U-Eksodasi 18 - iBhayibhili Elingcwele 1978

UJetro uhambela uMose

¹ UJetro umpristi waseMidiyani, uyisezala kaMose, wezwa konke uNkulunkulu amenzele khona uMose labakoIsrayeli abantu bakhe, ukuthi iNkosi yayibakhuphile eGibithe.

² UJetro uyisezala kaMose wamamukela uZipora umkaMose emva kokumbuyisela kwakhe uMose,

³ kanye lamadodana akhe amabili; ibizo lenye lalinguGereshoma, ngoba wathi: Ngangihlala elizweni lasezizweni;

⁴ ibizo lenye linguEliyezeri, ngoba wathi: UNkulunkulu kababa ube ngumsizi wami, wangikhulula emkhontweni kaFaro.

⁵ UJetro uyisezala kaMose wafika kuMose enkangala elamadodana akhe lomkakhe, ngasentabeni kaNkulunkulu lapho wayemise khona amathente akhe.

⁶ Kwabikwa kuMose kwathiwa: UJetro uyihlozala uyeza kuwe kanye lomkakho lamadodana akho amabili.

⁷ UMose waphuma ukumhlangabeza uyisezala, wakhothama, wamanga. Babuzana impilo; bangena ethenteni.

⁸ UMose wasemlandisela uyisezala ngakho konke iNkosi eyayikwenzile kuFaro lakuwo amaGibithe ngenxa yabakoIsrayeli, langezinhlupheko zonke ezazibehlele endleleni, lokuthi iNkosi yayibakhulule.

⁹ UJetro wathokoza ngakho konke okuhle iNkosi ebikwenzele abakoIsrayeli ngokubakhulula kwayo ezandleni zamaGibithe.

¹⁰ UJetro wathi: Kayibongwe iNkosi elikhulule ezandleni zamaGibithe lasesandleni sikaFaro; yabophula abantu ababecindezelwa ngamaGibithe.

¹¹ Khathesi sengisazi ukuthi iNkosi yinkulu kulabo bonke onkulunkulu, yebo kulokho amaGibithe ayezigabisa ngakho.

¹² UJetro uyisezala kaMose wanikela kuNkulunkulu umnikelo wokutshiswa lemihlatshelo; kweza uAroni labo bonke abalisa bakoIsrayeli, badla loyisezala kaMose phambi kukaNkulunkulu.

Ukubekwa kwabahluleli

¹³ Kwathi kusisa uMose wahlala ukwahlulela abantu; abantu bema kuMose kusukela ekuseni kwaze kwahlwa.

¹⁴ Kwathi lapho uyisezala kaMose esekubonile konke uMose akwenzela abantu wathi: Kuyini lokhu okwenzela abantu na? Uhlalelani wedwa, abantu bonke bemi kuwe kusukela ekuseni kuze kuhlwe na?

¹⁵ UMose wathi kuyisezala: Kungoba abantu beza kimi ukubuza kuNkulunkulu;

¹⁶ nxa belendaba, beza kimi, ngahlulele phakathi komuntu lomakhelwane wakhe, ngibazise imithetho lemilayezelo kaNkulunkulu.

¹⁷ Uyisezala kaMose wathi kuye: Lokho okwenzayo kakulunganga.

¹⁸ Impela uzakuzidinisa kanye lalababantu abalawe; ngoba lokhu kuyakusinda, kawulakukwenza wedwa.

¹⁹ Lalela ilizwi lami; ngizakukweluleka, uNkulunkulu abe lawe. Ube ngumkhulumeli wabantu phambi kukaNkulunkulu, ulethe izindaba zabo kuNkulunkulu,

²⁰ ubafundise imithetho lemilayezelo, ubatshengise indlela abamele bahambe ngayo, lezinto abamele bazenze.

²¹ Futhike ukhethe phakathi kwabo bonke abantu amadoda alamandla, amesabayo uNkulunkulu, aqotho, azonda inzuzo engalunganga, uwabeke phezu kwabantu ukuba abe yizinduna zezinkulungwane lezinduna zamakhulu lezinduna zamatshumi amahlanu lezinduna zamatshumi;

²² kube yizo ezahlulela abantu ngazo zonke izikhathi, kulethwe kuwe zonke indaba ezinkulu, kodwa indaba ezincinyane zahlulelwe yizo, ukuze kube lula kuwe, zithwalisane lawe.

²³ Uba usenza lokhu, loNkulunkulu evumelana lakho, uzakuba lamandla okusebenza, labo bonke lababantu bazabuyela endaweni zabo ngokuthula.

²⁴ UMose walilalela ilizwi likayisezala, wenza konke akutshiloyo.

²⁵ UMose wakhetha amadoda alamandla phakathi kwabo bonke abakoIsrayeli, wawabeka aba yizinhloko zabantu, induna zezinkulungwane lezinduna zamakhulu lezinduna zamatshumi amahlanu lezinduna zamatshumi.

²⁶ Zabahlulela abantu ngezikhathi zonke; zaletha kuMose indaba ezinkulu, kodwa indaba ezincinyane zazahlulela zona.

²⁷ UMose wamvalelisa uyisezala; wasuka wabuyela elizweni lakibo.