U-Eksodasi 3 - iBhayibhili Elingcwele 1978

Ukubizwa kukaMose

¹ UMose wayesalusa izimvu zikaJetro uyisezala, umpristi waseMidiyani; waziqhuba izimvu, wadabula inkangala waze wafika entabeni kaNkulunkulu yaseHorebe.

² Isithunywa seNkosi sabonakala kuye elangabini lomlilo liphuma esihlahleni; wakhangela, wabona isihlahla sivutha umlilo, kodwa isihlahla sasingatshi.

³ UMose wathi: Ngizaphambuka ukuba ngibone lokhu okumangalisayo ukuthi isihlahla kasitshi ngani.

⁴ INkosi isibonile ukuthi uphambukile ukuyabona, uNkulunkulu wambiza ephakathi kwesihlahla, wathi: Mose, Mose! Yena wathi: Ngilapha.

⁵ Wathi: Ungasondeli lapha; khupha amanyathelo akho enyaweni zakho, ngoba indawo omi kuyo ingumhlabathi ongcwele.

⁶ Wathi futhi: NginguNkulunkulu kayihlo, uNkulunkulu kaAbrahama, uNkulunkulu kaIsaka, uNkulunkulu kaJakobe. UMose wafihla ubuso bakhe, ngoba wayesesaba ukumkhangela uNkulunkulu.

⁷ INkosi yasisithi: Impela ngibonile ukuhlupheka kwabantu bami abaseGibithe, ngizwile ukukhala kwabo ngenxa yabacindezeli babo; ngiyalwazi usizi lwabo;

⁸ ngehlile ukuba ngibakhulule ezandleni zamaGibithe, ngibakhuphe kulelolizwe, ngibase elizweni elihle elibanzi, ilizwe eligcwele uchago lenyosi, indawo yamaKanani lamaHethi lamaAmori lamaPerizi lamaHivi lamaJebusi.

⁹ Ukukhala kwabakoIsrayeli sekufinyelele kimi; njalo ngibonile ukucindezelwa kwabo ngamaGibithe.

¹⁰ Woza, ngikuthume kuFaro ukuba ubakhuphe eGibithe abantu bami abakoIsrayeli.

¹¹ Kodwa uMose wathi kuNkulunkulu: Ngingubani mina ukuba ngiye kuFaro, ngikhuphe abantu bakoIsrayeli eGibithe na?

¹² Wathi: Impela ngizakuba lawe; lokhu kuzakuba yisibonakaliso kuwe sokuba ngikuthumile; lapho usubakhuphile abantu eGibithe, lizamkhonza uNkulunkulu kulintaba.

¹³ UMose wathi kuNkulunkulu: Nxa ngifika kubo abakoIsrayeli ngithi: UNkulunkulu wabokhokho benu ungithumile kini; bona bazakuthi kimi: Ngubani ibizo lakhe? ngizakuthini kubo na?

¹⁴ UNkulunkulu wathi kuMose: NGINGUYE ENGINGUYE. Wathi futhi: Uzakutsho kwabakoIsrayeli ukuthi: UNGINGUYE ungithumile kini.

¹⁵ UNkulunkulu wathi njalo kuMose: Uzakutsho kwabakoIsrayeli ukuthi: INkosi uNkulunkulu wabokhokho benu, uNkulunkulu kaAbrahama, uNkulunkulu kaIsaka, uNkulunkulu kaJakobe ungithumile kini; yilo leli ibizo lami kuze kube nininini, yiso lesi isikhumbuzo sami kuzo zonke izizukulwana.

¹⁶ Hamba, ubuthanise abalisa bakoIsrayeli, uthi kubo: INkosi uNkulunkulu wabokhokho benu, uNkulunkulu kaAbrahama, uNkulunkulu kaIsaka, uNkulunkulu kaJakobe ubonakele kimi, wathi: Impela ngilikhumbule, ngabona lokho elehlelwa yikho eGibithe;

¹⁷ ngithi ngizalikhupha ekuhluphekeni kwenu eGibithe, ngilise elizweni lamaKanani lamaHethi lamaAmori lamaPerizi lamaHivi lamaJebusi, ilizwe eligcwele uchago lenyosi.

¹⁸ Bazalalela ilizwi lakho. Futhi uzakuya enkosini yaseGibithe, wena kanye labalisa bakoIsrayeli, lithi kuyo: INkosi uNkulunkulu wamaHeberu ihlangene lathi; ake usivumele sihambe khathesi ummango wezinsuku ezintathu siye enkangala ukuze sinikele iminikelo eNkosini uNkulunkulu wethu.

¹⁹ Ngiyazi ukuthi inkosi yaseGibithe kayiyikulivumela lihambe ngaphandle kokuthi ibanjwa ngamandla.

²⁰ Ngakhoke ngizakwelula isandla sami ngilitshaye iGibithe ngezimangaliso zami zonke engizakuzenza phakathi kwalo; emva kwalokho izakulivumela lihambe.

²¹ Ngizakunika lababantu umusa emehlweni amaGibithe. Kuzakuthi mhla lisukayo, lingahambi lingaphethe lutho,

²² kodwa ilowo lalowowesifazana uzakucela kumakhelwana wakhe, lakuye ohlala endlini yakhe, izinto eziligugu zesiliva, lezinto eziligugu zegolide, lemvunulo; lizakuzinika amadodana enu lamadodakazi enu; lizakuwaphanga amaGibithe.