UJoshuwa 18 - iBhayibhili Elingcwele 1978

Ukwabiwa kwelizwe eShilo

¹ Ibandla lonke lakoIsrayeli labuthana eShilo, lamisa khona ithente lokuhlangana. Ilizwe laselinqotshiwe.

² Kwasekusele phakathi kwabakoIsrayeli izizwe eziyisikhombisa ezazingakabelwa amazwe azo.

³ UJoshuwa wasesithi kwabakoIsrayeli: Lizadonda kuze kube nini ukuyathatha ilizwe iNkosi, uNkulunkulu wabokhokho benu, elinike lona?

⁴ Khethani amadoda amathathu kuleso lalesosizwe; ngizawathuma ukuba ahambe adabule lonke ilizwe, alihlole ukuze labiwe, abuye azengitshela.

⁵ Azalahlukanisa libe yizabelo eziyisikhombisa; uJuda uzahlala endaweni yakhe ngaseningizimu, labakoJosefa bahlale endaweni yabo ngasenyakatho.

⁶ Lizaloba ilizwe ngezigaba eziyisikhombisa, beseliletha kimi elikulobileyo, ukuba ngilenzele inkatho khona lapha phambi kweNkosi uNkulunkulu wenu.

⁷ AbakoLevi kabalasabelo phakathi kwenu, ngoba ubupristi beNkosi buyisabelo sabo. AbakoGadi labakoRubeni lengxenye yesizwe sabakoManase sebelabelwe ilizwe labo ngaphetsheya kweJordani kusiya empumalanga, uMose inceku yeNkosi eyabanika lona.

⁸ Asehambake amadoda. UJoshuwa wathi kulabo abahambayo ukuhlola ilizwe: Dabulani ilizwe lilihlole, libuye kimi; mina ngizalenzela inkatho khonapha phambi kweNkosi eShilo.

⁹ Ngakho lawomadoda adabula ilizwe, aloba ogwalweni lokho akubonileyo ngemizi ngemizi ezigabeni eziyisikhombisa; asebuya kuJoshuwa ezihonqweni eShilo.

¹⁰ UJoshuwa wasebenzela inkatho eShilo phambi kweNkosi, wababela abakoIsrayeli ilizwe, kwaba yilowo lalowo isabelo sakhe.

Ilizwe elanikwa isizwe sakoBenjamini

¹¹ Inkatho yadla isizwe sakoBenjamini ngosendo lwaso, sanikwa ilizwe eliphakathi kwesizwe sakoJuda lesakoJosefa.

¹² Ngasenyakatho umngcele wabo waqalisa eJordani, wakhwela iwatha ngasenyakatho kweJeriko, wasukhwela udabula ezintabeni waqonda entshonalanga, waphelela enkangala yaseBeti‐Aveni.

¹³ Wasuka lapho waqonda eningizimu usiya eLuzi, wafika ewatheni laseLuzi, lona liyiBetheli, wehla waqonda eAtarothi‐Adari, waya entabeni engaseningizimu kweBeti‐Horoni elingaphansi;

¹⁴ wawusuqonda kwenye indawo, waphenduka ngasentshonalanga waqonda eningizimu maqondana leBeti‐Horoni, waphelela eKiriyathi‐Bali, okutsho iKiriyathi‐Jeyarimi, umuzi wesizwe sakoJuda. Lo ngumhlubulo wentshonalanga.

¹⁵ Umhlubulo waseningizimu waqalisa emaphethelweni eKiriyathi‐Jeyarimi; umngcele wasuka lapho wayafika emthonjeni wamanzi aseNefitowa,

¹⁶ wasusehla uqonda emaphethelweni entaba ekhangele isihotsha saseBeni‐Hinomu ngasenyakatho kwesihotsha saseRefayimi, wasusehla isihotsha saseHinomu ngaseningizimu kwewatha lamaJebusi, wehlela eEni‐Rogeli;

¹⁷ wasuphendukela enyakatho usiya eEni‐Shemeshi, wadlulela eGelilothi elimaqondana lomqanso waseAdumimi, wehlela elitsheni likaBohani indodana kaRubeni,

¹⁸ wadlulela enyakatho kwewatha laseBeti‐Araba, wehlela eAraba,

¹⁹ wasudlulela enyakatho kwewatha laseBeti‐Hogila, waphelela ngasenyakatho koLwandle lweTshwayi, ekupheleni kweJordani ngaseningizimu. Lo wawungumngcele waseningizimu.

²⁰ IJordani lingumngcele walo ngasempumalanga. Leyo yimingcele yesizwe sakoBenjamini ngosendo lwaso.

²¹ Imizi yesizwe sakoBenjamini ngosendo lwaso yayiyile; iJeriko leBeti‐Hogila leEmeki‐Kezizi

²² leBeti‐Araba leZemarayimi leBetheli

²³ leAvimi lePara leOfira

²⁴ leKefari‐Amoni leOfini leGeba; iyonke ilitshumi lambili lemizana yayo.

²⁵ Kukhona leGibeyoni leRama leBeyerothi

²⁶ leMizipe leKefira leMoza

²⁷ leRekemi leIripeli leTarala

²⁸ leZela leHayelefi leJebusi, okutsho iJerusalema, leGibeya leKiriyathi‐Jeyarimi; iyonke ilitshumi lane lemizana yayo. Leli liyilizwe lesizwe sakoBenjamini ngosendo lwaso.