U-Eksodasi 28 - iBhayibhili Elingcwele 1978

Izambatho zabapristi

¹ Sondeza kuwe uAroni lamadodana akhe abaphakathi kwabakoIsrayeli, ukuba babe ngabapristi bokuphatha umsebenzi wami, ngitsho uAroni lamadodana akhe uNadabi loAbihu loEleyazare loIthamari.

² Umenzele uAroni umfowenu izambatho ezingcwele, ezobukhosi lezokucecisa.

³ Khuluma labo bonke abahlakaniphileyo engibagcwalise ngomoya wokuhlakanipha, ukuba benze izambatho zikaAroni zokumahlukanisela ubupristi ukuba angikhonze.

⁴ Yilezi izambatho abazakuzenza; ingubo yesifuba lengubo yamahlombe, lesigqoko, lebhatshi elilamabala, leqhiye, lebhanti; bamenzele uAroni umfowenu lamadodana akhe izambatho ezingcwele ukuba babe ngabapristi bokuphatha umsebenzi wami.

⁵ Kabathathe ilembu legolide leliluhlaza leliyibubende lelibomvu, ilembu elihle,

⁶ bayenze ingubo yamahlombe ngelembu elihle lentambo ephothiweyo yegolide leluhlaza leyibubende lebomvu, kube ngumsebenzi wengcitshi.

⁷ Izakuba lezichibi ezimbili zasemahlombe, zihlangane emaceleni ayo womabili, ukuba ihlanganiswe.

⁸ Ibhanti elalukiweyo elikuyo, elokuyibopha okhalweni, kalenziwe lifanane layo, ngelembu elihle lentambo ephothiweyo yegolide leluhlaza leyibubende lebomvu.

⁹ Uzakuthatha amatshe amabili athiwa ngamaonikse, ubhale kuwo amabizo amadodana kaIsrayeli,

¹⁰ amabizo awo ayisithupha abe kwelinye ilitshe, lamabizo ayisithupha aseleyo abe kwelinye njengokuzalwa kwabo.

¹¹ Njengokubhala komkhandi wendandatho lawe uzawabhala amabizo amadodana kaIsrayeli ematsheni womabili, uwazingelezele ngezinto ezitshiliweyo zegolide.

¹² Uzathungela amatshe womabili ezichibini zengubo yamahlombe, ukuba abe ngamatshe esikhumbuzo ebantwaneni bakoIsrayeli; uAroni uzakuthwala amabizo abo emahlombe akhe phambi kweNkosi ukuba abe yisikhumbuzo.

¹³ Wenze izinto ezitshiliweyo zegolide,

¹⁴ lamaketane amabili egolide elihle, uwenze ukuba abe njengamagoda aphothiweyo, amaketane uwabophele ezintweni ezitshiliweyo zegolide.

¹⁵ Wenze ingubo yesifuba yokwahlulela, kube ngumsebenzi wengcitshi, uyenze njengengubo yamahlombe, ngelembu elihle lentambo ephothiweyo yegolide leluhlaza leyibubende lebomvu.

¹⁶ Kayilingane inxa zonke, iphindwe kabili, ubude bayo bube ngangengxenye yengalo, ububanzi bayo bube ngangengxenye yengalo.

¹⁷ Ufake kuyo imizila emine yamatshe amahle; umzila wokuqala ube lesardikisi letopazi lerubi,

¹⁸ umzila wesibili ube le‐emeraldi lesafire lendayimana,

¹⁹ umzila wesithathu ube lejasinte leagate leametiste,

²⁰ umzila wesine ube leberila leonikse lejaspi; amatshe la azingelezelwe ngezinto ezitshiliweyo zegolide.

²¹ Kuzakuba khona amatshe alitshumi lambili, abe lamabizo amadodana kaIsrayeli; yilelo lalelo ilitshe libe lebizo lesinye sezizwe ezilitshumi lambili, kubhalwe kulo njengokubhalwa kwendandatho.

²² Wenze engutsheni yesifuba amaketane egolide elihle anjengamagoda aphothiweyo,

²³ wenze futhi kuyo lamasongo amabili egolide, uwathungele womabili emaceleni womabili engubo yesifuba.

