifunga kibo wathi: Ngizakwandisa inzalo yenu ibe ngangenkanyezi zasezulwini, ngiyinike lonke lelilizwe engikhulume ngalo, libe yilifa layo kuze kube nininini.

¹⁴ Ngakho iNkosi yasiphenduka ebubini eyayisithi izakubenza ebantwini bayo.

¹⁵ UMose wasesuka, wehla entabeni ephethe amatshe amabili obufakazi, amatshe alotshwe inxa zombili.

¹⁶ Amatshe ayengumsebenzi kaNkulunkulu, lombhalo wawungumbhalo kaNkulunkulu, ubhalwe ematsheni.

¹⁷ UJoshuwa esezwile umsindo wabantu beklabalala, wathi kuMose: Kulomsindo wempi ezihonqweni.

¹⁸ UMose wathi: Kakusumsindo wabathabela ukunqoba loba umsindo wabanqotshiweyo, kodwa kungumsindo wabahlabelayo engiwuzwayo.

¹⁹ Kwathi esesondele emathenteni walibona ithole legolide kanye lokusina; ulaka lukaMose lwavutha, wawalahla amatshe ezandleni zakhe, wawaphahlazela phansi kwentaba.

²⁰ Wathatha ithole ababelenzile, walitshisa ngomlilo, walichola laze laba yimpuphu, wayivuvuzela emanzini, wabanathisa wona abantu bakoIsrayeli.

²¹ UMose wathi kuAroni: Abantu laba benzeni ukuba ubehlisele isono esingaka na?

²² UAroni wathi: Kalungavuthi ulaka lwenkosi yami; uyabazi abantu ukuthi bathanda ububi.

²³ Ngoba bathi kimi: Senzele onkulunkulu abazakuhamba phambi kwethu; ngoba uMose lowo owasikhupha elizweni laseGibithe, kasazi ukuthi usehlelwe yini.

²⁴ Ngasengisithi kubo: Olegolide kalikhumule. Basebenginika lona; ngaliphosela emlilweni, kwaphuma lelithole.

²⁵ Kwathi uMose esebonile ukuthi abantu badlubulundile, — ngoba uAroni wabayekela ukuba badlubulunde baze bayangeke ezitheni zabo —

²⁶ uMose wema esangweni lamathente, wathi: Ngubani ongoweNkosi? Keze kimi. Wonke amadodana kaLevi abuthana kuye.

²⁷ Wathi kuwo: INkosi uNkulunkulu kaIsrayeli ithi: Ilowo lalowo phakathi kwenu kahlome umkhonto wakhe, azule lamathente, asuke kwelinye isango aye kwelinye, abulale umfowabo lomngane wakhe lomakhelwana wakhe.

²⁸ Amadodana kaLevi enza njengokutsho kukaMose; kwabulawa abantu abayizinkulungwane ezintathu ngalolosuku.

²⁹ UMose wasesithi: Lamuhla lizahlukanisele iNkosi lina, kwaba yilowo lalowo wenu wanikela indodana yakhe lomfowabo, ukuba iNkosi ilibusise lamuhla.

³⁰ Kusisa uMose wathi ebantwini: Lenze isono esikhulu; khathesi sengizakukhuphukela eNkosini; mhlawumbe ngingenza indlela yokubuyisana esonweni senu.

³¹ UMose wasebuyela eNkosini wathi: Maye! Lababantu benzile isono esikhulu, bazenzele onkulunkulu begolide.

³² Kodwa uba ubathethelela isono — uba ungabathetheleli, ungisuse ogwalweni lwakho olulobileyo.

³³ INkosi yathi kuMose: Owonileyo kimi ngizamsusa ogwalweni lwami.

³⁴ Kodwa hambake, ubaholele abantu endaweni engikhulume ngayo kuwe; isithunywa sami sizakukwandulela. Kanti mhla ngibethekelelayo ngizabatshaya ngenxa yesono sabo.

³⁵ INkosi yabatshaya abantu ngenxa yethole ababelenzile, uAroni ayebenzele lona.