U-Eksodasi 15 - iBhayibhili Elingcwele 1978

Ihubo likaMose

¹ UMose labakoIsrayeli basebehlabelela lelihubo eNkosini, bathi: Ngizahlabelela iNkosi, ngoba inqobile, ilodumo. Ibhiza lomgadi walo ikuphosele olwandle.

² INkosi ingamandla ami lehubo lami, iyikusiliswa kwami. InguNkulunkulu wami, ngizakuyidumisa, loNkulunkulu kababa, ngizakuyiphakamisa.

³ INkosi iliqhawe, ithiwa yiNkosi.

⁴ Inqola zikaFaro lempi yakhe ikuphosele olwandle, induna zakhe ezikhethiweyo zitshone oLwandle oluBomvu.

⁵ Amanzi azikileyo azisibekela; zatshona enzikini njengelitshe.

⁶ Isandla sakho sokunene, Nkosi, sibe lodumo ngamandla aso, isandla sakho sokunene, Nkosi, siyaphahlaza isitha.

⁷ Ngobukhulu bobukhosi bakho uyachitha abakuvukelayo. Lapho uthuma ulaka lwakho, luyabatshisa njengezinhlanga.

⁸ Ngokufutha kwamakhala akho amanzi aba yinqwaba, amanzi agelezayo ema aba yinqumbi, amanzi azikileyo aba njengomduli phakathi kolwandle.

⁹ Isitha sathi: Ngizaxotshana labo ngibafice, ngahlukanise impango. Inkanuko yami izakusutha bona, ngizahwatsha umhedla wami, isandla sami sizababhubhisa.

¹⁰ Waphephetha ngomoya wakho, ulwandle lwabasibekela. Batshona njengomnuso emanzini amakhulu.

¹¹ Ngubani onjengawe, Nkosi, phakathi kwabonkulunkulu na? Ngubani onjengawe olobukhosi ngobungcwele, owesabekayo ngezenzo ezinkulu, owenza izimangaliso na?

¹² Lapho uselula isandla sakho sokunene, umhlaba wabaginya.

¹³ Ngomusa wakho ubaholile abantu obahlengileyo, ngamandla akho wabaholela endaweni yakho engcwele.

¹⁴ Izizwe zizwile, ziyathuthumela; abakhileyo eFilistiya batshaywe luvalo.

¹⁵ Izinduna zaseEdoma ziyaphaphatheka, izikhulu zaseMowabi zitshaywa luvalo, bonke abakhileyo eKanani baphela amandla.

¹⁶ Behlelwa luvalo lokwesaba; ngamandla engalo yakho kabanyikinyeki njengelitshe, baze bachaphe abantu bakho, Nkosi, baze bachaphe labo obathengileyo.

¹⁷ Uzabangenisa, ubamise entabeni yakho, indawo ozenzele yona, Nkosi, ukuba uhlale kuyo, indawo engcwele eziyimisileyo izandla zakho, Nkosi.

¹⁸ INkosi izakubusa kuze kube nini lanini.

¹⁹ Kwathi lapho amabhiza kaFaro engena olwandle kanye lenqola zakhe labagadi bamabhiza, iNkosi yabuyisela amanzi olwandle phezu kwabo, kodwa abakoIsrayeli bawela ulwandle behamba emhlabathini owomileyo.

²⁰ UMiriyamu umprofethikazi, udadewabo kaAroni, wasithatha isigubhu sakhe; bonke abesifazana baphuma bemlandela, bephethe izigubhu, begida.

²¹ UMiriyamu wabahlabelela wathi: Hlabelelani iNkosi, ngoba inqobile, ilodumo. Ibhiza lomgadi walo ikuphosele olwandle.

Amanzi ababayo aseMara

²² UMose wasebaholela phambili abakoIsrayeli besuka oLwandle oluBomvu, baya enkangala yaseShuri; bahamba enkangala insuku ezintathu bengafumani manzi.

²³ Kwathi lapho befika eMara babengelakuwanatha amanzi aseMara ngoba ayebaba; ngakhoke indawo yathiwa yiMara.

²⁴ Abantu bamsola uMose besithi: Sizakunathani?

²⁵ Wakhala eNkosini. INkosi yamtshengisa isihlahla; kwathi esesiphosele emanzini, amanzi aba mnandi. INkosi yabamisela khona isimiso lomthetho, yabalinga,

²⁶ yathi: Uba lilalela ilizwi leNkosi uNkulunkulu wenu ngenhliziyo yenu yonke, lenze okulungileyo emehlweni ayo, lilalele imilayo yayo, ligcine zonke izimiso zayo, kangiyikwehlisela phezu kwenu lasinye sezifo engazehlisela phezu kwamaGibithe; ngoba ngiyiNkosi eliphilisayo.

²⁷ Basebefika eElimi lapho kwakukhona imithombo elitshumi lambili yamanzi, lamalala angamatshumi ayisikhombisa; bamisa khona ngasemanzini.