U-Eksodasi 20 - iBhayibhili Elingcwele 1978

Imithetho elitshumi

¹ UNkulunkulu wasekhuluma wonke lamazwi esithi:

² NgiyiNkosi uNkulunkulu wakho eyakukhupha eGibithe, endaweni yobugqili.

³ Ungabi labanye onkulunkulu ngaphandle kwami.

⁴ Ungazenzeli izithombe ezibaziweyo lomfanekiso walokho okusezulwini lalokho okusemhlabeni lalokho okusemanzini angaphansi komhlaba;

⁵ ungazikhothameli, ungazikhonzi; ngoba mina Nkosi, uNkulunkulu wakho, nginguNkulunkulu olomona; ngehlisela ububi baboyise ebantwaneni besizukulwana sesithathu lesesine sabangizondayo,

⁶ kodwa ngilothando olungapheliyo ezizukulwaneni eziyinkulungwane zabangithandayo abagcina imilayo yami.

⁷ Ungalisebenzisi ngeze ibizo leNkosi uNkulunkulu wakho; ngoba olisebenzisa ngeze ibizo layo uzakuba lecala phambi kweNkosi.

⁸ Khumbula usuku lweSabatha, ulwenze lube ngcwele.

⁹ Uzakusebenza insuku eziyisithupha, uwenze wonke umsebenzi wakho;

¹⁰ kodwa usuku lwesikhombisa luliSabatha leNkosi uNkulunkulu wakho; ungasebenzi ngalo wena lendodana yakho lendodakazi yakho lenceku yakho lencekukazi yakho lenkomo zakho lowemzini osemzini wakho.

¹¹ Ngoba ngensuku eziyisithupha iNkosi yenza izulu lomhlaba lolwandle lakho konke okukukho, yaphumula ngosuku lwesikhombisa; ngalokhu iNkosi yalubusisa usuku lwesikhombisa, yalwenza lwaba ngcwele.

¹² Hlonipha uyihlo lonyoko, ukuze zibe zinengi insuku zokuhamba kwakho elizweni ekunika lona iNkosi uNkulunkulu wakho.

¹³ Ungabulali.

¹⁴ Ungafebi.

¹⁵ Ungebi.

¹⁶ Ungafakazi amanga ngomakhelwana wakho.

¹⁷ Ungabi lamhawu ngendlu kamakhelwana wakho, lomkakhe, lenceku yakhe, lencekukazi yakhe, lenkabi yakhe, lobabhemi wakhe, langolunye ulutho lwakhe.

Ukwesaba kwabantu

¹⁸ Kwathi lapho abantu bonke besizwa ukuduma lokukhala kophondo, lalapho bebona imibane lokuthunqa kwentaba bathuthumela, bema khatshana;

¹⁹ bathi kuMose: Khuluma lathi wena, sizakuzwa; kodwa uNkulunkulu kangakhulumi kithi funa sife.

²⁰ UMose wathi ebantwini: Lingesabi; ngoba uNkulunkulu ufikile ukuba alilinge, ukuze limesabe, lingoni.

²¹ Abantu bema khatshana; kodwa uMose wasondela emnyameni omkhulu lapho uNkulunkulu ayekhona.

Umthetho omayelana lealtare

²² INkosi yathi kuMose: Tshono kwabakoIsrayeli uthi: Lina ngokwenu selizibonele ukuthi ngikhulume kini ngisezulwini.

²³ Lingenzi onkulunkulu besiliva ukuba babe khona kanye lami, lingazenzeli onkulunkulu begolide.

²⁴ Lingenzele ialtare lomhlabathi, linikele kulo iminikelo yenu yokutshiswa leminikelo yenu yokuthula, izimvu lenkabi zenu. Kuzo zonke indawo lapho ngilenza ibizo lami ukuba likhunjulwe khona ngizakuza kini ngilibusise.

²⁵ Uba lingenzela ialtare lelitshe, lingalenzi ngamatshe abaziweyo; ngoba nxa lilitshaya ngensimbi yokubaza, liyalingcolisa.

²⁶ Lingakhweli phezu kwealtare lami ngezikhwelo, funa kwambulwe ubunqunu benu.