U-Eksodasi 22 - iBhayibhili Elingcwele 1978

Imithetho yempahla eyebiweyo leyenikezwe ukulondolozwa

¹ Uba umuntu eseba inkabi loba imvu, ayihlabe ingabe ayithengise, uzahlawula inkabi eyodwa ngenkabi ezinhlanu, lemvu eyodwa ngezimvu ezine. Uzakuhlawula; uba engelalutho, uzathengiswa ngenxa yokweba kwakhe.

² Uba isela lificwa lifohlela endlini, litshaywe lize life, umninindlu kayikuba lecala legazi.

³ Kodwa uba ilanga laseliphumile, uzakuba lecala legazi.

⁴ Uba okwebiweyo kufunyaniswa kuye kusaphila, loba kuyinkabi loba kungubabhemi ingabe kuyimvu, uzahlawula kuphindwe kabili.

⁵ Nxa umuntu edlisa ensimini ingabe esivinini, ayekele inkomo zakhe zingene zidle ensimini ingabe esivinini somunye, uzahlawula ngokuhle kwensimu yakhe lokuhle kwesivini sakhe.

⁶ Uba kuthungelwa umlilo, ulumathe emeveni kuze kutshe lenhlanga zamabele loba amabele angakavunwa loba insimu, othungele umlilo uzahlawula ngakho konke.

⁷ Uba umuntu enikeza umakhelwane wakhe imali loba impahla ukuba ayilondoloze, beseyebiwa endlini yalowomuntu, isela lizahlawula kuphindwe kabili uba lifunyanwa.

⁸ Kodwa uba isela lingafunyanwa, umninindlu uzasondela kuNkulunkulu ukuba kubonwe ukuthi kafakanga yini isandla empahleni yomakhelwane wakhe.

⁹ Ngezindaba zonke zamacala, eyenkabi lekababhemi leyemvu leyezambatho, ingabe eyempahla elahlekileyo umuntu atsho ngayo ukuthi ngeyakhe, indaba yabo bobabili izabekwa phambi kukaNkulunkulu; olahlwa nguNkulunkulu uzahlawula umakhelwane wakhe kuphindwe kabili.

¹⁰ Uba umuntu enikeza kumakhelwane wakhe ubabhemi loba inkabi loba imvu ingabe imfuyo nje ukuba akulondoloze, besekusifa loba kulimala ingabe kuthunjwe, kungabonwa muntu,

¹¹ uzafunga isifungo phambi kwakhe laphambi kweNkosi ukuthi kafakanga isandla empahleni yomakhelwane wakhe; umniniyo uzasamukela isifungo sakhe, angahlawuli lutho.

¹² Kodwa uba yebiwe kuye, uzamhlawula umniniyo.

¹³ Uba idatshuliwe, kayilethe ibe yibufakazi, angayihlawuli edatshuliweyo.

¹⁴ Uba umuntu eseboleka ulutho kumakhelwane wakhe, beselulimala loba lusifa umninilo engekho, uzahlawula konke.

¹⁵ Kodwa uba umninilo ekhona, kayikukuhlawula; uba bekuqatshiwe, imali yokuqatsha kayihlawulwe.

Imithetho emayelana lamanye amacala

¹⁶ Uba umuntu eyenga intombi engakhombanga, alale layo, uzakuyilobola ibe ngumkakhe.

¹⁷ Uba uyise esala impela ukumnika yona, uzahlawula imali elingana lelobolo lentombi.

¹⁸ Lingayekeli umthakathi ukuba aphile.

¹⁹ Olala lenyamazana kabulawe.

²⁰ Onikela kwabanye onkulunkulu ngaphandle kweNkosi kabhujiswe.

²¹ Lingamoni umuntu wezizweni, lingamhluphi; ngoba lani lalingabantu bezizweni kwelaseGibithe.

²² Lingahluphi umfelwakazi lentandane.

²³ Uba libahlupha, bakhale kimi, ngizakuzwa ukukhala kwabo,

²⁴ luvuthe ulaka lwami, ngilibulale empini, omkenu babe ngabafelwakazi labantwana benu babe yizintandane.

²⁵ Uba liseboleka umyanga othile ebantwini bami imali, lingamphathi njengomebolekisi, lingathathi inzalo kuye.

²⁶ Uba lithatha ingubo yomakhwelwane wenu ibe yisibambiso, ibuyiseleni kuye lingakatshoni ilanga;

²⁷ ngoba iyiso sodwa isambatho sakhe sokwambathisa umzimba wakhe; uzakulala ngani na? Lapho ekhala kimi, ngizamuzwa, ngoba ngilomusa.

²⁸ Lingathuki uNkulunkulu, lingaqalekisi induna yabantu bakini.

²⁹ Lingaphuzi ukunikela isivuno senu lewayini lenu. Lizakunginika amazibulo emadodaneni enu,

³⁰ lenze njalo langezinkabi zenu lezimvu zenu; azahlala lonina insuku eziyisikhombisa; ngosuku lwesificaminwembili linginike wona.

³¹ Lina lizakuba ngabantu abangcwele kimi; ngakhoke lingadli inyama edatshulwe yizilo zeganga, kodwa iphoseni ezinjeni.