U-Eksodasi 23 - iBhayibhili Elingcwele 1978

Imithetho yokulunga leyobumnene

¹ Ungayixoxi indaba yamanga, ungahlangani lomuntu omubi ukuba ube ngufakazi wamanga.

² Ungalandeli inengi labantu ukwenza okubi, ungabasekeli ngokufakaza ecaleni ukuba kwenziwe isahlulelo esibi;

³ lomyanga ungamvuni ecaleni lakhe.

⁴ Lapho ubona inkabi loba ubabhemi wesitha sakho kuduha, uzakukubuyisela kuso.

⁵ Lapho ubona ubabhemi walowo okuzondayo elekwe ngumthwalo wakhe, ungamyekeli kodwa umkhulule kuwo.

⁶ Kawuyikwenzela umyanga isahlulelo esibi ecaleni lakhe.

⁷ Hlala khatshana lendaba yamanga, ungabulali ongelacala lolungileyo, ngoba kangiyikumyekela owonileyo.

⁸ Kawuyikwamukela isiphiwo, ngoba isiphiwo siphumputhekisa ababonayo, sonakalise indaba yabalungileyo.

⁹ Kawuyikumcindezela umuntu wezizweni; ngoba liyayazi inhliziyo yomuntu wezizweni lokhu lani lalingabezizweni elizweni laseGibithe.

Imithetho yeSabatha leyemikhosi emithathu

¹⁰ Iminyaka eyisithupha uzakulima isiqinti sakho, uvune izithelo zaso.

¹¹ Kodwa ngomnyaka wesikhombisa uzakusiyekela sibe lifusi, ukuba abayanga bakini badle, lalokho okuseleyo kudliwe zinyamazana zeganga. Wenze njalo langesivini sakho langamaoliva akho.

¹² Ngensuku eziyisithupha uzakwenza umsebeni wakho, uphumule ngosuku lwesikhombisa, kuphumule futhi lenkabi yakho labobabhemi bakho, kuvuseleleke indodana yencekukazi yakho kanye lowezizweni.

¹³ Qaphelani konke lokhu esengikutshilo kini, lingawaphathi amabizo abanye onkulunkulu, angezwakali emilonyeni yenu.

¹⁴ Kathathu ngomnyaka uzangigcinela umkhosi.

¹⁵ Uzakugcina umkhosi wesinkwa esingelamvubelo, udle isinkwa esingelamvubelo insuku eziyisikhombisa ngesikhathi esimisiweyo senyanga kaAbibi, njengokukulaya kwami; ngoba waphuma eGibithe ngaleyonyanga; kakuzukuza muntu phambi kwami engaphethe lutho.

¹⁶ Uzagcina umkhosi wesivuno sezithelo zokuqala zomsebenzi wakho, lesokuhlanyelwe ensimini; uzagcina umkhosi wesivuno ekupheleni komnyaka, lapho usubuthile isivuno sakho ensimini.

¹⁷ Kathathu ngomnyaka bonke abesilisa bazakuza phambi kweNkosi uNkulunkulu.

¹⁸ Kawuyikunikela igazi lomhlatshelo wami kanye lesinkwa esilemvubelo. Amafutha omkhosi wami angalali kuze kuse.

¹⁹ Ikhethelo lezithelo zokuqala zamasimu akho uzakuliletha endlini yeNkosi uNkulunkulu wakho. Ungapheki izinyane ngochago lukanina.

Isithunywa seNkosi sithunywa ukuba sibahole abakoIsrayeli

²⁰ Ngiyathuma isithunywa phambi kwakho ukuba sikulondoloze endleleni, sikuse endaweni engiyilungisileyo.

²¹ Siqaphele, ulalele ilizwi laso; ungasivukeli, ngoba kasiyikukuthethelela isiphambeko sakho; ngoba ibizo lami likuso.

²² Kodwa uba ulalela ilizwi laso, wenze konke engikutshoyo, ngizakuba yisitha sezitha zakho, ngiphambane labaphambana lawe.

²³ Isithunywa sami sizahamba phambi kwakho, sikuse kuwo amaAmori lamaHethi lamaPerizi lamaKanani lamaHivi lamaJebusi. Ngizababhubhisa.

²⁴ Ungakhothameli onkulunkulu babo, ungabakhonzi, ungenzi njengokwenza kwabo; kodwa ubachithe impela, ubhidlize insika ezingcwele zabo.

²⁵ Lizakhonza iNkosi uNkulunkulu wenu; ngizabusisa ukudla kwenu lamanzi enu, ngisuse izifo phakathi kwenu.

²⁶ Kakuyikuba khona okuphunzayo lokuyinyumba elizweni lakini. Ngizaphelelisa insuku zenu.

²⁷ Ngizathuma ukwesabeka kwami phambi kwakho, ngiphambanise bonke abantu ozafika kubo, ngenze izitha zakho zonke zikubalekele.

²⁸ Ngizathuma olonyovu phambi kwakho abazaxotsha amaHivi lamaKanani lamaHethi phambi kwakho.

²⁹ Kangiyikubaxotsha phambi kwakho ngomnyaka owodwa, funa ilizwe libe yinkangala, lenyamazana zeganga zande kakhulu.

³⁰ Ngizabaxotsha phambi kwakho kancinyane lakancinyane, uze wande, udle ilifa lelizwe.

³¹ Ngizakumisa imikhawulo yakho kusukela oLwandle oluBomvu kuze kufike olwandle lwamaFilistiya, kusukela enkangala kuze kufike emfuleni iYufrathi; ngoba ngizanikela esandleni sakho abakhileyo belizwe; uzabaxotsha phambi kwakho.

³² Ungenzi isivumelwano labo kanye labonkulunkulu babo.

³³ Kabayikuhlala elizweni lakini, funa bakwenze ukuba wone kimi; ngoba ukukhonza onkulunkulu babo kuzakuba yisifu kuwe.