U-Eksodasi 14 - iBhayibhili Elingcwele 1978

Ukuchithwa kwamaGibithe oLwandle oluBomvu

¹ INkosi yasikhuluma kuMose,

² yathi: Tshela abantu bakoIsrayeli ukuba baphambuke, bamise ngaphambi kwePihahirothi phakathi kweMigidoli lolwandle, ngaphambi kweBali‐Zefoni, limise maqondana layo ngasolwandle.

³ UFaro uzakuthi ngabakoIsrayeli: Badidekile elizweni, bavalelwe yinkangala.

⁴ Ngizayenza ibe lukhuni inhliziyo kaFaro, abalandele, ngizuze udumo ngoFaro langayo yonke impi yakhe, ukuba amaGibithe azi ukuthi ngiyiNkosi. Benza njalo.

⁵ INkosi yaseGibithe yabikelwa ukuthi abantu sebebalekile; inhliziyo kaFaro lenhliziyo zezinceku zakhe zaphenduka mayelana labantu, bathi: Kuyini lokho esikwenzileyo, sabavumela abakoIsrayeli ukuba bahambe bangabe besasisebenzela na?

⁶ UFaro wasebophela inqola yakhe, wahamba lempi yakhe.

⁷ Wathatha inqola ezingamakhulu ayisithupha ezikhethiweyo lazo zonke inqola zaseGibithe lezinduna zazo zonke.

⁸ INkosi yayenza yaba lukhuni inhliziyo kaFaro inkosi yaseGibithe, wabalandela ngoba baphuma bengesabi lutho.

⁹ AmaGibithe abalandela, amabhiza wonke lezinqola zonke zikaFaro kanye labagadi bamabhiza lempi yakhe, abafica bemise ngasolwandle ngasePihahirothi ngaphambi kweBali‐Zefoni.

¹⁰ Lapho uFaro esesondele, abakoIsrayeli baphakamisa amehlo abo, babona amaGibithe ebalandela, besaba kakhulu. Bakhala eNkosini;

¹¹ bathi kuMose: Kungoba kwakungekho mangcwaba eGibithe ukuthi usikhuphele ukuba sifele enkangala na? Usikhupheleni eGibithe na?

¹² Kasitshongo yini kuwe eGibithe ukuthi: Siyekele ukuba sisebenzele amaGibithe? Ngoba bekuzakuba ngcono kithi ukuba sisebenzele amaGibithe kulokuba sifele enkangala.

¹³ UMose wathi ebantwini: Lingesabi; manini liqine, libone ukukhulula kweNkosi ezakulenzela khona lamuhla; ngoba amaGibithe eliwabonayo lamuhla, kalisayikuwabona futhi.

¹⁴ INkosi izakulilwela, ngakho thulani lina.

¹⁵ INkosi yasisithi kuMose: Wena ukhalelani kimi na? Tshela abakoIsrayeli ukuba baqhubekele phambili.

¹⁶ Phakamisa intonga yakho, welulele isandla phezu kolwandle ukuba ulwahlukanise phakathi, ukuze abakoIsrayeli baluwele behamba emhlabathini owomileyo.

¹⁷ Ngizazenza zibe lukhuni inhliziyo zamaGibithe ukuba abalandele. Ngizazuza udumo ngoFaro langempi yakhe langezinqola zakhe langabagadi bamabhiza.

¹⁸ AmaGibithe azakwazi ukuthi ngiyiNkosi lapho sengizuze udumo ngoFaro langezinqola zakhe langabagadi bamabhiza.

¹⁹ Isithunywa sikaNkulunkulu esasihamba phambi kwempi yakoIsrayeli sasuka sayahamba ngemva kwayo; lensika yeyezi yasuka phambi kwabo, yema ngemva kwabo,

²⁰ yaba phakathi kwempi yamaGibithe lempi yakoIsrayeli. Kwakukhona iyezi lomnyama; ebusuku bonke impi kayisondelelananga lempi.

²¹ UMose waselulela isandla sakhe phezu kolwandle; iNkosi yabuyisela ulwandle emuva ubusuku bonke ngomoya olamandla wasempumalanga; amanzi ahlukana phakathi, lolwandle lwaba ngumhlabathi owomileyo.

²² AbakoIsrayeli bawela ulwandle emhlabathini owomileyo; amanzi aba njengomduli ngakwesokunene sabo langakwesokhohlo sabo.

²³ AmaGibithe abalandela, angena olwandle exotshana labo, wonke amabhiza kaFaro lenqola zakhe labagadi bamabhiza.

²⁴ Ngomlindo wokusa, iNkosi yakhangela impi yamaGibithe isensikeni yomlilo leyeyezi, yayidunga impi yamaGibithe;

²⁵ yaqobotsha amavili ezinqola ukuba zihambe nzima, aze athi amaGibithe: Asibalekele abakoIsrayeli, ngoba iNkosi iyabalwela imelene lathi.

²⁶ INkosi yasisithi kuMose: Yelulela isandla sakho phezu kolwandle ukuba amanzi abuyele phezu kwamaGibithe lenqola zawo labagadi bamabhiza.

²⁷ UMose waseselulela isandla sakhe phezu kolwandle; ekuseni ulwandle lwabuyela endaweni yalo; amaGibithe alubalekela; iNkosi yawabhubhisela phakathi kolwandle amaGibithe.

²⁸ Amanzi abuyela, asibekela izinqola labagadi bamabhiza, layo yonke impi kaFaro eyayingene olwandle ukubalandela; kakusalanga loyedwa kubo.

²⁹ Kodwa abakoIsrayeli bawela ulwandle behamba phezu komhlabathi owomileyo; amanzi aba njengomduli ngakwesokunene sabo langakwesokhohlo sabo.

³⁰ Ngokunjaloke iNkosi yabophula abakoIsrayeli ngalolosuku ezandleni zamaGibithe; babona amaGibithe efile okhunjini lolwandle.

³¹ Babona isenzo esikhulu eyasenzayo iNkosi kuwo amaGibithe. Abantu bayesaba iNkosi, bakholwa eNkosini, lasencekwini yayo uMose.