ULukha 14 - iBhayibhili Elingcwele 1978

UJesu usilisa efundisa endlini yomFarisi

¹ Kwathi ekungeneni kwakhe ngeSabatha endlini yomunye wabayizikhulu kubaFarisi ukuba adle laye, babemqaphele.

² Kwakukhona umuntu phambi kwakhe owayelesifo esithiwa ngumbizankulu.

³ UJesu wathi kuzazumlayo labaFarisi: Kuvunyelwe yini ukusilisa ngeSabatha ingabe atshi?

⁴ Kodwa bathula. Wasembamba, wamsilisa, wamyekela ukuba ahambe.

⁵ Wasesithi kibo: Nguwuphi ongathi elobabhemi kumbe inkabi yakhe ewele emgodini, angayikhuphi masinyane ngosuku lweSabatha na?

⁶ Bahluleka ukukuphendula lokhu.

⁷ Wasebatshela umfanekiso labo abamenyiweyo, ebona ukuzikhethela kwabo izihlalo ezingaphambili, wathi kibo:

⁸ Nxa umenyiwe ukuza emthimbeni, ungahlali esihlalweni esingaphambili, funa ngabe kukhona omkhulu kulawe omenyiweyo,

⁹ yena olimemileyo lobabili eze, athi kuwe: Mxekele lo; kubeng’khona uqala ukwehlela ngaphansi usulenhloni.

¹⁰ Kodwa nxa umenyiwe, hamba uhlale endaweni engaphansi ukuba, nxa efika okumemileyo, athi kuwe: Mngane, yenyukela ngaphezulu. Kubeng’khonake uzakuba lodumo emehlweni abo bonke abasekudleni lawe.

¹¹ Ngoba ilowo lalowo oziphakamisayo uzakuthotshiswa; lozithobayo uzakuphakanyiswa.

¹² Wasesithi kulowomuntu owayemmemile: Nxa usenza idili, ungamemi abangane bakho, labafowenu, lezihlobo zakho, lomakhelwane bakho abanothileyo, funa babuye bakumeme, labo beselisenanana.

¹³ Kodwa nxa usenza idili, mema abayanga, lezilima, leziqhuli, leziphofu;

¹⁴ uzakubusiswa, ngoba bangekwenanisele; uzakwenaniselwa ekuvukeni kwabafileyo.

Umfanekiso wedili lomthimba

¹⁵ Kwathi omunye kwababehlezi laye ekudleni esezwile lokhu, wathi: Ubusisiwe lowo ozakudla ukudla embusweni kaNkulunkulu.

¹⁶ UJesu wathi kuye: Umuntu othile wake wenza idili elikhulu, wamema abanengi.

¹⁷ Ngesikhathi sedili wathumela inceku yakhe ukuba itsho kwabamenyiweyo ukuthi: Wozani, ngoba sekulungisiwe konke.

¹⁸ Kodwa bonke baqala ukuzilandulela; owokuqala wathi: Ngithenge umhlaba, ngimele ukuhamba ngiyewubona; ngiyakuncenga, akungixolisele.

¹⁹ Lomunye wathi: Sengithenge inkabi ezilitshumi, ngiya ukuzilinga; ngiyakuncenga, akungixolisele.

²⁰ Lomunye wathi: Sengithethe umfazi, ngakhoke ngingeze ngeza.

²¹ Isibuyile inceku yayibikela lokhu inkosi yayo. Ngakhoke umninindlu wathukuthela, wathi encekwini yakhe: Phuma masinyane uye emigwaqweni lendleleni zomuzi, ulethe lapha abayanga, lezilima, leziphofu, leziqhuli.

²² Inceku yathi: Nkosi, sekwenziwe ongilaye khona; kodwa indawo isekhona.

²³ Yathi inkosi encekwini: Phuma uye ezindleleni lasezintangweni, ubacindezele bangene ukuba igcwale indlu yami.

²⁴ Ngoba ngithi kuwe kakho loyedwa walabo ababemenyiwe ozakulizwa idili lami.

Abafundi bakaJesu abaqotho

²⁵ Kwakuhamba laye amaxuku amanengi. Waphenduka wathi kuwo:

²⁶ Uba umuntu esiza kimi engazondi uyise lonina lomkakhe labantwana labafowabo lodadewabo, yebo, ngitsho lokusila kwakhe, angebe ngumfundi wami.

²⁷ Yilowo lalowo ongathwali isiphambano sakhe, angilandele, angebe ngumfundi wami.

²⁸ Ngoba nguwuphi kini othi efisa ukwakha umphotshonga, angaqali ahlale phansi, abale izindleko ukuthi ulakho yini okokuwuqeda na?

²⁹ Funa kuthi esebekile isisekelo, angabi lamandla okuwuqeda, bonke abakubonayo baqale ukumhleka,

³⁰ besithi: Lumuntu waqala ukwakha, kodwa kabanga lamandla okuqeda.

³¹ Loba yiyiphi inkosi eyakulwa lenye inkosi ingaqali ihlale phansi, ihlole ukuba ilamandla yini ngenkulungwane ezilitshumi ukuhlangabezana layo, eza ilenkulungwane ezingamatshumi amabili na?

³² Kodwa uba kungenzeki, ingathi isekhatshana leyo, ithume amanxusa, icele okokuthula.

³³ Kunjaloke ilowo lalowo kini ongadeli konke alakho angebe ngumfundi wami.

³⁴ Itshwayi lihle; kodwa uba itshwayi seliduma, lizakuvuselelwa ngani na?

³⁵ Kalisafanele lamhlabathi lomquba; kodwa liyalahlwa ngaphandle nje. Olendlebe zokuzwa akezwe.