U-Eksodasi 21 - iBhayibhili Elingcwele 1978

Imithetho yokuphatha izigqili

¹ Yilimithetho ozakuyimisa phambi kwabantu.

² Uba uthenga isigqili esingumHeberu, sizakukusebenzela iminyaka eyisithupha; sizakukhululeka ngesihle ngomnyaka wesikhombisa.

³ Uba sifika kuwe sisodwa, sizaphuma sisodwa; uba sithethe, umkaso uzaphuma laso.

⁴ Uba inkosi yaso isinika umfazi, asizalele amadodana lamadodakazi, yena labantwana bakhe bazakuba ngabenkosi, isigqili siphume sisodwa.

⁵ Kodwa uba isigqili sisitsho isibili ukuthi: Ngiyayithanda inkosi yami lomkami labantwana bami, kangiyikuphuma ngikhululekile;

⁶ inkosi yaso izakusiletha kuNkulunkulu, isimise emnyango loba ensikeni yomnyango, ibhoboze indlebe yaso ngosungulo, siyisebenzele size sife.

⁷ Uba umuntu ethengisa indodakazi yakhe ukuba ibe yisigqilikazi, kayiyikuphuma njengalokhu izigqili ziphuma.

⁸ Uba isigqilikazi singayithokozisi inkosi yaso ezithathele sona, izakuvuma ukuba sihlengwe; inkosi yaso kayizukuba lamandla okusithengisa kwabezizwe njengokuba isikhohlisile.

⁹ Uba isithathela indodana yayo, izakusiphatha njengendodakazi yayo.

¹⁰ Uba ithatha omunye umfazi, kayiyikusincitsha ukudla kwaso lengubo zaso lamalungelo omtshado.

¹¹ Uba ingasenzeli lezizinto ezintathu, sizaphuma sikhululekile ngesihle.

Imithetho emayelana labalimazayo lababulalayo

¹² Otshaya umuntu aze afe, uzakubulawa.

¹³ Kodwa uba ebengamcathamelanga, kodwa wanikelwa esandleni sakhe nguNkulunkulu, ngizakukukhethela indawo ukuba abalekele kuyo.

¹⁴ Kodwa uba umuntu esukela umakhelwana wakhe ambulale ngobuqili, uzakumsusa lakulo ialtare lami ukuba abulawe.

¹⁵ Otshaya uyise ingabe unina, uzakubulawa.

¹⁶ Oweba umuntu, amthengise, loba efunyanwa elaye, uzakubulawa.

¹⁷ Othuka uyise ingabe unina, uzakubulawa.

¹⁸ Nxa abantu besilwa, omunye atshaye omunye ngelitshe ingabe ngenqindi, angambulali kodwa amlimaze aze alale embhedeni,

¹⁹ uba elulama atotobe ngodondolo lwakhe, lowo omtshayileyo uzakuyekelwa. Kodwa uzamhlawula isikhathi sokulala kwakhe, amonge aze asile ngokupheleleyo.

²⁰ Uba umuntu etshaya isigqili sakhe ingabe isigqilikazi sakhe ngenduku asibulale ngesandla sakhe, uzakujeziswa.

²¹ Kanti nxa siphile usuku lwaba lunye ingabe insuku ezimbili, kayikujeziswa, ngoba siyimpahla yakhe.

²² Nxa abantu besilwa, balimaze owesifazana okhulelweyo aze aphumise isisu sakhe, angehlelwa ngenye ingozi, omlimazileyo uzahlawuliswa njengokubiza kwendoda yakhe, ahlawule njengesiqumo sabahluleli.

²³ Kodwa uba esehlelwa yingozi, ukuphila kakwenanwe ngokuphila,

²⁴ ilihlo ngelihlo, izinyo ngezinyo, isandla ngesandla, unyawo ngonyawo,

²⁵ ukutshiswa ngokutshiswa, inxeba ngenxeba, umvimvinya ngomvimvinya.

²⁶ Uba umuntu etshaya ilihlo lesigqili sakhe ingabe ilihlo lesigqilikazi sakhe alibulale, uzakusikhulula sihambe ngenxa yelihlo laso.

²⁷ Uba etshaya izinyo lesigqili ingabe izinyo lesigqilikazi likhumuke, uzakusikhulula sihambe ngenxa yezinyo laso.

Imithetho emayelana lezinkabi ezihlabayo

²⁸ Uba inkabi ihlaba owesilisa ingabe owesifazana afe, inkabi izakhandwa ngamatshe, inyama yayo ingadliwa; kodwa umnininkabi uzayekelwa.

²⁹ Kodwa uba inkabi ibikade ihlaba langaphambili, lomniniyo azisiwe ngalokhu, kodwa engayilondolozanga yaze yabulala owesilisa ingabe owesifazana, leyonkabi izakhandwa ngamatshe lomniniyo abulawe.

³⁰ Uba ehlawuliswa, uzahlawula yonke leyonhlawulo ukuba kuhlengwe ukuphila kwakhe.

³¹ Loba ihlaba indodana ingabe indodakazi, kakwenziwe kuye njengomthetho lo.

³² Nxa inkabi ihlaba inceku ingabe incekukazi, umniniyo uzanika inkosi yayo amashekeli esiliva angamatshumi amathathu, inkabi ikhandwe ngamatshe.

³³ Uba umuntu etshiya umgodi ukhamisile, loba esimba umgodi angawusibekeli, kukhalakathele kuwo inkabi ingabe ubabhemi,

³⁴ umninimgodi ulomlandu, amnike umniniyo imali, inkabi efileyo ibe ngeyakhe.

³⁵ Uba inkabi yomuntu ihlaba eyomunye ife, inkabi ephilayo izathengiswa, bahlukaniselane imali yayo, bahlukaniselane lenkabi efileyo futhi.

³⁶ Kodwa uba kusaziwa ukuthi inkabi ibikade ihlaba langaphambili, umniniyo engayilondolozanga, uzahlawula inkabi ngenkabi, efileyo ibe ngeyakhe.