U-Eksodasi 24 - iBhayibhili Elingcwele 1978

Ukumiswa kwesivumelwano

¹ UNkulunkulu wathi kuMose: Khwela uze eNkosini wena kanye loAroni loNadabi loAbihu labalisa bakoIsrayeli abangamatshumi ayisikhombisa, lingikhonze likhatshana.

² NguMose yedwa ozasondela eNkosini, kodwa bona kabayikusondela; labantu bonke kabayikukhwela kanye laye.

³ UMose weza wabatshela abantu wonke amazwi eNkosi lezahlulelo zonke; bonke abantu baphendula ngalizwi linye bathi: Sizakuwenza wonke amazwi iNkosi ewakhulume kithi.

⁴ UMose waseloba wonke amazwi eNkosi. Wavuka ekuseni, wakha ialtare phansi kwentaba kanye lensika zokukhonzela ezilitshumi lambili ezilingana izizwe zakoIsrayeli.

⁵ Wathuma insizwa zabantu bakoIsrayeli ukuba zinikele iminikelo yokutshiswa, zihlabele iNkosi imihlatshelo yokuthula yezinkabi.

⁶ UMose wathatha ingxenye yegazi, wayithela emiganwini; lengxenye wayikhaphazela ealtareni.

⁷ Wathatha incwadi yesivumelwano, wayibala phambi kwabantu. Bathi: Konke iNkosi ekutshiloyo sizakukwenza, silalele.

⁸ UMose wasethatha igazi, walikhaphazela ebantwini, wathi: Khangelani igazi lesivumelwano iNkosi esenze lani ngawo wonke lamazwi.

⁹ Basebekhwelake uMose loAroni loNadabi loAbihu kanye labalisa bakoIsrayeli abangamatshumi ayisikhombisa,

¹⁰ bambona uNkulunkulu wakoIsrayeli; kwakukhona ngaphansi kwenyawo zakhe okungathi ngamatshe amasafire agandelweyo, acwebileyo njengezulu.

¹¹ Kasibekanga isandla sakhe kuzo izikhulu zakoIsrayeli. Sebembonile uNkulunkulu badla, banatha.

UMose usentabeni yaseSinayi

¹² INkosi yasisithi kuMose: Khwela uze kimi entabeni, uhlale khona; ngizakukunika amatshe engilobe kuwo umlayo lemithetho ukuba ubafundise yona.

¹³ Wasukake uMose lenceku yakhe uJoshuwa; uMose wakhwela entabeni kaNkulunkulu.

¹⁴ Wathi ebaliseni: Silindeleni lapha size sibuye kini; nampo uAroni loHuri; olendaba kaye kubo.

¹⁵ UMose wasekhwela entabeni, leyezi lasibekela intaba.

¹⁶ Inkazimulo yeNkosi yahlala entabeni yaseSinayi; iyezi layisibekela insuku eziyisithupha; ngosuku lwesikhombisa yambiza uMose iseyezini.

¹⁷ Inkazimulo yeNkosi yabonakala engqongeni yentaba, emehlweni abakoIsrayeli, yayinjengomlilo otshisa uqothule.

¹⁸ UMose wakhwela entabeni, wangena eyezini; wahlala entabeni insuku ezingamatshumi amane lobusuku obungamatshumi amane.