U-Eksodasi 19 - iBhayibhili Elingcwele 1978

AbakoIsrayeli bafika eSinayi

¹ Ngenyanga yesithathu emva kokuphuma kwabakoIsrayeli eGibithe, bafika enkangala yaseSinayi.

² Sebesukile eRefidimi, baya bafika enkangala yaseSinayi, bamisa enkangala ngasentabeni, bahlala khona.

³ UMose wenyukela kuNkulunkulu entabeni. INkosi yambiza isentabeni yathi: Tshono kuyo indlu kaJakobe, ubatshele abakoIsrayeli uthi:

⁴ Likubonile lokho engikwenze kumaGibithe, lokuthi ngalithwala ngempiko zokhozi, ngalisondeza kimi.

⁵ Ngakhoke uba lililalela ilizwi lami, ligcine isivumelwano sami, lizakuba ligugu kimi phakathi kwezizwe zonke; ngoba wonke umhlaba ungowami;

⁶ lizakuba ngumbuso wabapristi lesizwe esingcwele kimi. Yiwo amazwi ozakuwatsho kwabakoIsrayeli.

⁷ UMose wayabiza abalisa babantu, wabatshela wonke amazwi la emlaye wona iNkosi.

⁸ Bonke abantu baphendula kanyekanye bathi: Konke iNkosi ekukhulumileyo sizakukwenza. UMose wabika eNkosini amazwi abantu.

⁹ INkosi yathi kuMose: Ngiyeza kuwe ngeyezi elimnyama ukuba abantu bezwe nxa ngikhuluma lawe, bakukholwe kuze kube nininini. UMose wayibikela iNkosi amazwi abantu.

¹⁰ INkosi yathi kuMose: Hamba uye ebantwini, ubatshele bazihlambulule lamuhla lakusasa, bagezise ingubo zabo,

¹¹ babe sebelungile ngosuku lwesithathu; ngoba ngosuku lwesithathu iNkosi izakwehlela entabeni yaseSinayi phambi kwabantu bonke.

¹² Uzakubamisela abantu umkhawulo inxa zonke uthi: Qaphelani ukuba lingakhweli entabeni, lingafinyeleli ewatheni layo. Lowo othinta intaba uzakubulawa;

¹³ kazukuthintwa ngesandla, kodwa uzakukhandwa ngamatshe loba ahlatshwe ngomkhonto; loba kuyinyamazana loba kungumuntu, kakuyikuphila. Lapho uphondo selukhala okwesikhathi eside bazakuza entabeni.

¹⁴ UMose wehla entabeni waya ebantwini, wabatshela ukuba bazihlambulule, bagezise ingubo zabo.

¹⁵ Wathi ebantwini: Libe selilungile ngosuku lwesithathu; lingasondeli kowesifazana.

¹⁶ Ngosuku lwesithathu sekusile, kwaba khona ukuduma lemibane leyezi elimnyama entabeni, kwezwakala ukukhala okukhulu kophondo; bonke abantu ababesemathenteni bathuthumela.

¹⁷ UMose wasebakhupha abantu emathenteni ukuyamhlangabeza uNkulunkulu; bema ngaphansi kwentaba.

¹⁸ Intaba yaseSinayi yayithunqa intuthu, ngoba iNkosi yehlela phezu kwayo ngomlilo; intuthu yayo yenyuka njengentuthu yesithando somlilo; intaba yonke yazamazama kakhulu.

¹⁹ Ukukhala kophondo kwayakukhula. UMose wakhuluma, uNkulunkulu wamphendula ngokuduma.

²⁰ INkosi yehlela entabeni yaseSinayi, yafika engqongeni yentaba; yambiza uMose ukuba eze engqongeni yentaba; uMose wakhwela.

²¹ INkosi yathi kuMose: Yehla, ubaxwayise abantu funa bafohle ukuzabona iNkosi, bafe abanengi.

²² Labapristi abasondela eNkosini bazihlambulule funa iNkosi ibadumele.

²³ UMose wathi eNkosini: Abantu bangekhwele entabeni yaseSinayi, ngoba wena usilayile wathi: Misa umkhawulo entabeni, uyahlukanise ibe ngcwele.

²⁴ INkosi yathi kuye: Yehla, ubuye ukhwele uze kimi kanye loAroni; kodwa abapristi labantu ungabavumeli ukuba bafohle beze eNkosini, funa ibadumele.

²⁵ UMose wehla waya ebantwini, wabatshela.