U-Eksodasi 17 - iBhayibhili Elingcwele 1978

AbakoIsrayeli basola uMose ngamanzi

¹ Ibandla lonke lakoIsrayeli lasuka enkangala yaseSini, lahamba lihlala amalombolombo njengokulaya kweNkosi, lamisa eRefidimi; kodwa kwakungelamanzi okunatha.

² Ngakho abantu bamsola uMose bathi: Sinike amanzi, sinathe. UMose wathi kubo: Lingisolelani na? Liyilingelani iNkosi na?

³ Lapho abantu bomela amanzi, bamsola uMose bathi: Wasikhuphelani eGibithe ukuba usibulale thina labantwana bethu lenkomo zethu ngokoma na?

⁴ UMose wasekhala eNkosini esithi: Ngizakwenza njani kulababantu? Sebelungele ukungikhanda ngamatshe.

⁵ INkosi yathi kuMose: Dlulela phambi kwabantu, uhambe labanye babalisa bakoIsrayeli, uphathe intonga yakho owatshaya umfula ngayo, uhambe.

⁶ Ngizakuma phambi kwakho edwaleni eliseHorebe; uzalitshaya idwala, kuphume kulo amanzi ukuze abantu banathe. UMose wenza njalo phambi kwabalisa bakoIsrayeli.

⁷ Wabiza indawo leyo ngokuthi yiMasa lokuthi yiMeriba ngenxa yokusola kwabakoIsrayeli langenxa yokuyilinga kwabo iNkosi besithi: INkosi ilathi yini loba atshi na?

Ukulwa kwabo loAmaleki

⁸ Kwasekufika uAmaleki, walwa labakoIsrayeli eRefidimi.

⁹ UMose wasesithi kuJoshuwa: Sikhethele amadoda, uphume uyekulwa loAmaleki; kusasa ngizakuma engqongeni yentaba, intonga kaNkulunkulu isesandleni sami.

¹⁰ UJoshuwa wenza njengokutsho kukaMose, walwa loAmaleki. UMose loAroni loHuri bakhwela engqongeni yentaba.

¹¹ Kwathi lapho uMose ephakamisa isandla sakhe, abakoIsrayeli banqoba; kodwa lapho eyehlisa, uAmaleki wanqoba.

¹² Kodwa izandla zikaMose zadinwa. Ngakho basebethatha ilitshe, balibeka phansi kwakhe, wahlala kulo. UAroni loHuri babamba izandla zakhe, omunye engapha lomunye engale, ukuba zihlale ziqinile laze latshona ilanga.

¹³ UJoshuwa wamchitha uAmaleki labantu bakhe.

¹⁴ INkosi yasisithi kuMose: Loba lokhu ogwalweni kube yisikhumbuzo, ukuqonqosele uJoshuwa ukuthi ngizakuqothula ukukhunjulwa kukaAmaleki emhlabeni.

¹⁵ UMose wakha ialtare, walitha ibizo lokuthi iNkosi iluphawu lwami;

¹⁶ wathi: Phatha uphawu lweNkosi. Izakulwa loAmaleki izizukulwana ngezizukulwana.