U-Eksodasi 29 - iBhayibhili Elingcwele 1978

Ukugcotshwa kukaAroni lamadodana akhe

¹ Yilokhu ozakukwenza kubo ukubahlukanisa ukuba babe ngabapristi bokuphatha umsebenzi wami. Thatha inkabi lenqama ezimbili ezingelasici,

² lesinkwa esingelamvubelo lamaqebelengwana angelamvubelo ahlanganiswe lamafutha, lezinkwa ezincinyane ezingelamvubelo ezigcotshwe ngamafutha, okwenze ngempuphu ecolekileyo;

³ ukufake esitsheni sibe sinye, ukulethe ngesitsha kanye lenkabi lenqama ezimbili.

⁴ Usondeze uAroni lamadodana akhe emnyango wethente lokuhlangana, ubagezise ngamanzi;

⁵ uthathe izambatho, ugqokise uAroni ibhatshi, lesambatho esiyingubo yamahlombe, lengubo yamahlombe, lengubo yesifuba, umbophe ngebhanti elalukiweyo lengubo yamahlombe,

⁶ umthwalise iqhiye ekhanda lakhe lomqhele ongcwele phezu kweqhiye.

⁷ Uthathe amagcobo okugcoba, uwathele ekhanda lakhe, umgcobe.

⁸ Usondeze lamadodana akhe uwambathise amabhatshi.

⁹ Ubabophe ngamabhanti uAroni lamadodana akhe, ubathwalise izingowane, baphathe ubupristi ngesimiso esingapheliyo. Ngalindlela uzakugcoba uAroni lamadodana akhe.

¹⁰ Uzakuletha inkunzi phambi kwethente lokuhlangana, ukuba uAroni lamadodana akhe babeke izandla zabo ekhanda lenkunzi;

¹¹ uyihlabe inkunzi phambi kweNkosi ngasemnyango wethente lokuhlangana,

¹² uthathe igazi lenkunzi, ulininde empondweni zealtare ngomunwe wakho, uthululele lonke igazi eliseleyo phansi ngasealtareni.

¹³ Uzathatha lonke idanga lemibilini, lamahwahwa angaphezu kwesibindi, lezinso zombili lamahwahwa azo, ukutshise ealtareni.

¹⁴ Kodwa inyama yenkunzi lesikhumba sayo lomswane wayo ukutshise ngomlilo ngaphandle kwezihonqo, ngoba kungumnikelo wesono.

¹⁵ Uzathatha inqama ibenye; uAroni lamadodana akhe babeke izandla zabo ekhanda lenqama.

¹⁶ Uyihlabe inqama, uthathe igazi layo, ulikhaphazele ealtareni inxa zonke.

¹⁷ Uyihlahlele inqama, ugezise imibilini yayo lemilenze yayo, ukubeke ndawonye lezitho zayo lekhanda layo,

¹⁸ utshise yonke inqama ealtareni, kube ngumnikelo wokutshiswa eNkosini, iphunga elimnandi, lomnikelo owenzelwe iNkosi ngomlilo.

¹⁹ Uzathatha enye inqama; uAroni lamadodana akhe babeke izandla zabo ekhanda layo.

²⁰ Uyihlabe, uthathe igazi layo, ulininde oqwangeni lwendlebe yokunene kaAroni, lasoqwangeni lwezindlebe zokunene zamadodana akhe, lasezithupheni zezandla zabo zokunene, lasemazwaneni amakhulu enyawo zabo zokunene, igazi eliseleyo likhatshazelwe ealtareni inxa zonke.

²¹ Uzathatha igazi elisealtareni lamagcobo okugcoba, umchele ngakho uAroni lezambatho zakhe, lamadodana akhe, lezambatho zamadodana akhe, ukuba abe ngcwele lezambatho zakhe, lamadodana akhe lezambatho zawo.

²² Uthathe amahwahwa enqama, lomsila ononileyo, ledanga lemibilini, lamahwahwa angaphezu kwesibindi, lezinso zombili, lamahwahwa azo, lomlenze wokunene, ngoba iyinqama yokugcotshwa kompristi;

²³ uthathe isinkwa sibe sinye, leqebelengwana libe linye elilamafutha, lesinkwa esincinyane sibe sinye, esitsheni sesinkwa esingelamvubelo esiphambi kweNkosi,

²⁴ ukubeke konke ezandleni zikaAroni lasezandleni zamadodana akhe, ukuzunguze ukuba kube ngumnikelo wokuzunguzwa phambi kweNkosi.

