U-Eksodasi 31 - iBhayibhili Elingcwele 1978

Ukubizwa kukaBezaleli loOholiyaba

¹ INkosi yasikhuluma kuMose isithi:

² Ngikhethile uBezaleli indodana kaUri indodana kaHuri, owesizwe sakoJuda;

³ ngimgcwalisile ngoMoya kaNkulunkulu ukuba abe lokuhlakanipha lokuqedisisa lokwazi lamandla okwenza yonke imisebenzi,

⁴ ukuba aqambe imisebenzi yobungcitshi, asebenze ngegolide langesiliva langethusi,

⁵ lokuba abaze amatshe okufakwa, abaze njalo izigodo, enze yonke imisebenzi yobungcitshi.

⁶ Ngikhethile kanye laye uOholiyaba indodana kaAhisamaki owesizwe sakoDani; bonke abahlakaniphileyo ngibanikile ulwazi lokwenza konke engikulaye khona,

⁷ ngitsho ithente lokuhlangana, lomtshokotsho wobufakazi, lesihlalo somusa esikuwo, lempahla yonke yethente,

⁸ letafula lezitsha zayo, loluthi lwesibane oluhle kanye lezitsha zalo zonke, lealtare lempepha,

⁹ lealtare lomnikelo wokutshiswa kanye lezitsha zalo zonke, lomkolo lenyawo zawo,

¹⁰ lezambatho ezenziweyo kuhle, izambatho ezingcwele zikaAroni umpristi, lezambatho zamadodana akhe ukuba babe ngabapristi bokuphatha umsebenzi wami,

¹¹ lamagcobo okugcoba, lempepha elephunga elimnandi yendawo engcwele; benze konke njengokukulaya kwami.

Ukugcina amaSabatha

¹² INkosi yakhuluma kuMose yathi:

¹³ Tshela abantu bakoIsrayeli uthi: Impela lizagcina amaSabatha ami; ngoba lokhu kuyisibonakaliso phakathi kwami lani kuzo izizukulwana zenu, ukuba lazi ukuthi ngiyiNkosi elenza libe ngcwele.

¹⁴ Ngakhoke gcinani iSabatha ngoba lingcwele kini, yilowo lalowo alonayo uzakubulawa sibili; laye osebenza ngalo uzakukhutshwa ebantwini bakibo.

¹⁵ Kusetshenzwe insuku eziyisithupha, kodwa usuku lwesikhombisa lube liSabatha lokuphumula, lingcwele eNkosini; lowo osebenza ngeSabatha uzakubulawa sibili.

¹⁶ Ngakhoke abantu bakoIsrayeli bazagcina iSabatha, baligcine ezizukulwaneni zabo, libe yisivumelwano esingapheliyo.

¹⁷ Liyisibonakaliso phakathi kwami labantu bakoIsrayeli kuze kube nini lanini; ngoba ngensuku eziyisithupha iNkosi yenza izulu lomhlaba, kodwa ngosuku lwesikhombisa yaphumula, yatshaphuluka.

¹⁸ Isiqedile ukukhuluma kuMose entabeni yaseSinayi yamnika uMose amatshe amabili obufakazi alotshwe ngomunwe kaNkulunkulu.