UMikha 4 - iBhayibhili Elingcwele 1978

Isithembiso sokuthula

¹ Kuzakuthi ensukwini ezizayo intaba yendlu yeNkosi iphakanyiswe phezu kwazo zonke intaba, yengame wonke amaqaqa; abantu bazakubekelela baye kuyo,

² lezizwe ezinengi zizakufika zithi: Wozani sikhwele entabeni yeNkosi, siye endlini kaNkulunkulu kaJakobe, ukuba asifundise indlela zakhe, ukuze sihambe endleleni zakhe. Ngoba kuzakuphuma ukufundisa eZiyone, lelizwi leNkosi eJerusalema.

³ Izakwahlulela phakathi kwezizwe ezinengi, equmele izizwe ezilamandla ezikhatshana; zizakukhanda imihedla yazo ibe yimilomo yamakhuba, lemikhonto yazo ibe zingqamu zokuthena izihlahla; izizwe kazisayikuphuma impi, kazisayikufunda ukulwa futhi;

⁴ kodwa abantu bazakuzihlalela ngaphansi kwezihlahla zabo zevini, langaphansi kwezomkhiwa, kabayikwethuswa lutho; ngoba iNkosi yamabandla ikhulumile.

⁵ Ngoba bonke abantu balalela unkulunkulu wabo, kodwa thina sizalalela iNkosi uNkulunkulu wethu kuze kube nininini.

Ukukhululwa kukaIsrayeli ekuthunjweni

⁶ Ngalolosuku, kutsho iNkosi, ngizababuthanisa abaqhulayo, ngiqoqe abaxotshiweyo lalabo engibahluphileyo.

⁷ Abaqhulayo ngizakubenza babe lixukwana labaseleyo, labadeliweyo babe yisizwe esilamandla; iNkosi izakubabusa entabeni yaseZiyone, kusukela khathesi kuze kube nininini.

⁸ Wena, nqaba yomhlambi, ntaba yaseZiyone, kuzakufika kuwe ukubusa kwakuqala, umbuso waseJerusalema.

⁹ Usumemezelani kangaka na? Kawuselankosi na? Ubhubhile ummeli wakho yini ukuba wehlelwe ngumhelo njengobelethayo na?

¹⁰ Zitshile, ububule, Ziyone, njengowesifazana ohelelwayo; ngoba khathesi uzaphuma emzini, uhlale egangeni; uzakuya laseBabiloni lapho uzakhululwa khona, lapho iNkosi izakukuhlenga khona ezitheni zakho.

¹¹ Izizwe ezinengi zibuthene zisithi: Kangcoliswe, lamehlo ethu ajolozele eZiyone.

¹² Kodwa kabayazi imicabango yeNkosi, kabawaqedisisi amacebo ayo, ukuthi ubabuthelele njengezithungo esizeni.

¹³ Sukuma, ubhule, Ziyone, ngoba ngizakwenza impondo zakho zibe yinsimbi, lamangqina akho abe lithusi. Uza hoboza abantu abanengi, wahlukanisele iNkosi inzuzo yabo lemfuyo yabo iNkosi yomhlaba wonke.