UMakho 14 - iBhayibhili Elingcwele 1978

Icebo lokumbulala uJesu

¹ Ngemva kwensuku ezimbili kwaba khona iPhasika, lomkhosi wesinkwa esingelamvubelo; abapristi abakhulu lababhali bafuna icebo lokumbamba ngobuqili, bambulale.

² Kodwa bathi: Kakungabi ngesikhathi somkhosi, funa kube lesiphithiphithi ebantwini.

UJesu ugcotshwa eBethani

³ Kwathi eseBethani endlini kaSimoni olobulephero ehlezi ekudleni, kwafika owesifazana ephethe umfuma wamagcobo awenadi elibiza imali enengi; waphahlaza umfuma, wathela amagcobo ekhanda likaJesu.

⁴ Kwakukhona abanye abakhulumisana bodwa ngokuthukuthela, besithi: Achithelwani lamagcobo na?

⁵ Ngoba lamagcobo ngabe athengisiwe ngemali edlula amadola angamatshumi amathathu, kwanikwa abayanga. Bamthukuthelela kakhulu.

⁶ UJesu wathi, Myekeleni; limhluphelani na? Wenzile umsebenzi omuhle kimi.

⁷ Ngoba abayanga lihlala lilabo; uba lithanda, lingabenzela okuhle; kodwa mina kalihlali lilami.

⁸ Yena wenzile abengakwenza; uqalile phambili ukuwugcobela ukumbelwa umzimba wami.

⁹ Ngiqinisile ngithi kini: Loba kungaphi emhlabeni wonke lapho kutshunyayelwa khona ivangeli, lokhu akwenzileyo kuzakukhulunywa ngakho, kube yisikhumbuzo ngaye.

Umvuzo wokumnikela uJesu

¹⁰ UJudasi Iskariyothi, omunye wabalitshumi lambili, waya kubapristi abakhulu ukumnikela kubo.

¹¹ Sebezwile bathokoza, bathembisa ukumnika imali. Wasefuna ithuba elihle lokumnikela.

Ukumiswa kwesidlo esingcwele

¹² Ngosuku lokuqala lomkhosi wesinkwa esingelamvubelo ababehlaba ngalo iPhasika, abafundi bakhe bathi kuye: Uthanda ukuba siye silungisele ngaphi ukuba udle iPhasika na?

¹³ Wasethuma ababili kubafundi bakhe, wathi kubo: Hambani liye emzini; khona lizahlangana lendoda ithwele imbiza yamanzi; liyilandele.

¹⁴ Lapho ingena khona, kalibokuthi kumninindlu: UMfundisi uthi: Ingaphi indlu yami, lapho ngingadlela khona iPhasika labafundi bami na?

¹⁵ Yena uzakulitshengisa indlu enkulu ephezulu, eyendlelweyo, elungisiweyo; silungiseleni khona.

¹⁶ Bahamba abafundi, bangena emzini, bafumana njengokutsho kwakhe kubo; balungisela iPhasika.

¹⁷ Kusihlwa wafika labalitshumi lambili.

¹⁸ Sebehlezi ekudleni uJesu wathi: Ngiqinisile ngithi kini: Omunye wenu, odla lami, uzakunginikela.

¹⁹ Baqala ukudabuka, bathi kuye ngamunye: Kungaba yimi na?

²⁰ Wathi kubo: Ngomunye wabalitshumi lambili, otsheba kanye lami emganwini.

²¹ Ngoba iNdodana yomuntu ihamba njengokulotshiweyo ngayo, kodwa maye kulowomuntu enikelwa nguye iNdodana yomuntu! Kungakuhle aluba wayengazalwanga lowomuntu.

²² Kwathi besadla, uJesu wathatha isinkwa, wabonga, wasihlephula wabanika, wathi: Thathani, lokhu kungumzimba wami.

²³ Wathatha inkezo, wabonga, wabanika; banatha kuyo bonke.

²⁴ Wathi kubo: Lokhu kuligazi lami lesivumelwano elichithelwa abanengi.

²⁵ Ngiqinisile ngithi kini: Kangisayikunatha futhi okwesithelo sevini, kuze kube yilolosuku engizakusinatha ngalo sisitsha embusweni kaNkulunkulu.

²⁶ Kwathi sebehlabele ingoma baphuma baya entabeni ethiwa iOliveti.

Ukuxwayiswa kukaPetro

²⁷ UJesu wathi kubo: Lizakukhubeka lonke, ngoba kulotshiwe ukuthi: Ngizakutshaya umalusi, izimvu zichitheke.

²⁸ Kodwa ngemva kokuvuswa kwami ngizakulandulela ukuya eGalili.

²⁹ UPetro wathi kuye: Lanxa bekhubeka bonke, kodwa mina kangiyikukhubeka.

³⁰ Kodwa uJesu wathi kuye: Ngiqinisile ngithi kuwe: Lamhlanje ngalobubusuku, lingakakhali kabili iqhude, wena uzakungilandula kathathu.

³¹ Kodwa waqinisa ngamandla, esithi: Loba ngingaze ngife lawe, kangiyikukulandula. Batsho njalo bonke.

EGetsemane

³² Bafika endaweni ethiwa iGetsemane; wathi kubafundi bakhe: Hlalani lapha, ngisayakhuleka.

³³ Wathatha uPetro loJakobe loJohane, waqala ukudabuka lokukhathazeka kakhulu.

³⁴ Wathi kubo: Umoya wami udabukile kakhulu kungathi ngingaze ngife; hlalani lapha, lilinde.

