U-Eksodasi 11 - iBhayibhili Elingcwele 1978

Ukuxwayisa ngenhlupheko yetshumi: Ukufa kwamazibulo

¹ INkosi yathi kuMose: Ngisezakwehlisela uFaro lakulo iGibithe enye inhlupheko eyodwa; emva kwalokho uzakulivumela ukuba lihambe; lapho eselivumela ukuba lihambe uzakulixotsha impela.

² Tshela abantu khathesi ukuba wonke umuntu owesilisa lowesifazana acele kumakhelwane wakhe izinto zesiliva lezinto zegolide.

³ INkosi yabenzela umusa kumaGibithe. Futhi uMose waba mkhulu elizweni laseGibithe emehlweni ezinceku zikaFaro lasemehlweni abantu.

⁴ UMose wasesithi: INkosi ithi: Phakathi kobusuku ngizaphuma ngiye phakathi kweGibithe;

⁵ wonke amazibulo aseGibithe azakufa, kusukela kulo izibulo likaFaro ohlala esihlalweni sakhe sobukhosi, kuze kube kulo izibulo lencekukazi echolayo amabele, kanye lamazibulo wonke enkomo.

⁶ Kuzakuba khona elizweni lonke laseGibithe ukukhala okukhulu, okungazanga kube khona, lokungayikuba khona futhi.

⁷ Kodwa kwabakoIsrayeli kakuyikuba khona lenja ezakukhonkotha umuntu ingabe inkomo, ukuba lazi ukuthi iNkosi iyahlukanisa abakoIsrayeli lamaGibithe.

⁸ Zonke lezizinceku zakho zizakuza kimi, zingikhothamele zithi: Phuma wena labo bonke abantu bakho. Emva kwalokho ngizakuphuma. UMose wasephuma kuFaro ethukuthele.

⁹ INkosi yasisithi kuMose: UFaro kayikukulalela, ukuba zande izimangaliso zami eGibithe.

¹⁰ UMose loAroni bazenza zonke lezizimangaliso phambi kukaFaro; iNkosi yenza inhliziyo kaFaro yaba lukhuni, kazabavumela abantu bakoIsrayeli ukuba baphume elizweni lakhe.