U-Eksodasi 26 - iBhayibhili Elingcwele 1978

ITabernakeli

¹ Uzakwenza iTabernakeli ngamaveli alitshumi elembu elihle elenziwe ngentambo ephothiweyo eluhlaza leyibubende lebomvu, abe lamakherubi enziwe ngumuntu oyingcitshi.

² Ubude balelo lalelo iveli bube zingalo ezingamatshumi amabili lesificaminwembili, lobubanzi balo bube zingalo ezine, wonke amaveli alingane.

³ Kuzahlanganiswa amaveli amahlanu elinye lelinye, lamanye amaveli amahlanu ahlanganiswe ngokunjalo.

⁴ Uzakwenza izihitshela ngokuluhlaza emphethweni weveli elisekucineni kwamaveli amahlanu, uphinde wenze njalo emphethweni weveli elisekucineni kwamanye amaveli amahlanu.

⁵ Wenze izihitshela ezingamatshumi amahlanu kwelinye iveli, lezihitshela ezingamatshumi amahlanu emphethweni weveli elinye, izihitshela zikhangelane.

⁶ Wenze ingwegwe zegolide ezingamatshumi amahlanu, uhlanganise amaveli elinye lelinye ngengwegwe, ukuba iTabernakeli libe linye.

⁷ Wenze amaveli ngoboya bembuzi abe lithente phezu kweTabernakeli, kube lamaveli alitshumi lanye.

⁸ Ubude balelo lalelo iveli bube zingalo ezingamatshumi amathathu, lobubanzi balo bube zingalo ezine, wonke amaveli alitshumi lanye alingane.

⁹ Uzahlanganisa amaveli amahlanu abe wodwa, lamaveli ayisithupha abe wodwa, ilembu lesithupha lipheqelwe ngaphambi kwethente.

¹⁰ Wenze izihitshela ezingamatshumi amahlanu emphethweni weveli elisekucineni kwamaveli amahlanu, lezihitshela ezingamatshumi amahlanu emphethweni weveli elisekucineni kwamanye amaveli ayisithupha.

¹¹ Wenze ingwegwe zethusi ezingamatshumi amahlanu, uzifake ezihitsheleni, uhlanganise ithente libe linye.

¹² Lokho okwedlulayo kwamaveli ethente, ngitsho ingxenye yeveli eliseleyo, kuzalenga emva kweTabernakeli.

¹³ Ingxenye yobude bamaveli ethente edlulayo emaceleni womabili, elingana lengalo, izalenga emaceleni eTabernakelini inxa zonke ukulisibekela.

¹⁴ Uzakulifulela ithente ngezikhumba ezibomvu zezinqama lezinzwezwe.

¹⁵ Uzakwenza amapulanka amiswayo eTabernakelini ngesihlahla somvagazi,

¹⁶ ubude bamapulanka bube zingalo ezilitshumi, lobubanzi bawo bube yingalo lengxenye.

¹⁷ Ilelo lalelo ipulanka libe lemisuka emibili yokuhlanganisa; wenze njalo kuwo wonke amapulanka eTabernakelini.

¹⁸ Uzakwenza amapulanka eTabernakelini, amapulanka angamatshumi amabili ohlangothini lwaseningizimu;

¹⁹ wenze inyawo ezingamatshumi amane zesiliva ngaphansi kwamapulanka angamatshumi amabili, inyawo ezimbili ngaphansi kwepulanka linye zibe ngezemisuka yalo yomibili, lenyawo ezimbili ngaphansi kwelinye ipulanka zibe ngezemisuka yalo yomibili,

²⁰ wenze amapulanka angamatshumi amabili ohlangothini lwesibili lweTabernakeli, uhlangothi lwasenyakatho,

²¹ kanye lenyawo zawo ezingamatshumi amane zesiliva, inyawo ezimbili ngaphansi kwepulanka linye lenyawo ezimbili ngaphansi kwelinye ipulanka.

²² Wenze amapulanka ayisithupha ohlangothini olungasemuva ngasentshonalanga,

²³ lamapulanka amabili azakuba yizingonsi zeTabernakeli ngasemuva,

²⁴ womabili ahlanganiswa ngaphansi langaphezulu esongweni lokuqala ukuba abe yizingonsi ezimbili.

²⁵ Kuzakuba khona amapulanka aficaminwembili kanye lenyawo zawo zesiliva ezilitshumi lesithupha, inyawo ezimbili ngaphansi kwepulanka elinye lelinye.

²⁶ Uzakwenza imithando ngesihlahla somvagazi, imithando emihlanu ibe ngeyamapulanka akolunye uhlangothi lweTabernakeli,

²⁷ lemithando emihlanu ibe ngeyamapulanka akolunye uhlangothi, lemithando emihlanu ibe ngeyamapulanka ohlangothini olungasemuva ngasentshonalanga;

²⁸ umthando waphakathi udabule phakathi kwamapulanka uze ufinyelele ekucineni inxa zombili.

²⁹ Uzawabhada amapulanka ngegolide, uwenzele amasongo egolide ukuba athwale imithando; uyibhade ngegolide.

³⁰ Uzalimisa iTabernakeli libe njengesifanekiso salo owatshengiswa sona entabeni.

³¹ Uzakwenza iveli lelembu elihle elentambo ephothiweyo eluhlaza leyibubende lebomvu, libe lamakherubi, kube ngumsebenzi wengcitshi;

³² ulilengise ngengwegwe zegolide ensikeni ezine zomvagazi ezibhadwe ngegolide, zime ngenyawo ezine zesiliva.

³³ Uzalilengisa iveli ezingwegweni, uwufake umtshokotsho wobufakazi ngaphakathi kweveli; iveli lizakwahlukanisa indawo engcwele endaweni engcwele kakhulu.

³⁴ Usibeke isihlalo somusa phezu komtshokotsho wobufakazi endaweni engcwele kakhulu,

³⁵ ubeke itafula ngaphandle kweveli, loluthi lwesibane ohlangothini lwaseningizimu kweTabernakeli maqondana letafula, ubeke itafula ohlangothini lwasenyakatho.

³⁶ Uzakwenza iveli lomnyango wethente ngelembu elihle elilentambo ephothiweyo eluhlaza leyibubende lebomvu, kube ngumsebenzi womthungi.

³⁷ Ulenzele iveli insika ezinhlanu zomvagazi, uzibhade ngegolide; ingwegwe zazo zibe ngezegolide, uzikhandele inyawo zazo zibe ngezethusi.