²⁵ Ukuthathe ezandleni zabo, ukutshise ealtareni phezu komnikelo wokutshiswa, ukuba kube liphunga elimnandi phambi kweNkosi; ngoba kungumnikelo owenzelwe iNkosi ngomlilo.

²⁶ Uzathatha isifuba senqama yokugcotshwa kukaAroni, usizunguze ukuba sibe ngumnikelo wokuzunguzwa phambi kweNkosi, sibe yisabelo sakho.

²⁷ Uzakusahlukanisela isifuba somnikelo wokuzunguzwa lomlenze womnikelo wokuphakanyiswa ozunguzwayo, okwenqama yokugcotshwa kompristi ngoba enikelelwa uAroni lamadodana akhe;

²⁸ kuzakuba ngokukaAroni lokwamadodana akhe, kube yimfanelo engapheliyo kwabakoIsrayeli; ngoba kuyisabelo sabapristi esivela eminikelweni yokuthula yabakoIsrayeli; kungumnikelo wabo onikelwa eNkosini.

²⁹ Izambatho ezingcwele zikaAroni zizakuba ngezamadodana akhe emva kwakhe, ukuba agcotshwe, ahlukaniselwe, embethe zona.

³⁰ Indodana engumpristi endaweni yakhe izakuzambatha insuku eziyisikhombisa nxa ingena ethenteni lokuhlangana ukuyakhonza endaweni engcwele.

³¹ Uzakuthatha inqama yokugcotshwa kompristi, upheke inyama yayo endaweni engcwele.

³² UAroni lamadodana akhe badle inyama yenqama lesinkwa esisesitsheni ngasemnyango wethente lokuhlangana,

³³ badle lezozinto okwenziwa ngazo indlela yokubuyisana ekugcotshweni kwabo lekwahlukaniselweni kwabo; kodwa owemzini angazidli ngoba zingcwele.

³⁴ Uba kusala inyama yokugcotshwa kompristi lesinkwa kuze kuse, ukutshise ngomlilo, kungadliwa, ngoba kungcwele.

³⁵ Uzakwenza njalo kuAroni lamadodana akhe njengokukulaya kami, ukugcotshwa kwabo kuthathe insuku eziyisikhombisa.

³⁶ Insuku ngensuku unikele inkunzi ibe ngumnikelo wesono wokubuyisana; futhi uzakunikelela ialtare umnikelo wesono lapho ulenzele indlela yokubuyisana, uligcobe ukuba ulahlukanisele.

³⁷ Ulenzele ialtare indlela yokubuyisana insuku eziyisikhombisa, ulahlukanisele ialtare, ukuba libe ngcwele kakhulu; lakho konke okulithintayo kuzakuba ngcwele.

Iminikelo yensuku ngensuku

³⁸ Yilokhu ozakukunikela ealtareni; amawundlu amabili alomnyaka munye insuku ngensuku njalonjalo.

³⁹ Elinye iwundlu uzanikela ngalo ekuseni, elinye unikele ngalo kusihlwa

⁴⁰ kanye lelinye iwundlu unikele ingxenye yehefa lempuphu ecolekileyo ixubene lokwesine kwehini yamafutha okukhanywa, kanye lokwesine kwehini yewayini kube ngumnikelo wokuthululwa.

⁴¹ Unikele elinye iwundlu kusihlwa, unikele kanye lalo umnikelo wempuphu lomnikelo wokuthululwa njengasekuseni, kube liphunga elimnandi, umnikelo owenzelwe iNkosi ngomlilo.

⁴² Lo uzakuba ngumnikelo wokutshiswa wensuku zonke ezizukulwaneni zenu zonke, ngasemnyango wethente lokuhlangana phambi kweNkosi, lapho ngizahlangana khona lani, ngikhulume lawe.

⁴³ Lapho ngizahlangana labantu bakoIsrayeli; ithente lizakwahlukaniselwa yinkazimulo yami.

⁴⁴ Ngizakwahlukanisela ithente lokuhlangana lealtare, ngibahlukanisele njalo loAroni lamadodana akhe ukuba babe ngabapristi bokuphatha umsebenzi wami.

⁴⁵ Ngizahlala phakathi kwabantu bakoIsrayeli, ngibe nguNkulunkulu wabo.

⁴⁶ Bazakwazi ukuthi ngiyiNkosi uNkulunkulu wabo, eyabakhupha elizweni laseGibithe ukuba ngihlale phakathi kwabo; ngiyiNkosi, uNkulunkulu wabo.