²⁴ Ufake amaketane womabili egolide emasongweni amabili asemaceleni engubo yesifuba;

²⁵ izihloko zamaketane womabili uzihlanganise lezinto ezimbili ezitshiliweyo zegolide, uzibeke ngaphambili ezichibini zengubo yamahlombe.

²⁶ Uzakwenza amasongo amabili egolide, uwathungele emaceleni womabili engubo yesifuba, emphethweni wayo oseduze lengubo yamahlombe.

²⁷ Wenze amasongo amabili egolide, uwathungele ngaphambili ngaphansi kwezichibi zengubo yamahlombe, ekuhlanganeni kwazo, phezu kwebhanti elalukiweyo lengubo yamahlombe.

²⁸ Bazakubophela amasongo engubo yesifuba emasongweni engubo yamahlombe ngentambo eluhlaza, ukuba ingubo yesifuba ibe phezu kwebhanti elalukiweyo, ingakhumuki engutsheni yamahlombe.

²⁹ UAroni uzakuthwala amabizo abantu bakoIsrayeli engutsheni yesifuba yokwahlulela phezu kwenhliziyo yakhe nxa engena endaweni engcwele, kube yisikhumbuzo phambi kweNkosi njalonjalo.

³⁰ Uzakufaka engutsheni yesifuba yokwahlulela inkatho iUrimi leThumimi, kube phezu kwenhliziyo kaAroni nxa engena phambi kweNkosi; ngakhoke uAroni uzakuthwala ukwahlulelwa kwabakoIsrayeli phezu kwenhliziyo yakhe phambi kweNkosi njalonjalo.

³¹ Uzakwenza isambatho esiyingubo yamahlombe ngelembu eliluhlaza;

³² sibe lesikhala sekhanda ngaphakathi kwaso, isikhala sibe lomphetho owalukiweyo osizungelezeyo njengesikhala sesigqoko, ukuba singadabuki.

³³ Emiphethweni yaso wenze umfanekiso wezithelo zamapomegranati ngelembu eliluhlaza leliyibubende lelibomvu, lezinto ezikhencezayo zegolide phakathi kwazo,

³⁴ esinye lesinye isithelo silandelwe yinto ekhencezayo yegolide, kube njalo lasemiphethweni yonke yesambatho.

³⁵ UAroni kasambathe lapho ekhonzayo; ukukhenceza kwaso kuzakuzwakala lapho engena endaweni engcwele phambi kweNkosi, lalapho ephuma khona, ukuba angafi.

³⁶ Uzakwenza incence ngegolide elihle, ubhale kuyo njengokubhalwa kwendandatho ukuthi: Wahlukaniselwe iNkosi.

³⁷ Uyibophele eqhiyeni ngentambo eluhlaza, ibe ngaphambili kweqhiye.

³⁸ Izakuba sebunzini likaAroni ukuba athwale icala eliqondene lezinto ezingcwele, abantu bakoIsrayeli abazakuzenza zibe yiziphiwo zabo ezingcwele; izahlala isebunzini lakhe ukuba bamukeleke eNkosini.

³⁹ Uzakwaluka ibhatshi ngelembu elihle elilamabala, wenze iqhiye ngelembu elihle lebhanti, umsebenzi womthungi.

⁴⁰ Wenzele amadodana kaAroni amabhatshi lamabhanti lezingowane, izinto zobukhosi lezokuceca.

⁴¹ Umambathise zona uAroni umfowenu lamadodana akhe, ubagcobe, ubahlukanisele ukuba babe ngabapristi bokuphatha umsebenzi wami.

⁴² Ubenzele amabhulugwe okufihla ubunqunu babo, aqale okhalweni afinyelele emathangazini;

⁴³ uAroni lamadodana akhe bawagqoke lapho bengena ethenteni lokuhlangana lalapho besondela ealtareni ukuba bakhonze endaweni engcwele, funa babe lecala, bafe. Kuzakuba yisimiso esingapheliyo kuye lakuyo inzalo yakhe emva kwakhe.