U-Eksodasi 27 - iBhayibhili Elingcwele 1978

Ialtare eleminikelo yokutshiswa

¹ Uzakwenza ialtare ngesihlahla somvagazi, ubude balo bube zingalo ezinhlanu, ububanzi balo bube zingalo ezinhlanu, lilingane inxa zonke, ukudepha kwalo kube zingalo ezintathu.

² Uzakwenza impondo zalo engonsini zalo zozine, ukuba lona lempondo zalo kube yintonye kanye lalo; ulibhade ngethusi.

³ Wenze izimbiza zokususa umlotha walo, lamafotsholo alo, lemiganu yalo yokuchela, lamafolokwe alo, lezitsha zalo zokuthwala umlilo, uzenze zonke izinto zalo ngethusi.

⁴ Ulenzele isihlengo sethusi esinjengembule, wenze phezu kwalo amasongo amane ethusi ngasengonsini zalo;

⁵ usibeke ngaphansi komphetho wealtare ukuba imbule lilenge lifinyelele phakathi kwealtare.

⁶ Ulenzele ialtare imijabo yesihlahla somvagazi, uyibhade ngethusi;

⁷ imijabo ifakwe emasongweni ukuba ibe sezinhlangothini zombili zealtare nxa lithwalwa.

⁸ Ulenze ngamapulanka, lifane lomkolo, libe njengalokho watshengiswa entabeni.

Iguma leTabernakeli

⁹ Uzakwenza iguma leTabernakeli, libe sohlangothini olungaseningizimu lamakhetheni elembu elihle lentambo ephothiweyo, ubude bawo bube zingalo ezilikhulu ohlangothini lunye;

¹⁰ insika zawo ezingamatshumi amabili lenyawo zazo ezingamatshumi amabili zibe ngezethusi, kodwa ingwegwe zezinsika lezibopho zazo zibe ngezesiliva.

¹¹ Ohlangothini olungasenyakatho kakube lamakhetheni, ubude bawo bube zingalo ezilikhulu, lensika zawo ezingamatshumi amabili lenyawo zazo ezingamatshumi amabili zibe ngezethusi, kodwa ingwegwe zezinsika lezibopho zazo zibe ngezesiliva.

¹² Ohlangothini olungasentshonalanga, ebubanzini beguma, kakube khona amakhetheni, ububanzi bawo bube zingalo ezingamatshumi amahlanu, kube khona lensika ezilitshumi lenyawo ezilitshumi.

¹³ Ububanzi beguma lohlangothi olungasempumalanga bube zingalo ezingamatshumi amahlanu.

¹⁴ Amakhetheni olunye uhlangothi lomnyango abe yizingalo ezilitshumi lanhlanu, kanye lensika ezintathu lenyawo ezintathu;

¹⁵ lakolunye uhlangothi amakhetheni abe yizingalo ezilitshumi lanhlanu, kanye lensika ezintathu lenyawo ezintathu.

¹⁶ Umnyango weguma uzakuba leveli, ubude balo bube zingalo ezingamatshumi amabili, lenziwe ngelembu elihle lentambo ephothiweyo eluhlaza leyibubende lebomvu, kube ngumsebenzi womthungi; lizakuba lensika ezine kanye lenyawo ezine.

¹⁷ Zonke insika zeguma kazibe lezibopho zesiliva, ingwegwe zazo zibe ngezesiliva lenyawo zazo zibe ngezethusi.

¹⁸ Ubude beguma bube zingalo ezilikhulu, ububanzi bube zingalo ezingamatshumi amahlanu, ukudepha kube zingalo ezinhlanu, libe lamaveli elembu elihle lentambo ephothiweyo lenyawo zethusi.

¹⁹ Zonke izinto zomsebenzi weTabernakeli lezikhonkwane zalo zonke kanye lazo zonke izikhonkwane zeguma zizakuba ngezethusi.

²⁰ Uzakubalaya abakoIsrayeli ukuba bakulethele amafutha amahle amaoliva elungiselwe ukukhanyisa, ukuze izibane zivuthe insuku zonke.

²¹ Ethenteni lokuhlangana ngaphandle kweveli eliphambi kobufakazi, uAroni lamadodana akhe bazakuzilondoloza phambi kweNkosi, kusukela kusihlwa kuze kube sekuseni; kuzakuba yisimiso esingapheliyo esizagcinwa ngabakoIsrayeli ezizukulwaneni zonke.