U-Eksodasi 16 - iBhayibhili Elingcwele 1978

UNkulunkulu unika abakoIsrayeli imana

¹ Basebesuka eElimi; yonke impi yakoIsrayeli yafika enkangala yaseSini, ephakathi kweElimi leSinayi, ngosuku lwetshumi lanhlanu lwenyanga yesibili emva kokuphuma kwabo eGibithe.

² Lonke ibandla lakoIsrayeli labasola oMose loAroni enkangala,

³ lathi kubo: Kungathi ngabe safa ngesandla seNkosi elizweni laseGibithe lapho sasihlezi khona ngasezimbizeni zenyama, sisidla sisutha; ngoba lisilethe kulinkangala ukuba libulale lonke lelibandla ngendlala.

⁴ INkosi yasisithi kuMose: Ngizakulehlisela isinkwa sivela ezulwini; abantu bazaphuma insuku ngensuku babuthe isabelo esilingene usuku, ukuze ngibalinge, ngibone ukuthi bazakuhamba ngomlayo wami yini.

⁵ Kuzakuthi ngosuku lwesithupha balungise lokho abakubuthileyo, kuphindwe kabili kulokho abakubuthayo insuku ngensuku.

⁶ UMose loAroni bathi kubo bonke abakoIsrayeli: Kusihlwa lizakwazi ukuthi yiNkosi elikhuphileyo elizweni laseGibithe;

⁷ kusasa lizabona inkazimulo yeNkosi, ngoba izwile ukuyisola kwenu. Thina siyini ukuba lisisole na?

⁸ UMose wathi: INkosi izalinika inyama ibe yikudla kwenu kusihlwa, ilinike isinkwa ekuseni ukuba lidle lisuthe; ngoba iNkosi izwile ukusola kwenu eliyisola ngakho. Ngoba thina siyini? Ukusola kwenu kakungathi, kodwa kungeNkosi.

⁹ UMose wasesithi kuAroni: Tshono kulo lonke ibandla lakoIsrayeli uthi: Sondelani phambi kweNkosi, ngoba izwile ukusola kwenu.

¹⁰ Kwathi uAroni esakhuluma lebandla lonke lakoIsrayeli, bakhangela ngasenkangala, babona inkazimulo yeNkosi ibonakala eyezini.

¹¹ INkosi yakhuluma kuMose,

¹² yathi: Sengizwile ukusola kwabakoIsrayeli; batshele uthi: Kusihlwa lizakudla inyama, ekuseni lisuthe isinkwa, lazi ukuthi ngiyiNkosi uNkulunkulu wenu.

¹³ Kwathi kusihlwa kwafika izagwaca, zahlala indawo yonke; kusisa kwalala khona amazolo inxa zonke.

¹⁴ Esenyamalele amazolo, kwabonakala phansi enkangala inhlamvu ezincinyane ezifana longqoqwane emhlabathini.

¹⁵ Bathi bezibona abakoIsrayeli babuzana besithi: Kuyini lokhu? Ngoba babengazi ukuthi kuyini. UMose wathi kubo: Kuyisinkwa elinike sona iNkosi ukuba lidle.

¹⁶ Lokhu yikho iNkosi elilaye ngakho yathi: Ilowo lalowomuntu kakubuthe okulingene ukudla kwakhe, athathe iyomeri ngomuntu, abuthe okulingene abantu abasethenteni lakhe.

¹⁷ Abantu bakoIsrayeli benza njalo, abanye babutha okunengi labanye okuyingcosana.

¹⁸ Lapho sebelinganise ngeyomeri, lowo owayebuthe okunengi kabanga lokusalayo, lowayebuthe okuyingcosana kaswelanga; ilowo lalowo wayebuthe okulingene ukudla kwakhe.

¹⁹ UMose wathi kubo: Kungatshiywa lutho kukho kuze kube sekuseni.

²⁰ Kodwake kabamlalelanga uMose; abanye babo batshiya okunye kwaze kwaba sekuseni, kwagcwala impethu, kwanuka. UMose wabathukuthelela.

²¹ Insuku ngensuku bakubutha ekuseni, kwaba yilowo lalowomuntu wabutha okulingene ukudla kwakhe. Kodwa lapho ilanga selitshisa, kwancibilika.

²² Ngosuku lwesithupha babutha isinkwa esiphindwe kabili, kwaba ngamayomeri amabili ngomuntu. Zonke izinduna zabantu zaya kuMose, zamtshela lokhu.

²³ Wathi kuzo: Yikho iNkosi ekutshiloyo ukuthi: Kusasa kulusuku lokuphumula, iSabatha elingcwele leNkosi. Yosani lokho okufanele ukosiwa, lipheke lokho okufanele ukuphekwa, lizibekele lokho okuseleyo ukuba kugcinwe kuze kube sekuseni.

²⁴ Bakubeka kwaze kwaba sekuseni njengokulaya kukaMose. Kakunukanga, kakubanga lampethu.

²⁵ UMose wasesithi: Dlanini lokhu lamuhla, ngoba lamuhla kuliSabatha leNkosi; kaliyikukuthola egangeni lamuhla.

²⁶ Lizakukubutha insuku eziyisithupha; kodwa ngosuku lwesikhombisa oluliSabatha kakuyikuba khona.

²⁷ Kanti ngosuku lwesikhombisa kwaphuma abanye abantu ukukubutha, kodwa kabakutholanga.

²⁸ INkosi yathi kuMose: Koze kube nini lisala ukugcina imilayo yami lemithetho yami na?

²⁹ Njengoba iNkosi ilinikile iSabatha, iyalinika ngosuku lwesithupha isinkwa sensuku ezimbili; hlalani kube yilowo lalowo endaweni yakhe, kungaphumi muntu endaweni yakhe ngosuku lwesikhombisa.

³⁰ Ngakho abantu baphumula ngosuku lwesikhombisa.

³¹ Indlu yakoIsrayeli yakubiza ngokuthi yiMana; kwakunjengenhlanyelo emhlophe, kwezwakala emlonyeni njengezinkwa ezilenyosi.

³² UMose wathi: Lokhu yikho iNkosi elaye ngakho ukuthi: Kakugcinelwe izizukulwana zenu iyomeri eligcwele lokhu, ukuba zibone isinkwa engalinika sona enkangala ekulikhupheni kwami elizweni laseGibithe.

³³ UMose wathi kuAroni: Thatha inqayi, ufake kuyo imana elingena leyomeri eligcweleyo, uyibeke phambi kweNkosi, igcinelwe izizukulwana zenu.

³⁴ Njengokutsho kweNkosi kuMose, uAroni wayibeka phambi komtshokotsho ukuba igcinwe.

³⁵ AbakoIsrayeli badla imana iminyaka engamatshumi amane baze bafika elizweni elakhiweyo. Badla imana baze bafika emikhawulweni yaseKanani.

³⁶ Iyomeri liyingxenye yetshumi yehefa.