U-Eksodasi 12 - iBhayibhili Elingcwele 1978

Ukumiswa komkhosi wePhasika

¹ INkosi yakhuluma kuMose loAroni elizweni laseGibithe,

² yathi: Kini linyanga kayibe ngeyokuqala ezinyangeni, ibe yinyanga yokuqala emnyakeni.

³ Khulumani kulo lonke ibandla lakoIsrayeli lithi: Ngosuku lwetshumi lwalinyanga bonke abantu kabathathe iwundlu loba izinyane ngokwemizi yabo kube iwundlu loba izinyane ngomuzi.

⁴ Uba abomuzi bebalutshwana bengalaneli iwundlu, loba izinyane, uzalithatha lomakhelwane oseduze ngokulingene labantu lanjengobunengi bokudla okuzasweleka komunye lomunye umuntu.

⁵ Kalingabi lasici, libe ngeliduna elilomnyaka munye; lithatheni ezimvini loba ezimbuzini.

⁶ Liligcine kuze kufike usuku lwetshumi lane lwenyanga leyo, lapho lonke ibandla lakoIsrayeli lizakuhlaba amawundlu lamazinyane kusihlwa.

⁷ Bazakuthatha igazi, balininde ensikeni zombili zomnyango lasemgubazini womnyango ezindlini abazakuwadlela kuzo.

⁸ Ngalobobusuku bazakudla inyama eyosiwe ngomlilo kanye lesinkwa esingelamvubelo lemibhida ebabayo.

⁹ Lingalidli liluhlaza ingabe liphekwe ngamanzi, kodwa losiwe ngomlilo, ikhanda lalo kanye lemilenze yalo lemibilini yalo.

¹⁰ Lingatshiyi lutho lwalo kuze kube sekuseni, kodwa okusalayo kakutshiswe ngomlilo.

¹¹ Libokudla, inkalo zenu zibotshiwe, izicathulo zisenyaweni zenu lezindondolo zenu zisezandleni zenu; lidle ngokuphangisa; kuliPhasika leNkosi.

¹² Ngoba ngalobobusuku ngizadabula phakathi kwelizwe laseGibithe, ngibulale wonke amazibulo aselizweni lelo, awabantu lawezinkomo, ngahlulele bonke onkulunkulu baseGibithe. NgiyiNkosi.

¹³ Igazi lizakuba luphawu ezindlini lapho likhona; nxa ngibona igazi ngizakulidlula, kungehleli kini inhlupheko yokulibulala mhla ngichitha ilizwe laseGibithe.

¹⁴ Usuku lolu luzakuba yisikhumbuzo kini; lugcineni lube ngumkhosi weNkosi ngokomthetho kuzo zonke izizukulwana zenu kuze kube nininini.

¹⁵ Lizakudla isinkwa esingelamvubelo insuku eziyisikhombisa. Ngosuku lokuqala khuphani imvubelo ezindlini zenu; ngoba odla isinkwa esivutshelweyo kusukela osukwini lokuqala kuze kufike usuku lwesikhombisa uzakukhutshwa phakathi kwabakoIsrayeli.

¹⁶ Ngosuku lokuqala kuzakuba khona inkonzo enkulu, kube khona langosuku lwesikhombisa inkonzo enkulu; lingasebenzisi lutho ngalezonsuku, kuphela ukulungisa ukudla kwabantu.

¹⁷ Ngakhoke kalibogcina umkhosi wesinkwa esingelamvubelo; ngoba ngalolosuku ngikhuphile izimpi zenu eGibithe. Kalibogcina lolosuku ngokomthetho kuzo zonke izizukulwana zenu kuze kube nini lanini.

¹⁸ Kusukela osukwini lwetshumi lane lwenyanga yokuqala kusihlwa lizakudla isinkwa esingelamvubelo, kuze kufike usuku lwamatshumi amabili lanye lwenyanga kusihlwa.

¹⁹ Kakungafunyaniswa ezindlini zenu imvubelo insuku eziyisikhombisa; ngoba odla okuvutshelweyo uzakukhutshwa ebandleni lakoIsrayeli, loba engowemzini loba engowokuzalwa elizweni.

²⁰ Lingadli okuvutshelweyo; emizini yenu yonke lidle isinkwa esingelamvubelo.

²¹ UMose wasebiza bonke abalisa bakoIsrayeli, wathi kubo: Hambani lizidingele amawundlu ngemizi yenu, lihlabe iPhasika,

²² lithathe ihisope, liyicwilise egazini elisemganwini, lininde umgubazi lensika zombili zomnyango ngegazi elisemganwini; kakungaphumi muntu endlini yakhe kuze kube sekuseni.

²³ Ngoba iNkosi izadabula ilizwe ukuba ibulale amaGibithe; nxa ibona igazi emgubazini lasensikeni zombili zomnyango, izakudlula lowomnyango ingavumeli umbulali ukuba angene ezindlini zenu ukulibulala.

