U-Eksodasi 13 - iBhayibhili Elingcwele 1978

Amazibulo ahlukaniselwa iNkosi; umkhosi wesinkwa esingelamvubelo

¹ INkosi yasikhuluma kuMose,

² yathi: Ngahlukanisela wonke amazibulo; konke okuvula isizalo phakathi kwabantu bakoIsrayeli laphakathi kwenkomo lokhu kungokwami.

³ UMose wasesithi ebantwini: Khumbulani lolusuku eliphume ngalo eGibithe, endaweni yobugqili; ngoba ngamandla esandla iNkosi elikhuphe kulindawo. Kakungadliwa isinkwa esilemvubelo.

⁴ Ngalolusuku ngenyanga kaAbibi liyaphuma.

⁵ Kuzakuthi lapho iNkosi isilingenisile elizweni lamaKanani lamaHethi lamaAmori lamaHivi lamaJebusi, eyafunga kubokhokho benu ukulinika lona, ilizwe eligcwele uchago lenyosi, ligcine linkonzo ngalinyanga.

⁶ Lizakudla isinkwa esingelamvubelo insuku eziyizikhombisa, kube khona umkhosi weNkosi ngosuku lwesikhombisa.

⁷ Isinkwa esingelamvubelo sizakudliwa ngazo zonke insuku eziyisikhombisa; kakungabonakali kini isinkwa esilemvubelo kanye lemvubelo elizweni lonke lakini.

⁸ Lizakutshela amadodana enu ngalolosuku lithi: Kungenxa yalokho iNkosi eyangenzela khona ekuphumeni kwami eGibithe.

⁹ Lokhu kuzakuba luphawu ezandleni zenu lesikhumbuzo emabunzini enu, ukuze umlayo weNkosi ube semilonyeni yenu; ngoba ngesandla esilamandla iNkosi ilikhuphile eGibithe.

¹⁰ Ngakho lizakugcina lumthetho iminyaka ngeminyaka ngesikhathi sawo.

¹¹ Kuzakuthi lapho iNkosi isilingenisile elizweni lamaKanani, njengokufunga kwayo kini lakubokhokho benu, ilinike lona,

¹² lahlukanisele iNkosi konke okuvula isizalo; amazibulo wonke amaduna ezinkomo elilawo azakuba ngaweNkosi.

¹³ Lawo wonke amazibulo abobabhemi lizakuwahlenga ngewundlu; uba lingawahlengi, liwaphule intamo; lamadodana wonke angamazibulo phakathi kwabantwana benu kawahlengwe.

¹⁴ Lapho amadodana enu elibuza ngesikhathi esizayo esithi: Kutshoni lokhu na? lizakuthi kuwo: Ngamandla esandla iNkosi yasikhupha eGibithe, endaweni yobugqili.

¹⁵ Ngoba kwathi uFaro esenza inhliziyo yakhe ibe lukhuni ukuba asivumele sihambe, iNkosi yabulala wonke amazibulo elizweni laseGibithe, amazibulo abantu lamazibulo ezinkomo; ngenxa yalokhu ngiyayihlabela iNkosi konke okuvula isizalo okuduna; kodwa wonke amazibulo amadodana ami ngiyawahlenga.

¹⁶ Kuzakuba luphawu ezandleni zenu lesikhumbuzo emabunzini enu, ngoba ngamandla esandla sayo iNkosi yasikhupha eGibithe.

Ukuhamba kwabakoIsrayeli besiya oLwandle oluBomvu

¹⁷ Kwathi uFaro esebavumele abantu ukuba bahambe, uNkulunkulu kabaholanga ngendlela edabula elizweni lamaFilistiya lanxa kwakuyiyona eseduze; ngoba uNkulunkulu wathi: Mhlawumbe abantu bazakuzisola nxa bebona impi, babuyele eGibithe.

¹⁸ Kodwa uNkulunkulu wababhodisa ngendlela yasenkangala ngasoLwandle oluBomvu. AbakoIsrayeli baphuma elizweni laseGibithe behlomile.

¹⁹ UMose wathatha amathambo kaJosefa, wahamba lawo, ngoba uJosefa wayebafungisile abakoIsrayeli wathi: Impela uNkulunkulu uzalihambela; kalibothatha amathambo ami lihambe lawo.

²⁰ Basebesuka eSukothi, baya bamisa eEthama, eceleni kwenkangala.

²¹ INkosi yahamba phambi kwabo emini ngensika yeyezi ukubahola endleleni, lasebusuku ngensika yomlilo ukubakhanyisela, ukuze bahambe emini lebusuku.

²² Insika yeyezi emini lensika yomlilo ebusuku kakusukanga phambi kwabantu.