³⁵ Waqhubeka ingcosana, wawa phansi, wakhuleka ukuba, uba kungenzeka, kungadlula kuye lesisikhathi.

³⁶ Wathi: “Aba,” Baba, zonke izinto ziyenzeka kuwe; susa linkezo kimi; kodwa kungabi njengokuba ngithanda mina, kodwa njengokuba uthanda wena.

³⁷ Weza, wabafumana belele; wathi kuPetro: Simoni, ulele na? Ubungelinde iawa ibenye na?

³⁸ Lindani, likhuleke ukuze lingangeni ekulingweni; umoya uyavuma, kodwa inyama ibuthakathaka.

³⁹ Wabuya wahamba wayakhuleka esitsho wona lawomazwi.

⁴⁰ Ebuya futhi, wabafumana belele, ngoba amehlo abo ayenzima kakhulu; babengazi ukuba bazamphendula bathini.

⁴¹ Wabuya ngokwesithathu, wathi kubo: Lisalele liphumula na? Kwanele, isikhathi sesifikile; khangelani, iNdodana yomuntu iyanikelwa ezandleni zezoni.

⁴² Sukumani sihambe. Khangelani, onginikelayo useseduze.

Ukubotshwa kukaJesu lokuthethwa kwecala lakhe

⁴³ Kwathi masinyane esakhuluma, kwafika uJudasi, omunye wabalitshumi lambili, elexuku liphethe imihedla lezinduku, livela kubapristi abakhulu lababhali labadala.

⁴⁴ Omnikelayo wayebanike isiboniso sokuthi: Lowo engizakumanga, nguye; mbambeni, lihambe laye, limqinise.

⁴⁵ Esefikile wasondela kuye masinyane, wathi: Mfundisi! Wamanga.

⁴⁶ Bamdumela, bambamba.

⁴⁷ Omunye kwababemi khona wakhokha umhedla, wageca inceku yompristi omkhulu, waquma indlebe yayo.

⁴⁸ UJesu wathi kubo: Liphume lemihedla lezinduku ukuzangibamba kungathi ngingumphangi na?

⁴⁹ Bengilani insuku ngensuku ethempelini ngifundisa, kodwa kalingibambanga; kodwa lokhu kwenziwe ukuba kugcwaliseke umbhalo.

⁵⁰ Bonke bamtshiya, babaleka.

⁵¹ Insizwa ethile yamlandela yambethe ingubo emzimbeni oze; bayibamba.

⁵² Yatshiya ingubo, yabaleka ize.

UJesu uphambi kompristi omkhulu

⁵³ Basebemqhuba uJesu bamusa kumpristi omkhulu; babuthana abapristi abakhulu bonke labadala lababhali.

⁵⁴ UPetro wamlandela ekhatshana, waze wangena egumeni lompristi omkhulu; wahlala kanye lezinceku esotha umlilo.

⁵⁵ Abapristi abakhulu lomphakathi wonke bafuna ubufakazi ngoJesu ukuze bambulale, kodwa kababufumananga.

⁵⁶ Ngoba abanengi bafakaza amanga ngaye, kodwa ubufakazi babo kabuvumelananga.

⁵⁷ Kwasukuma abanye bafakaza amanga ngaye besithi:

⁵⁸ Thina samuzwa esithi: Ngizakudiliza lelithempeli elenziwe ngezandla, ngakhe elinye ngensuku ezintathu elingenziwanga ngezandla.

⁵⁹ Loba kunjalo ubufakazi babo kabuvumelananga.

⁶⁰ Kwasekusukuma umpristi omkhulu phakathi kwabo, wambuza uJesu, esithi: Kawuphenduli lutho na? Kuyini lokhu abafakaza ngakho ngawe laba na?

⁶¹ Kodwa wathula, kaphendulanga lutho. Umpristi omkhulu wabuye wambuza, wathi kuye: UnguKristu, iNdodana yoBongekayo na?

⁶² UJesu wathi: Nginguye. Lizakubona iNdodana yomuntu ihlezi ngakwesokunene saMandla, isiza ngamayezi aphezulu.

⁶³ Umpristi omkhulu wadabula ingubo zakhe, wathi: Sisafunelani ofakazi na?

⁶⁴ Liyizwile inhlamba; lithini na? Bonke bamlahla bathi ufanele ukufa.

⁶⁵ Abanye baqala ukumkhafulela ngamathe, bamgubuzela ubuso bakhe, bamdutshuza, besithi kuye: Profetha! Lezinceku zamamukela ngokumtshaya.

UPetro ulandula uJesu

⁶⁶ UPetro esesegumeni ngaphansi, kwafika enye yamantombazana ompristi omkhulu,

⁶⁷ ibona uPetro esotha umlilo, yamkhangela yathi: Wena ubuloJesu waseNazaretha.

⁶⁸ Kodwa walandula wathi: Kangikwazi, futhi kangikuqedisisi okutshoyo; waphumela entubeni; lakhala iqhude.

⁶⁹ Intombazana imbona yabuya yaqala ukutsho kwababemi khona ukuthi: Lumuntu ungomunye wabo.

⁷⁰ Kodwa wabuya walandula. Ngemva kwesikhatshana futhi labo ababemi khona bathi kuPetro: Impela ungomunye wabo, ngoba ungowaseGalili.

⁷¹ Waseqala ukuthuka lokufunga, esithi: Kangimazi lumuntu elikhuluma ngaye.

⁷² Lahle lakhala iqhude ngokwesibili. UPetro wakhumbula ilizwi uJesu ayelitshilo kuye lokuthi: Lingakakhali kabili iqhude, uzakungilandula kathathu; waphihlika wakhala.