²⁴ Lizakugcina lokhu kube ngumthetho kini lakuwo amadodana enu kokuphela.

²⁵ Kuzakuthi lapho lifika elizweni iNkosi ezakulinika lona njengesithembiso sayo, ligcine linkonzo.

²⁶ Kuzakuthi lapho abantwana benu besithi: Iyini linkonzo na?

²⁷ lithi: Ingumhlatshelo wePhasika leNkosi; ngoba yedlula izindlu zabakoIsrayeli eGibithe mhla ibulala amaGibithe, yazitshiya izindlu zethu. Abantu bakhothama, badumisa.

²⁸ AbakoIsrayeli basuka, bayakwenza njalo, njengalokhu iNkosi ibalayile oMose loAroni.

Ukubulawa kwamazibulo amaGibithe

²⁹ Kwathi phakathi kobusuku iNkosi yabulala wonke amazibulo eGibithe, kusukela kulo izibulo likaFaro owayehlezi esihlalweni sobukhosi kuze kube kulo izibulo lesibotshwa esasisentolongweni, lamazibulo wonke enkomo.

³⁰ UFaro wasevuka ebusuku, yena lenceku zakhe zonke lamaGibithe wonke. Kwaba khona ukukhala okukhulu eGibithe, ngoba kwakungekho ndlu lapho kungafanga muntu khona.

³¹ Ebusuku wababiza oMose loAroni, wathi: Vukani, lisuke ebantwini bami lina labakoIsrayeli, lihambe liyekhonza iNkosi njengokutsho kwenu.

³² Thathani izimvu zenu lezinkomo zenu njengokutsho kwenu, lihambe; futhi lingibusise lami.

³³ AmaGibithe ayebakhuthaza abantu ukuba baphume elizweni ngokuphangisa, ngoba athi: Thina sonke sifile.

³⁴ Abantu bathatha inhlama yabo ingakavutshelwa, betshata imiganu yabo yokuxovela izinkwa igoqelwe engutsheni zabo.

³⁵ Abantu bakoIsrayeli benza njengelizwi likaMose; bacela kumaGibithe izinto zesiliva lezinto zegolide lezigqoko.

³⁶ INkosi yabenzela umusa kumaGibithe, abanika lokho abakucelayo. Ngalokho bawaphundla amaGibithe.

AbakoIsrayeli basuka eGibithe

³⁷ AbakoIsrayeli basuka eRamesesi besiya eSukothi. Amadoda azinkulungwane ezingamakhulu ayisithupha ngaphandle kwabantwana labesifazana bahamba ngenyawo.

³⁸ Kwakhuphuka labo ixuku lenhlobonhlobo zabantu, kanye lezimvu lezinkomo, izifuyo ezinengi.

³⁹ Bapheka izinkwa ezingelamvubelo ngenhlama ababephume layo eGibithe ingavutshelwanga, ngoba baxotshwa ngokuphangisa eGibithe, bengaselasikhathi sokuzilungisela umphako.

⁴⁰ AbakoIsrayeli babehlale eGibithe iminyaka engamakhulu amane lamatshumi amathathu.

⁴¹ Emva kweminyaka engamakhulu amane lamatshumi amathathu, ngalona lolosuku zonke izimpi zeNkosi zaphuma eGibithe.

⁴² Kwaba yibusuku iNkosi eyalinda ngabo ukuba ibakhuphe eGibithe; yilobubusuku obuzakugcinelwa iNkosi yibo bonke abakoIsrayeli zonke izizukulwana zabo.

Imithetho yePhasika

⁴³ INkosi yathi kuboMose loAroni: Nanku umthetho wePhasika. Owezizwe kangalidli;

⁴⁴ kodwa zonke izigqili ezithengwa ngumuntu ngemali kazilidle nxa zisokiwe.

⁴⁵ Owezizwe loqatshiweyo bangalidli.

⁴⁶ Lizakudlelwa endlini ibenye; ungayikhupheli phandle kwendlu inyama yalo, ungaphuli thambo lalo.

⁴⁷ Lonke ibandla lakoIsrayeli kaligcine umkhosi.

⁴⁸ Uba kukhona owemzini ohlala lani othanda ukugcina iPhasika leNkosi, kabasokwe bonke abesilisa bakibo, ukuze asondele aligcine, abe njengowokuzalwa elizweni; kodwa ongasokwanga angalidli.

⁴⁹ Umlayo kawube munye kowokuzalwa elizweni lakowemzini ohlala phakathi kwenu.

⁵⁰ Benza njalo bonke abakoIsrayeli, njengalokhu iNkosi yayibalayile uMose loAroni.

⁵¹ Ngalona lolosuku iNkosi yabakhupha abakoIsrayeli elizweni laseGibithe ngezimpi zabo.