UNehemiya 3 - iBhayibhili Elingcwele 1978

Ukulungiswa kwemiduli yeJerusalema

¹ Kwasekusuka eEliyashibi umpristi omkhulu labanye abapristi, baqalisa umsebenzi. Bakha iSango leZimvu; bamisa imigubazi yalo, bafaka lezivalo endaweni zazo; bakha baze bayafika eMphotshongweni weKhulu laseMphotshongweni waseHananeli.

² Eceleni kwakhe kwakusakha abantu baseJeriko; eceleni kwabo kwakusakha uZakuri indodana kaImri.

³ Amadodana kaHasenaya akha iSango leNhlanzi; amisa imigubazi yalo, lezivalo zalo, lamabhawudo alo, leminxibo yalo.

⁴ Eceleni kwawo kwakusakha uMeremothi indodana kaUriya kaHakozi; eceleni kwakhe kusakha uMeshulamu indodana kaBerekiya kaMeshezabeli; eceleni kwakhe kusakha uZadoki indodana kaBahana;

⁵ eceleni kwakhe kusakha abaseTekowa; kodwa izikhulu zabo zala ukusebenzela umphathi wabo.

⁶ UJoyada indodana kaPaseya loMeshulamu indodana kaBesodeya bakha iSango elidala; bamisa imigubazi yalo, lezivalo zalo, lamabhawudo alo, leminxibo yalo.

⁷ Eceleni kwabo kwakusakha uMelatiya waseGibeyoni loJadoni waseMerenothi, labantu baseGibeyoni labaseMizipa ababengaphansi kombusi welizwe elingaphetsheya komfula iYufrathi.

⁸ Eceleni kwabo kwakusakha uUziyeli indodana kaHarihaya, umkhandi wensimbi; eceleni kwakhe kusakha uHananiya, umenzi wamakha; bakha iJerusalema baze bayafika eMdulini obanzi.

⁹ Eceleni kwabo kwakusakha uRefaya indodana kaHuri, umbusi wengxenye yomuzi waseJerusalema.

¹⁰ Eceleni kwakhe kwakusakha uJedaya indodana kaHarumafi maqondana lendlu yakhe; eceleni kwakhe kusakha uHathushi indodana kaHashabineya.

¹¹ OMalikiya indodana kaHarimi loHashubi indodana kaPahathi‐Mowabi bakha isigaba sesibili loMphotshongo weSithando somlilo.

¹² Eceleni kwabo kwakusakha uShaluma indodana kaHaloheshi, umbusi wengxenye yomuzi waseJerusalema elamadodakazi akhe.

¹³ UHanuni labaseHanowa bakha iSango leSigodi; balilungisa, bamisa izivalo zalo, lamabhawudo alo, leminxibo yalo, balungisa umduli oyizingalo eziyinkulungwane kwaze kwaba seSangweni loMquba.

¹⁴ UMalikiya indodana kaRekabi, umbusi welizwe laseBeti‐Hakerema wakha iSango loMquba; walilungisa, wamisa izivalo zalo, lamabhawudo alo, leminxibo yalo.

¹⁵ UShaluma indodana kaKolihoze, umbusi welizwe laseMizipa, wakha iSango loMthombo; walilungisa, walifulela, wamisa izivalo zalo lamabhawudo alo leminxibo yalo; wakha lomduli weChibi laseShela ngasensimini yenkosi, waze waba ngasezikhwelweni eziphuma emzini kaDavida.

¹⁶ Ngemva kwakhe kwakha uNehemiya indodana kaAzibuki, umbusi wengxenye yelizwe laseBeti‐Zuri, waze wafika maqondana lamangcwaba kaDavida, lasechibini elimbiweyo lendlini yamaqhawe.

¹⁷ Ngemva kwakhe kwakusakha amaLevi, uRehuma indodana kaBani, elandelwa nguHashabiya, umbusi wengxenye yelizwe laseKeyila, owayesebenzela indawo yakibo.

¹⁸ Ngemva kwakhe kwakusakha izihlobo zabo, uBinuwi indodana kaHenadadi, umbusi wengxenye yelizwe laseKeyila,

¹⁹ elandelwa nguEzeri indodana kaJeshuwa, umbusi waseMizipa, owakha enye ingxenye emaqondana lendlela yokuya endlini yezikhali, eNgonsini.

²⁰ Ngemva kwakhe kwakusakha uBaruki indodana kaZabayi enye indawo esukela eNgonsini kusiya emnyango wendlu kaEliyashibi umpristi omkhulu.

²¹ Ngemva kwakhe kwakusakha uMeremothi indodana kaUriya kaHakozi enye indawo esukela emnyango wendlu kaEliyashibi waze wafika ekucineni kwayo.

²² Ngemva kwakhe kwakusakha abapristi ababehlala endaweni ezizingelezele iJerusalema.

²³ Ngemva kwabo kwakusakha oBenjamini loHashubi maqondana lendlu yakhe; ngemva kwabo kusakha uAzariya indodana kaMahaseya kaAnaniya eduze lezindlu zabo.

²⁴ Ngemva kwakhe kwakusakha uBinuwi indodana kaHenadadi enye indawo esukela endlini kaAzariya kusiya eNgonsini lasejikweni.

²⁵ UPalali indodana kaUzayi wakha maqondana leNgonsi lomphotshongo othutsha ngaphezu kwendlu yenkosi engaphezulu ngasegumeni labalindi. Ngemva kwakhe kwakusakha uPedaya indodana kaParoshi,

²⁶ waze wafika endaweni emaqondana leSango laManzi lasemphotshongweni othutsha lapho. — Inceku zasethempelini zazihlala eOfeli —

²⁷ Ngemva kwakhe abaseTekowa babesakha enye ingxenye maqondana lomphotshongo omkulu othutshayo, kwaze kwaba semdulini waseOfeli.

²⁸ Abapristi bakha phezu kweSango leBhiza, yilowo lalowo emaqondana lendlu yakhe.

²⁹ Ngemva kwabo kwakha uZadoki indodana kaImeri maqondana lendlu yakhe. Ngemva kwakhe kwakha uShemaya indodana kaShekaniya, umgcini weSango lasempumalanga.

³⁰ Ngemva kwakhe oHananiya indodana kaShelemiya loHanuni indodana yesithupha kaZalafi bakha enye indawo. Ngemva kwabo kwakha uMeshulamu indodana kaBerekiya maqondana lendlwana yakhe.

³¹ Ngemva kwakhe kwakha uMalikiya omunye wabakhandi bensimbi waze waba sendlini yezinceku zasethempelini leyabathengi maqondana leSango laBalindi, kusiya endlini engaphezu kwengonsi.

³² Phakathi kwendlu engaphezu kwengonsi leSango leZimvu kwakusakha abakhandi bensimbi labathengi.